Viewing:

Vhagi Buni Revelation 12

Select a Chapter

Satan Wo Ntɨɨrir Kov, Mbe Za Mbatɨgi.

Zon mbiga garav, kuruga bakɨme gangi.

1Gu mbaram gari harigi khesharigi bigeŋra kha buivar hɨgi. Mba bigeŋ khaŋ muuŋgi. Gu mbiga mbe garim, ana shaa shari fara muuŋgiap, ana sharigi. Gu kɨni garim, ana ana suani piin ki. Gu 12 thɨgi ŋkaa garim, nta khorshɨga fara muuŋgiap ana panan fegi. 2Mba ndavar ki mbik, mba ndavar ki tar ana mbuim, ana ana tɨr zav, ana zaa ndi. Ana maaŋ muuŋgiap, khɨrɨv, nzɨɨi. 3Gu wom garav, gu harigi khesharigi bigɨna mbe garim, ana buivar hɨgi. Mba bigɨn khaŋ muuŋgi. Gu kuruga hɨva ruma garim, ana ki. Ana harathɨgi pani kim, phɨkthɨgi koo anan pana bavira ki. Anan panin harathɨgi ŋgui vhɨrve gari guman pan fi khorshɨgi fara muuŋgi khorshɨgi bisaŋrire, anan panin fegi. 4Anan piiŋ mbu buivar ki ŋkaa, ana za nta biav, za nta fov, nuiana sui. Mbe kha buivar ki ŋkaa, mbe nta shɨgap, phɨna phuni khegenen mbarigi fara muuŋgi. Ana phɨna mbe, ana za ana fuav, nuiana suegi.

Mba kuruk mba tara tɨr za mbui mbiga nɨma thɨgi. Ana khueŋ nzuav mba mbigar rargi, ana mba tara tɨvara tharim, ana ana thuigirga. 5Mba mbik ŋguga ruagi. Mba tar, Fhe Bakɨme ana farasarigi. Ana aina mpiiŋsɨga suirav, khaŋ tɨgɨp ŋkasŋkagip, za kha nuianan ki gumgi gu mbigi ganɨv, mben kora muuŋgirga fhu. Mba mbik mba ŋguga ruagira thagim, mbe vhemkora mba tara ndiga nda vov, Fhe Bakɨme nɨman ana wo ŋgui vhɨrve gari guman pan pigi mpirmpirɨga nɨman vugi. 6Mba mbik, ana ra vov, gumgi ki fhuv ŋanen vugi. Mba ŋaneŋ Fhe Bakɨme ana nzuav bevahegi ŋanen ki. Mbe mba ŋanen, mbe 42 kɨnin, mbe mban anan nɨɨŋv, ana ganɨnga.

7Ana maaŋ kim, mbe ntigem Hevenan ntara bakɨme khavgi. Maiker won enserir kov, mbe mba kuruga bakɨme phorgɨp shogɨrga. Mba kuruga bakɨme won enserir kov, mbe ntara ŋgarkav, mbe phorgɨ shogɨrga. 8Mbe mba ntara kambarav, mbe mbevarga ŋkasŋka ki fhuvara. Maaŋ muuŋgiap, mbe wom fhura mbe ganɨrim, mbe Hevenan kegɨrga tuktɨgi fhuvara. 9Maaŋ muuŋgiap, Fhe Bakɨmen enseri, mbe mba kuruga bakɨme, mbe ana fekhɨngi, ana zergi. Ana mba fhum ki kuruk ma. Mbe kha zɨn ana kaai, Satan. Ana bunin, “Za Kha Nuianan Ki Gumgi Gu Mbigi Ga Si Guma” ma. Ana za kha nuianan ki gumgi gu mbigi guiguigim, mbe tɨvi mbatɨgi ga mbui guma ma. Mbe ana fekhɨngi, ana kha nuianan zergi. Mben ana enseri, mbe vhɨra mbe fuasuim, mbe vhɨra kha nuianan zergi.

10Gu mbararagim, guma kamthooŋ mbe Hevenan kav, khɨrɨv kaav, khaŋ nzuai, “Nza Fhe Bakɨme ntigem taagia nza ndigi. Ana ŋkasŋka, ana ntigem za kɨrar hɨgi. Ana ntigem nzan ŋgui vhɨrve gari guman pan ki. Ana taagip wo gumgi gu mbigi ndir zav kha guman farasarigi. Ana won zɨ bakɨme gum ŋkasŋka bakɨme ndi khɨvigi. Ne khaŋ muuŋgi, mba nza phorgɨp guigira Zisas khothɨgi gumgi gu mbigi bunin mbe sav, mbe nzuav nzuai guma, ana Fhe Bakɨme nɨman, ana ra gu maan buni mbe sav, mbe nzuai. Ana ntigem Fhe Bakɨmen enseri ana fega nɨɨŋ khɨngi. 11Nza phorgap guigira Zisas khothɨgi gumgi gu mbigi, mbe ntara mbuav, wari won pana guma kambarav, ana mbevigi. Mbe Sipsiva Ŋguga vɨzɨn gum mbe Fhe Bakɨme buna vhuueŋ bun nzuai, nen panan ana mbevigi. Mben pana guma mbe shogim, mbe vhɨzi, mbe nen rɨvi fhu. Mbe nzerara kha nuianan kɨrga ndɨkndɨk havhargi fhuvara. Mbe guigira Zisas khothɨgav, ana zɨn ŋgɨp, rɨmɨn zavra ki. 12Maaŋ muuŋgiap, nde Hevenan ki ntɨɨri, nde zam ndikndigɨri. Nde nuian gu mbasɨgar ki ntɨɨri, simtɨga bakɨme nden hɨr za mbui. Satan ŋkon han zergi. Ana guigira ndav shigi. Ne khaŋ muuŋgi, ana vhɨra kaŋgi, ana kha nuianan kɨrga tuga tɨvaneŋra.”

13Mba kuruk kaŋgim, mbe ana fega nuiana khɨngim, ana mba tara tegi mbiga zɨtɨgɨr zav, ana ndi gari. 14Mbe maaŋ muuŋgip baŋga bakɨme vhɨganin mba mbiga sararim, ana gegap, wo ŋaneŋ gumgi ki fhu ŋanen ŋgɨrga. Ana ŋgɨgɨp, mba kuruga thav, samra kɨrga. Ana mba ŋanen kɨrga, mbe tuituigip ana ganɨv, mban ana nɨɨŋv kɨrim, mpari mpuveni khegntɨrive fɨgeŋ phorgɨ vhɨzgirga. 15Mba kuruk mbara won kamthoon mbɨ ndi mbai. Mba mbɨ, ana mbɨ bakɨme fara muuŋgiap, mba mbiga zɨn vui. Mba kuruk khueŋ vuzvugi, mba mbɨ mba mbiga zɨn ŋgɨp, ana ndigi ŋgɨgɨrga. 16Nuian mba mbigar kurkurigi. Nuian fhomsɨgerim, mba kuruk mbai mbɨ, anan veri. 17Maaŋ muuŋgiap, mba kuruk, ana guigira mba mbiga nzuav ndav shigi. Ana maaŋ muuŋgiap vov, ana mba ki tari gu nzɨgi, ana mbe shogɨr za mbui. Mba gumgi gu mbigi, mbe Fhe Bakɨme nzuai tɨvi zɨn vov, Zisasan buna vhuueŋ bun nzuav, ana zɨn vui. 18Mba kuruk vov, mbasɨk taan thɨgav ki.