Viewing:

Azir Akam Lamentations 5

Select a Chapter

Jerusalemia uarir apangkuvighasa Ikiavɨra Itir Godɨn azai

A

1Aio! Ikiavɨra Itir God, bizir e bativiziba nɨ adagh nɨghnɨgh,

en apangkufigh.

Nɨ kagh en gan.

E bar pazavɨra ikia

egha gumazamizir igharazibar damazimɨn bar aghumsɨki.

B

2Bar guizbangɨra, en nguazim kantrin igharazimɨn gumazamizibar dafarimɨn iti.

Ezɨ me en dɨpenibar iti.

D

3Dughiar e itir kam,

e mati afeziaba puvatɨgha borir asaghasazibar mɨn iti.

Egha e bar pura iti,

mati amizir odiarir paba ariaghireziba.

E

4E fomɨra daziba ko dɨpaba pura da isi,

ezɨ datɨrɨghɨn e dagɨar ekiabar iveza,

daziba ko dɨpaba isi.

F

5Faragha iza datɨrɨghɨn, apaniba bar e abɨragha mamaghɨra itima,

e bar amɨra.

Me tong e ataghizɨma, e avughsir puvatɨ.

G

6Gatɨrɨghɨn e dagheba puvatɨgha,

Isipia ko Asiriabar apengan ikia men azangsɨzima,

me dagheba amadima e dagh ivesi.

GH

7Ghuezir inazir afeziar kaba arazir kuram gamigha, oveaghue.

Ezɨ e datɨrɨghɨn men osɨmtɨzimɨn ivezir kuram isi.

I

8Ia Babilonian ingangarir gumazir kɨniba e gativagha en gari,

ezɨ gumazir me dama e iniamba puvatɨ.

K

9Kar gumazir e gasɨghasɨghamiba tintinibar en kantrin iti.

E dagheba burir dughiabar,

okɨmakɨar gumazir kaba, e mɨsoghtɨ e arɨmɨghirasa

me en tuaviba asia iti.

M

10Mɨtiriar avir mɨzazir igharaziba en azi.

Ezɨ en mɨkarziba fei, mati avim isi.

N

11Nan apaniba en amuiba ko guivir igiar Saion ko Judan nguibar ekiamɨn itiba,

pura men suighava arazir kurabar me gami.

NG

12Nguibar kamɨn gumazir dapaniba, apaniba me inigha benibar men fɨriba dafegha me gui.

Egha en gumazir aruaba, me arazir aghuitamɨn me gamir puvatɨ.

O

13Otarir igiaba me puvɨra me abɨrima

me pura witɨn ovɨziba mɨrmɨra,

dazir ikɨzir osɨmtɨzir bar dafaba ateragha arui.

P

14Puvatɨ. Gumazir aseba datɨrɨghɨn ua nguibar ekiamɨn tiar akamɨn apiav itir puvatɨ.

Ezɨ gumazir igiaba ua marvibagh ivia dɨbɨaribav sozi puvatɨ.

R

15Roghɨra roghɨra, en agoroger en navibar itiba gɨfa.

E ighiabagh amir arazir kam e ataghizɨ,

e datɨrɨghɨn azir akamrama amua iti.

S

16Saion, en ziar ekiam iraghugha gɨfa.

E uari arazir kuram gamigha,

arazir kurar kam bangɨn,

e datɨrɨghɨn bar tegha gɨfa.

Evzika!

T

17-18Tina en akuragham, e ghaze Saionɨn Mɨghsɨam bar ikuvigha gɨvagha,

afiar atiabar nguibamɨn mɨn oto.

Ezɨ e a bagha arei moghɨn uari baragha aziavɨra itima,

en damaziba e gami.

U

19Uaghan nɨ, Ikiavɨra Itir God,

nɨ Atrivir ikia mamaghɨra itim.

En ovavir boriba uaghan zurara nɨn apengan ikɨ,

mamaghɨra ikiam.

V

20Vangɨnan kagh en gan,

nɨ tizim bagha zurara e bakɨnɨghɨnigha

akɨrim ragha e gasara?

Z

21-22Zurara nɨ ko ikiamin arazim,

nɨ ua e damutɨ e an gɨn mangam.

O Ikiavɨra Itir God, nɨ akɨrim ragha bar e gasaragha bar en anɨngaghe.

Nɨ ti bar e gɨn amadagham, o?

E ua nɨ bagh izasa.

E ghaze, nɨ faragha deragha e gamizɨma, e deragha ikezɨ moghɨn,

nɨ kamaghɨra ua e damu.