Viewing:

1 Kronikel 1-chronicles 24

Select a Chapter

Nia moomee e haga ingoo gi digau hai mee dabu

1Aanei nia hagabuulinga daangada ala e dau gi di hagadili o Aaron. Aaron guu hai ana dama daane dogohaa go Nadab, Abihu, Eleazar, mo Ithamar. 2Nadab mo Abihu guu mmade hua i mua gei nadau damana le e mouli, gei nau hagadili ai. Malaa, nia duaahina daane meemaa go Eleazar mo Ithamar guu hai nia daangada hai mee dabu. 3Di King David gu haganoho nia hagadili o Aaron gii hai nia hagabuulinga daangada e hagatau gi nadau moomee. Ang gi di mee deenei, mee ne hagamaamaa go Zadok, mai di hagadili o Eleazar, mo Ahimelech, mai di hagadili o Ithamar. 4Nia hagadili o Eleazar gu haganohonoho guu hai nia hagabuulinga daangada e madangaholu maa ono, ge nia hagadili o Ithamar gu haganohonoho guu hai nia hagabuulinga daangada e walu. Di mee deenei la ne hai idimaa nia dagi dogologo e gila mai i di madahaanau o Eleazar, nia dagi e hogoohi mai i di madahaanau o Ithamar. 5Ma dela digau hai mee dabu i golo ala e madamada humalia di Hale Daumaha mo nia dagi ala e madamada humalia nia hegau dabu i mehanga nia hagadili o meemaa dogolua go Eleazar mo Ithamar, ga hidi mai di kae o nadau waawa moomee mai di hudihudi e hilihili ai. 6Nia hagadili o Eleazar mo Ithamar e hagadau hudihudi belee modongoohia nia waawa o nia hegau. Nomuli tangada hihi o digau Levi go Shemaiah, tama daane a Nethanel, ga hagailongo gi lodo di beebaa. Di king, ana gau ngalua mugi nua, tangada hai mee dabu go Zadok, Ahimelech tama daane a Abiathar, mo nia dagi o nia madahaanau o digau hai mee dabu mo nia mada haanau digau Levi, huogodoo e hai digau hagadootonu.

7-18Deenei di hagatau gi lala nia hagabuulinga madahaanau e madalua maa haa ang gi nadau waawa moomee:

1. Jehoiarib2. Jedaiah3. Harim4. Seorim5. Malchijah6. Mijamin7. Hakkoz8. Abijah9. Jeshua10. Shecaniah11. Eliashib12. Jakim13. Huppah14. Jeshebeab15. Bilgah16. Immer17. Hezir18. Happizzez19. Pethahiah20. Jehezkel21. Jachin22. Gamul23. Delaiah24. Maaziah

19Nia daane aanei la ne hihi e hagatau ang gi nadau waawa moomee i lodo di Hale Daumaha, e hai labelaa nia waawa moomee ala guu lawa di haganoho go di nadau damana madua go Aaron i di nadau hagagila aga nia helekai Dimaadua go di God o Israel.

Di hagatau digau Levi

20Aanei nia hoo dagi o nia madahaanau ne hai mai Levi:

Jehdeiah, di hagadili o Amram mai Shebuel,

21Isshiah, di hagadili o Rehabiah,

22Jahath, di hagadili o Izhar mai Shelomith,

23Jeriah, Amariah, Jehaziel, mo Jekameam, go nia dama daane a Hebron, i di hagatau eia i di madua,

24Shamir, di hagadili o Uzziel mai Micah,

25Zechariah, di hagadili o Uzziel mai Isshiah, tuaahina daane o Micah,

26Mahli, Mushi, mo Jaaziah, nia hagadili o Merari. 27Jaaziah guu hai ana dama daane dogodolu go Shoham, Zaccur, mo Ibri. 28-29Mahli guu hai ana dama daane dogolua go Eleazar mo Kish. Eleazar digi hagadili ana dama daane, gei Kish ne hai dana dama daane e dahi go Jerahmeel. 30Mushi guu hai ana dama daane dogodolu go Mahli, Eder, mo Jeremoth.

Aanei nia madahaanau o digau Levi.

31Di tagi o di madahaanau mo dono duaahina daane dulii e hai nau hudihudi i nadau waawa moomee, e hai be di hai o nadau gau ala i golo, ala go digau hai mee dabu ne hagadili mai Aaron. King David, Zadok, Ahimelech, mo nia dagi o nia madahaanau o digau hai mee dabu mo nia daangada o Levi e hai digau hagadootonu.