Viewing:

Onger Akaba Psalms 139

Select a Chapter

God e gɨfogha gɨvagha bar deraghavɨra en gari

Devit onger akar kam osiri.

A gumazir onger akabar faragha zuim gɨnɨghnɨgha an osiri.

1O Ikiavɨra Itir God,

nɨ nan navim tuisigha gɨvagha

na gɨfo.

2Nɨ nan saghon ikia nan nɨghnɨziba ko,

kɨ amir biziba ko, kɨ apia dɨkavir araziba,

nɨ bar dagh fo.

3Nɨ nan gari kɨ ingari, o kɨ akui,

kɨ amir araziba,

nɨ bar dagh fo.

4O Ikiavɨra Itir God, kɨ tɨghar mɨkɨmamin dughiam,

nɨ fogha gɨfa kɨ tizim mɨkɨmam.

5Nɨ danganibar bar nan mɨriaba ekɨarugha,

uan gavgavir ekiamɨn bar deragha nan gari.

6Nɨn fofozir kam bar pɨn ikia,

egha nan nɨghnɨzim bar a gafira.

7Kɨ managhɨra mangɨgh, nɨn duam ategham?

Kɨ managhɨra mangɨgh nɨn modogham?

Bar puvatɨ.

8Kɨ nɨn Nguibamɨn mangam, nɨ uaghan iti.

Kɨ Gumazamizir Oveaghuezibar Nguibamɨn ikiam, nɨ uaghan ti.

9Kɨ nguibar aruem anadi naghɨn ititamɨn ikiam,

o aruem uaghiri naghɨn itir nguibar saghuiamɨn ikiam,

10nɨ kagh ikɨ tuavim nan akakagh

nan akurvagham.

11-12Kɨ suam, “Amɨnir bɨrim nɨ na avaraghtɨ,

aruer angazangarim nɨ iragh mɨtatemɨn otogh.”

Nɨn nɨghnɨzim mɨtater kam a guizɨn mɨtatem puvatɨ.

Dɨmagarim, a uaghan aruem mɨrara isiragha gari.

Nɨn damazimɨn, aruem ko dɨmagarim magh gari.

13Guizbangɨra, nɨ nan mɨkarzimɨn ingarir dughiam,

nɨ nan amebamɨn navir averiamɨn aven bar nan ingarizɨ,

nan mɨkarzim bar moghɨra iti.

14Nɨ nan mɨkarzimɨn ingari,

ezɨ nan mɨkarzim bar deragha igharagha gari.

Kamaghɨn kɨ nɨn ziam fe.

Bizir nɨ ingariziba, da bar dera,

ezɨ kɨ guizbangɨra uan navir averiamɨn aven bizir kabagh nɨghnɨgha dagh fo.

15Kɨ uan amebamɨn navir averiamɨn aven modoghav ikia nɨmɨram irivima,

nɨ nan agharibar garima da ekɨva uari isavsuiki.

16Nan amebam tɨghar na batamin dughiam,

nɨ faragha nan ganigha gɨfa.

Bar fomɨra, kɨ tɨghar nguazimɨn otivam,

kɨ nguazir kamɨn ikiasa nɨ ifongezɨ moghɨn dughiaba nɨ da osirigha gɨfa.

17O God, kɨ manmaghɨra nɨn nɨghnɨzibagh fofogham?

Nɨn nɨghnɨziba bar avɨrasemegha bar pɨn iti,

ezɨ kɨ dagh foghamin tuaviba puvatɨ.

18Kɨ nɨn nɨghnɨziba mengtɨ,

dar megemem mangɨ ongarimɨn gigibagh afiragham.

Kɨ akuigha uam osezir dughiamɨn,

nɨ na ko ikiavɨra iti.

19O God, nɨ gumazir kurabav sueghtɨ me arɨmɨghireghasa kɨ ifonge.

Gumazir mɨsoziba na atakigh.

20Gumazir kaba, nɨn ziam akar kurabar a mɨgei.

Egha pura nɨn ziam dɨborava, a gasɨghasɨsi.

21O Ikiavɨra Itir God, gumazir nɨ gifongezir puvatɨziba, kɨ bar men aghua.

Gumazir uari fa nɨ gasɨghasɨghasava amiba,

nan navim me bagha bar ikufi.

22Kɨ bar guizbangɨra me gifongezir puvatɨ.

Kɨ garima me nɨn apanibar mɨn iti.

23O God, nɨ nan navir averiam tuisɨgh

egh deragh nan nɨghnɨzim gɨfogh.

24Nɨ bar deragh na tuisɨgh egh deragh na gɨfogh,

ifavarir arazitam ti nan nɨghnɨzimɨn ikiama.

Nan akuragh nan aku,

ikɨrɨmɨrir zurara itimɨn tuavimɨn mangɨ.