Viewing:

Gesami Hea:su Psalms 49

Select a Chapter

Bagade Gagumusa: Dawa:su da Gagaoui Agoai

1-2Dunu huluanedafa! Nabima!

Fifi asi gala dunu huluane, bagade amola fonobahadi

bagade gagui amola hame gagui, dilia huluane nabima!

3Na asigi dawa:su da osodogonewane ba:mu.

Na da bagade dawa:su sia: fawane sia:mu.

4Na da malasu amo dawa:mu amola sani baidama dusia

amo malasu ea bai olelemu.

5Nama ha lai dunu ilia na eale sisiga:le disibiba:le

na se nabimuba:le hame beda:sa.

6Nama ha lai da wadela:i hamosu dunu.

Ilia da bagade gaguiba:le

hahawane gala amola ilia bagade gaguiba:le hidale sia:sa.

7-9Osobo bagade dunu da hi esalusu bu bidiga lamu hamedei ba:sa.

E da Godema ea esalusu bidi defei imunu da hamedei.

Bai osobo bagade dunu ea esalusu bidi defei da baligili bagadedafa.

E bogosu mae doaga:ma:ne amola eso huluane fifi ahoanoma:ne,

Godema bidi imunu da baligili bagadedafaba:le, imunu hamedeidafa.

10Bagade dawa:su dunu da gagaoui dunu defele bogosu dawa:.

Dunu huluane da amo hou dawa:.

Ilia huluane defele, ilia gagui amo ilia fa:no fifi manebe ilima ilia nana iaha.

11Ilia da musa: soge gagui galu.

Be wali bogoi uli dogoi da ilia diasu agoai.

Amo ganodini ilia da eso huluane dialumu.

12Dunu ea bagade hou da e hame gaga:mu.

E da ohe ea bogosu defele bogomu.

13Dunu amo da ilila: hou dafawaneyale dawa:sa

amola ilia bagade gagui amoga sadi agoai ba:sa,

ilima doaga:mu hou ba:la misa!

14Ilia da sibi agoane, hobeamu gogoleiba:le, bogosu ba:mu.

Fedege agoane, Bogosu da ilia sibi ouligisu dunu agoai ba:mu.

Bogosu soge ganodini ilia fifi lasu amoga sedadewane dialea,

ilia da:i hodo da dasamu.

Amola moloidafa hamosu dunu ilia da amo wadela:i hamosu dunu hasalimu.

15Be Gode da na gaga:mu.

Amola bogosu ea gasa amoga E da na gaga:mu.

16Osobo bagade dunu da liligi bagade gagusia, amola bu baligili gagusia,

mae mudale da:i dioma.

17Bai e da bogosea, e da ea gagui liligi amo hi hame gaguli masunu.

Ea gagui liligi amo bogoi uli dogoi amoga gaguli sa:imu da hamedei.

18-19Dunu amolawane da hi esalusu amoga hahawane galea,

amola e da bagade gaguiba:le, eno dunu da emanodosa,

be e da ea aowalali ilia bogoi ilima gilisimu.

Bogosu ganodini, gasi da eso huluane dialalalumu.

20Dunu ea bagade dawa:su amola ea bagade gagui da ea bogosu hame gaga:mu.

E da ohe bogobe agoanewane bogomu.