Viewing:

Onger Akaba Psalms 83

Select a Chapter

God Israelian apaniba bar me agɨvasa, gumazim God ko mɨgei

Godɨn ziam fer ighiam, Asap an osiri.

1O God, nɨ akam dukuagh pura ganan markɨ.

Nɨ pura uabɨn asugh nɨmɨra ikian markɨ.

2Nɨ gan, nɨn apaniba me mɨdoroziba fori da otifi.

Ezɨ gumazir nɨn aghuaziba nɨn akaba batosi.

3Me nɨn gumazamiziba paza me damuasa muegha me bagha gara iti.

Gumazamizir nɨn apengan iti nɨ eghuvir kaba,

gumazir kurar kaba me gasɨghasɨghasa.

4Me ghaze,

“Ia izɨ e Israelɨn kantri bar a gasɨghasightɨ,

a ziaba puvatɨghtɨ, me uam a gɨnɨghnɨghan kogham.”

5Kantrin kaba Israel abɨnasa uari akuvagha,

nɨghnɨzir vamɨram amigha akam mɨsoke.

6-7Ikɨzir kabanang: Idomia, Ismaelia, Moapia, Hakria, ko

Gebalia, Amonia, Amalekia, Filistia, ko Tairɨn nguibamɨn gumazamiziba.

8Asirian kantri uaghan men aven ghugha Moapia ko, Amonian akura.

Me Lotɨn ovavir borir bar gavgaviba.

(Ighiam gamua an suiam atugha avughsegha ua ighiam gami.)

9O God, nɨ faragha Midiania gamizɨ moghɨn nɨ me damigh.

Nɨ kamaghɨra Kisonɨn Fanemɨn Sisera ko, Jabin aning gasɨghasɨki.

10Nɨ dughiar kamɨn Endorɨn nguibamɨn aning gasɨghasɨghizɨ,

aningɨn kuamning ikia kuri.

11Nɨ faragha Orep ko, Sep gamizɨ moghɨn,

nɨ men mɨdorozir gumazir dapanibar amigh.

Men gumazir dapaniba, nɨ faragha Seba ko, Salmuna gamizɨ moghɨn me damigh.

12Gumazir kaba bar ghaze,

“E Godɨn nguazir bar aghuir kam inigh an afeziam ikegham.”

13O God, nɨ uan amɨnir gavgavimɨn me giveraghtɨ,

me mɨnezibar mɨn mɨghɨ tintinibar mangegh gɨvagham.

Nɨ me giveraghtɨ, mati amɨnim raizɨn mɨsevibagh iverazɨ,

da mɨgha ghuezɨ moghɨn, me mɨghɨ mangegh.

14Avim ruariba ko mɨghsɨabar isia akara zui moghɨn,

nɨ men agɨntɨghtɨ me aregh.

15Kamaghɨra, nɨ amozir ekiam amadaghtɨ a izɨ men agɨraghtɨ me aregh.

Nɨ amɨnir ekiam amadaghtɨ, a izɨtɨ me atiating.

16O Ikiavɨra Itir God,

Nɨ me damightɨ me okam nɨghnɨgh bar aghumsigh,

nɨ baghvɨra ikiam.

17Nan ifongiam, nɨ me abɨraghtɨ me bar atiatingigh aghumsigh kamaghɨra ikɨ.

Nɨ aghumsɨzim me danigh, me mɨsueghtɨ me arɨmɨghiregh.

18Nɨ kamagh damightɨ me guizbangɨra ganigh fogh suam,

“Nɨ bar uabɨra nɨn ziam, Ikiavɨra Itir God.

Nɨrara Godɨn Bar Pɨn Itim,

egha nguazir oteviba bar dagh ativagha dar gari.”