Viewing:

Taahili Manawa-gee Lamentations 2

Select a Chapter

Di hagaduadua a Dimaadua ang gi Jerusalem

xalephx - Aleph

1I lodo di hagawelewele o Dimaadua,

gei Mee guu gahu Zion gi bouli dongoeho,

gu oho gi daha dono madamada hagatau.

I di laangi o dono hagawelewele,

gei Mee guu hudu gi daha dono Hale Daumaha.

xbethx - Beth

2Dimaadua gu oho gi daha nia dama waahale hagalligi huogodoo o Judah,

gei guu wweu gi daha di abaaba o digau dauwa

ala nogo hagaloohi nia guongo aalaa,

gu hagatee tenua deelaa mo nadau dagi.

xgimelx - Gimel

3I lodo dono hagawelewele, gei Mee gu oho nia mahi o Israel.

Mee guu huli gi daha mo gidaadou, e de hiihai e hagamaamaa gidaadou

i di madagoaa tadau hagadaumee ne dau i tadau baahi.

Mee gu hagawelewele huoloo mai gi gidaadou

gadoo be di ahi ma gaa dudu nia mee huogodoo.

xdalethx - Daleth

4Mee guu hai gadoo be tadau hagadaumee

ma ga lui mai ana amu mai gi gidaadou,

gei Mee gu daaligi digau huogodoo

ala nogo haga tenetene mo e haga manawa lamalia gidaadou.

Gidaadou gu longono dono hagawelewele damana i Jerusalem nei.

xhex - He

5Dimaadua gu haga huaidu Israel gadoo be dahi hagadaumee,

gu oho gi daha nia gowaa hai dauwa mo nia waahale o nia king,

guu wanga gi Judah di manawa gee dela dono hagaodi ai.

xwawx - Waw

6Mee gu oho haga ligiligi di Hale Daumaha,

di gowaa nogo daumaha ai gidaadou gi Mee,

gei Mee gu haga lawa nia laangi hagamadagu mono Laangi Sabad.

Nia king mo digau hai mee dabu gu longono e ginaadou

nia mahi o dono hagawelewele.

xzayinx - Zayin

7Di Tagi guu huli gi daha mo dono gowaa hai tigidaumaha,

gu diiagi dono Hale Daumaha,

gu dumaalia gi nia hagadaumee gi ohaa nia abaaba.

Digaula guu wwolo gi nua i tadau gowaa nogo tenetene ai,

nogo haihai tadau daumaha i mua.

xhethx - Heth

8Dimaadua guu hai bolo di abaaba o Zion la gi mooho gi lala.

Mee gu haganoho gii donu nia mee ala belee haga mooho hagatau.

Nia angulaa madaloohi mono abaaba ala i golo

guu tinga gi hongo di gelegele, gu mooho.

xtethx - Teth

9Nia ngudu di abaaba la gu i hongo di gelegele,

nia bontai baalanga la gu mooho dagidahi.

Nia king mono gau aamua guu hula gi daha gi nnenua o digau tuadimee,

tangada e kuulu gi taganoho ai,

gei nia soukohp e kae nadau moe mai baahi o Dimaadua ai.

xyodhx - Yodh

10Nia daane mmaadua o Jerusalem guu noho deemuu i hongo di gelegele.

Nia dogolia pigi gu i hongo nadau libogo,

digaula guu gahu gi nia gahu manawa gee.

Nia dama ahina guu pala nadau libogo gi hongo di gelegele.

xkaphx - Kaph

11Nia ngogo ogu golomada guu mmae i dogu dangidangi.

Dogu hagataalunga gu huaidu, gu ogu mahi ai

i lodo dogu manawa gee gi agu daangada ala gu hagamooho.

Nia dama mono dama lligi gu bobouli nadau golomada

i hongo nia ala o di waahale deelaa.

xlamedhx - Lamedh

12Digaula gu hiigai gei gu hieinu, e tangitangi gi nadau dinana.

Digaula guu tinga gi hongo nia ala, gadoo be digau gu moholehole,

gei gu mmade mai loo maalia i hongo nia lima o nadau dinana.

xmemx - Mem

13Go Jerusalem, dogu ihoo hagaaloho Jerusalem,

au e mee di helekai bolo aha?

Dehee dagu hai e mee di haga manawa lamalia goe?

Tangada ne hagaduadua beenei ai.

O haingadaa e damanaiee be di moana,

deai dahi mee e mee di hagadagadagagee ginai ai.

xnunx - Nun

14Au soukohp nadau mee e helekai adu gi di goe ai,

nia kai tilikai hua.

Nadau agoago gu halahalau goe,

i ginaadou digi hagamodongoohia adu o huaidu,

bolo goe gi hudee hai bolo goe e lui do manawa e huli hoou.

xsamekhx - Samekh

15Nia daangada ala e hula taalinga di waahale

e dadaumada hagahuaidu goe,

gu lialiagi nadau libogo mo di gadagada gi di mooho Jerusalem,

e helekai boloo, “Ma deenei di waahale humalia?

Deenei di waahale e haga tenetene henuailala?”

xayinx - Ayin

16O hagadaumee huogodoo e gadagada adu gi di goe

mo di haihai goe haga huaidu.

Digaula ga huli adu ga haganneennee boloo,

“Gimaadou gu haga mooho di maa!

Deenei di laangi nogo talitali go gimaadou!”

xpex - Pe

17Dimaadua gu haga gila aga ana mee ala ne hiihai bolo e hai.

Mee gu hagahuaidu gidaadou i dono hagalee dumaalia,

be dana hai dela gu hagi mai gi gidaadou i mua,

gu dumaalia gi tadau hagadaumee gi aali i gidaadou

gei gi tenetene gi tadau tingatinga.

xtsadhex - Tsadhe

18Jerusalem, dumaalia gi au abaaba gi tangi gi nua gi Tagi,

heia oo dangi gi malingi gadoo be di monowai i di boo mo di aa.

Hudee dugua au dangidangi i di manawa gee!

xqophx - Qoph

19Goe gii ala haga logo i di boo,

gii hai au dangidangi ang gi Dimaadua.

Goe gi dangidangi hagamahi i lala dono manawa dumaalia ang gi au dama,

go nia dama ala e mmade i hongo nia ala huogodoo i nadau hiigai!

xreshx - Resh

20Meenei Dimaadua, Goe e aha dela e hagaduadua gimaadou beenei?

Nia ahina guu gai nia huaidina o nadau dama ala nogo aloho ai!

Digau hai mee dabu mo nia soukohp gu daaligi gii mmade i lodo di Hale Daumaha.

xshinx - Sin ma Shin

21Digau mmaadua mono gau ala e lligi e mmoe mmoe i hongo nia ala.

Nia hulumanu dauwa o nia hagadaumee gu dadaaligi nia dama daane mono dama ahina.

Goe gu dadaaligi digaula i lodo do hagawelewele hagalee manawa dumaalia.

xtawx - Taw

22Goe gu gahi mai ogu hagadaumee bolo gi madagu au i nia baahi huogodoo,

e hai gadoo be dau hai ma gaa gahi digaula gi tagamiami,

hagalee tangada e lele gi daha mo do hagawelewele ai.

Digaula gu daaligi agu dama, ala nogo tomo aga ge aloho iei au labelaa.