Viewing:

Kumbukumbu Deuteronomy 17

Select a Chapter

1“Sekemumulavile Mndewa Mulungu, Mulungu wenu, nhambiko ya ng'ombe hebu ng'hondolo yeli na chilema chochose, kwaviya mbuli iyo yomtenda Mndewa Mulungu, Mulungu wenu yehilwe.

2“One muhahulika muna dibululu dimwe mwa mabululu yenu kuwa kauko mulume hebu muke yotenda wihi haulongozi wa Mndewa Mulungu, Mulungu wenu, na kubena lagano jake, 3nayo kahita kusang'hanila milungu imwenga na kuitambikila, iviya katambikila zuwa hebu mwezi hebu nhondo hebu vinhu vimwenga va kuulanga viya vonivigomese, 4na mweye muhahulika mbuli izo, mwizalola goya, one ihawa kweli kuwa chinhu icho cha kutibusa chitendigwa Isilaili, 5mulaveni kunze ya dibululu munhu iyo na mumtowe na mabwe mbaka yadanganike. 6Munhu kodaha kukomigwa kwa ukalangama wa wanhu waidi hebu watatu. One mkalangama yahawa imwe, munhu iyo sekeyakomigwe. 7Wakalangama wezakwandusa kumtowa na mabwe, maabaho wanhu wamwenga nawo wezamtowa. Vino niivo vondamusegeze wihi kumwenu.

8“One wasemi wahapotwa kuhumiza mbuli ndala muna yamabululu yenu, fana viya mbuli ya kukoma bila kuilunga hebu mbuli ya kuibishila hebu mbuli ya kumulumiza imwenga, maabaho mwizasegela na kuhita hanhu hondayahasagule Mndewa Mulungu, Mulungu wenu. 9Uko mwizahita kwa wakulu wa nhambiko Walawi na msemi yeli muna isang'hano chipindi icho, mwizalonga mbuli haulongozi wawo, nawo wezahumiza. 10Maabaho mwizatenda fana vondawamulongeleni hanhu haja hondayahasagule Mndewa Mulungu, muiteganye mutende chila chinhu fana vondawamulagilizeni. 11Molondeka musondelele ndagilizi na ulamuzi wondawaulave kumwenu. Sekemuleke kutenda fana vowamulongeleni. 12Munhu yoyose yolema kumuhulika msemi hebu mkulu wa nhambiko yoyemile baho kumsang'hanila Mndewa Mulungu, Mulungu wenu, kolondeka yakomigwe, kwa kutenda ivo mwizasegeza wihi uwo mwa Waisilaili. 13Maabaho chila munhu kezahulika mbuli ino na kezadumba, habule munhu imwenga yoyose yondayageze kutenda ivo kaidi.

Malagilizo kusonhela mfalume

14“Vondamwingile muna iisi iyomwing'hani Mndewa Mulungu, Mulungu wenu, muihazi na kukala umo, maabaho mwizalonga, ‘Chizakwika mfalume kumwetu, fana zisi za banzi zose.’ 15Modaha kumwika mfalume yondayamsagule Mndewa Mulungu, Mulungu wenu. Mwizamwika imwe wa wakaya wayenu yawe mfalume wenu. Sekemumtende nyambenyambe yeli siyo mkaya miyenu yawe mfalume wenu. 16Mfalume kolondeka sekeyawe na vihongwe wengi, hebu sekeyawabweleze wanhu Misili muladi yapate vihongwe wengi, kwaviya Mndewa Mulungu kawazuma sekewabwele uko ng'o. 17Mfalume sekeyawe na wanaake wengi, buleivo kezamuleka Mulungu, hebu sekeyaipatile hela na zahabu nyingi. 18Vondayawe muna ichigoda chake cha chifalume, kolondeka yandike chitabu cha malagilizo yano haulongozi ha wakulu wa nhambiko Walawi. 19Chitabu icho kezakuwa nacho na kezachisoma siku zose za ugima wake, muladi yaifunze kumdumba Mndewa Mulungu, Mulungu wake. Yazindilile na kutenda mbuli zose za lagilizo dino na ndagilizi zino, 20muladi sekeyaigode kwa ndugu zake na kudika hakwe lagilizo dino kwa vovose. Maabaho yeye na welesi wake wezatawala siku nyingi muna iisi ya Isilaili.