Viewing:

Matiu Matthew 1

Select a Chapter

Iesusa gan tiacarpaik nakɨpatna

(1.1—4.16)

Iesusna nicar ŋgamrirta iremb

(Luk 3.23-38)

1Na ganna ande, Iesus Karaisna nicar ŋgamrirta wiwit.

Na Iesus Karaisa ma Dewitna wiwitnan,

na Dewitta ma Abraamna wiwitnan.

2Na Abraamma ma Aisakna aet,

na Aisaka ma Iakopna aet,

na Iakopa ma Iudaapa mana laiplacarta aet.

3Na Iudana nuocniŋa Peresapa Sera, na maniŋna aemma Tamar.

Na Peresa ma Esronna aet,

na Esron ma Ramna aet.

4Na Ramma ma Aminadapna aet,

na Aminadap ma Nasonna aet,

na Nason ma Salmonna aet.

5Na Salmon ma Boasna aet, na mana aemma Reap,

na Boasa ma Obetna aet, na mana aemma Rut,

na Obet ma Iesina aet,

6na Iesi tikca ma gagrirta ramoot paŋan Dewitna aet.

Na Dewitta ma Solomonna aet, na Solomonna aemma, outta ma Uraia laŋgoca eacrina.

7Na Solomonna ma Reaboamna aet,

na Reaboamma ma Abiana aet,

na Abia ma Asana aet.

8Na Asa ma Iosapatna aet,

na Iosapatta ma Ioramna aet,

na Ioramma ma Usiana aet.

9Na Usia ma Iotamna aet,

na Iotam ma Acasna aet,

na Acas ma Aesekaina aet.

10Na Aesekaia ma Manasana aet,

na Manasa ma Emonna aet,

na Emon ma Iosaiana aet.

11Na Iosaia ma Iekoiakinapa mana laiplacarta aet, na an kɨdrɨkca Babilonnanda, Israelnanap ruŋga minmo tuomb naaŋgɨca Babilonna tɨkrina.

12Karica mina taŋga Babilonna inikca mbukca, anna eacatna nicarta wiwitta, gade,

Iekoiakina ma Sialtielna aet,

na Sialtiel ma Serubabelna aet.

13Na Serubabela ma Abiutna aet,

na Abiut ma Eliakimna aet,

na Eliakimma ma Asorna aet.

14Na Asora ma Sadokna aet,

na Sadokca ma Akimna aet,

na Akimma ma Eliutna aet.

15Na Eliuta ma Eleasarna aet,

na Eleasar ma Matanna aet,

na Matan ma Iakopna aet.

16Na Iakopa ma Iosepna aet, na Iosepa ma Mariana kaŋgait.

Na Maria ma Iesusa mɨratna meac, na Iesusa ma Karais.

17Ainda moca an Abraamna wiwitta muruŋa kɨpca Dewitna wiwitna mɨnna tɨkatnanna, anna parniŋapa mbutremb paurna mɨn, na Dewitna mɨnna tɨkca kɨpca Babilonnanda, minmo tuomb naaŋgɨatna mɨnna, an toco parniŋapa mbutremb paurna mɨn, na Babilonnanda minmo tuomb naaŋgɨa kɨpca Karaisna mɨn toco, anna parniŋapa mbutremb paurna mɨn.

Maria Iesus Karaisa mɨratna

(Luk 2.1-7)

18Na Iesus Karaisa mɨratna nininia gaind, mana aemma Maria, mina manmo Iosep laŋgona moca mababuat. Na an mɨnna maniŋa laŋgo ŋgocor ndeacri, mina wattatnanna Maria, Raraŋ Aetaniacna Ŋeroŋ Ratna gargar mbuŋa ma niktan. 19Ri, mana kaŋgait Iosep, ma ramoot wandoŋ laŋ tik, ma Mariamo numbir neaŋ narica, mana tɨki mona iroarta moca ma gaind mamoat, ma manmo laŋanna tɨkcarina moca ma ndona iro mamoat. 20Ainda moca Iosepa an iroap eacri, Kacoot Raraŋ Aetaniacna mbaiŋna aiŋa morena ŋeroŋa manmo tamram mbuŋ nakɨpca manmo gaind mambopat, “Iosep, Dewitna ŋgamaɨr, u ndona meac aŋgɨca laŋgona kai nanambi teac, u warac, an mooŋnuoca mana nikinik ndeacrenanna, anna Raraŋ Aetaniacna Ŋeroŋ Rat neaŋrina. 21Na ma Nuocna mooŋnuoca mɨrnande, te, u mana imo Iesus ŋgacnande, na an ina mɨnɨŋa gaind, ma ndona meikramtaɨrta tɨpemb ŋgorikta makukara mo kecarica, minmo mac nda aŋgɨnande.”

22Aintik an kirarira larurinanna, anna Kacootta ndona ramma morina ramootna kamma moi mɨnna tɨkna moca. Na mana ramma morina ramootta gaindopatna, 23“Meac ianna ma ramootap ŋgoŋgortanna, ma nik tɨkca nuocna mooŋnuoc ianna mɨrnande. Te, mina manmo Emanuel ŋgacnandet.” Na an ina mɨnɨŋa gaind, “Raraŋ Aetaniaca aiap eacnandet.”

24Ri, Iosepa ma ŋgoca maica ŋgepatke, ma an Kacoot Raraŋ Aetaniacna mbaiŋna aiŋa morena ŋeroŋa mbopatna iroa, ma ndona baburina meacmo malaŋgoat. 25Ainda moca ma ndona meacapa mba ŋgori, taŋca an mɨn, mana meaca mooŋnuoca mɨratke, Iosepa manmo an i Iesus matɨkat.