Viewing:

ኬሲ ማፃኣፔ Exodus 5

Select a Chapter

ሙሴና ዓኣሮኔናኮ ካኣቲ ቤርቶ ሺኢኪፆ

1ዬካፓ ሙሴና ዓኣሮኔና ጊብፄ ዓጮ ካኣቲ ቤርቶ ዓኣዺ፦ «ዒስራዔኤሌ ፆኦዛሢ፥ ናንጊና ናንጋ ጎዳ ‹ዴራ ዓሲ ናንጉዋ ዳውሎ ዓኣዺ፥ ቦንቾ ኬሊ ጌሢ ታና ቦንቻንዳጉዲ ዴሮ ታኣኮ ሃሼ› ኔኤም ጋዓኔ» ጌዔኔ።

2ካኣቲ ማሃዖ፦ «ናንጊና ናንጋ ጎዳሢ ዎያዳይ? ዒዚ ታና ዓይሤም ዋይዚ ዒስራዔኤሌ ታ ሃሻሢ ዓይጎሮዳይ? ናንጊና ናንጋ ጎዳ ጎዖሢ ታኣኒ ዔሩዋሴ፥ ዒስራዔኤሌያ ታ ሃሻዓኬ» ጌዔኔ።

3ሙሴና ዓኣሮኔና ዒዛም፦ «ዔብሬ ዓሶኮ ፆኦዛሢ ኑኡም ጴዼኔ፤ ሃይሦ ኬሊ ጎይሢ ዓሲ ናንጉዋ ዳውሎ ዓኣዺ ኑ ፆኦዛሢ፥ ናንጊና ናንጋ ጎዳሢም ዒንጎ ባኣዚ ኑ ዒንጊ ካኣሽካንዳጉዲ ኑና ዳኬ ጌይ ኔና ኑ ዖኦጫኔ፤ ኑኡኒ ዬያ ማዺባኣታቶ ናንጊና ናንጋ ጎዳ ኑና ዖልዚና፥ ሃሣ ዶርዖና ጋፒሳንዳኔ» ጌዒ ኬኤዜኔ።

4ካኣቲ ዔያቶ ኮይላ፦ «ዒንሢ፥ ሙሴና ዓኣሮኔና ዋይዙዋቴ! ዴራ ማዾ ቤልፃዻንዳጉዲ ዒንሢ ኮዓሢ ዓይጎሮዳይ? ዴንዲ ዒንሢኮ ማዾ ማዹዋቴ! 5ዒንሢ ጊብፄ ዓጮ ዓሶይዳፓ ፓይዶና ኮሺ ዺቤኔ፤ ዬይ ዒንሢም ዻካዛ ዓሶ ማዾ ላኣጊ ሺራ ዒንሢ!» ጌዔኔ።

6ዬካፓ ዒማ ኬሎና ካኣቲ ፓኣሮኔ፦ ሚጪንቱዋዖ፥ ማዾ ማዺሳ ፑርታ ማዔ ጊብፄ ዓጮ ዓሶንታ ማዾ ማዺሻ ዒስራዔኤሌ ዓሶኮዋ ሱኡጎናም፦ 7«ፁኡቤ ኮሾንዶ ፑቆ ዴሮም ዎንዳሲ ጎይፆ ዒንጊፖቴ፤ ዔያታ ፔኤሮ ፑቆ ዴንዲ ኮዒ ዔኮንጎ፤ 8ጋዓንቴ ቤርታ ዔያታ ማዣሢዳፓ ፔቴ ፁኡቤታዎ ፓጪሱዋዖ ማዢ ሺኢሻንዳጉዲ ዔያቶይዳ ዎልቃዹዋቴ፤ ‹ኑ ፆኦዛሢም ኑ ዒንጎ ባኣዚ ዓኣዺ ዒንጊ ካኣሽካንዳጉዲ ኑና ሃሼ› ዔያታ ጌዒ ጌዒ ታና ሜታሳሢ ሚርጌ ማዻ ባኣዚ ባኣሢሮኬ፤ 9ሉኡዚ ሃይሴ ዋይዛ ዎዴ ዔያቶም ጴዹዋጉዲ፤ ሃሣ ቤርታ ዔያታ ማዻሢፓ ባሼ፥ ሃውሾባኣያ፥ ዶዲ ማዾ ዔያቶ ማዺሹዋቴ» ጌዒ ዓይሤኔ።

10ዬካፓ ሚጪንቱዋዖ ማዾ ማዺሳ ፑርቶ ጊብፄ ዓጮ ዓሶንታ ዒስራዔኤሌ ዓሶኮ ሱኡጎንታ ዓኣዺ ዒስራዔኤሌ ዴሮም፦ «ሃካፓ ሴካ ፑቃ ዒንሢም ዒንጊንቱዋጉዲ ካኣቲ ላኣጌኔ፤ 11ዓካሪ፥ ዒንሢ ዒንሢሮ ዴንዲ ዓንካፓታቶዋ ኮዒ ዔኪ ዬዓንዳያ ኮይሳኔ፤ ጋዓንቴ ዒንሢ ማዣ ፁኡቦኮ ሚርጉማ ዎንዳስካፓ ፓጫንዳያ ኮይሱዋሴ» ጌዔኔ። 12ዬያሮ ዴራ ፑቆ ኮዒ ዔኪ ዬዓኒ ጊብፄ ዓጮ ቢያ ዴንዴኔ። 13ሚጪንቱዋ፥ ማዾ ማዺሳ ዓሳ፦ ቤርታ ፑቆ ዒንጋዛ ዔያታ ማዢ ሺኢሻማ፤ ዒማ ፓይዶ ኩንሢ ሺኢሻንዳጉዲ ዒስራዔኤሌ ዓሶ ሜታሲሢ ዓርቄኔ። 14ዬያታ ሚጪንቱዋዖ ማዾ ማዺሺሳ ፑርቶ ጊብፄ ዓጮ ዓሳ ማዾ ማዻ ዒስራዔኤሌ ዓሶኮ ሱኡጎ፦ «ቤርታ ማዢሳሢጉዴያ ፁኡቦ ማዢሲ ዒንሢ ሺኢሹዋኣሢ ዓይጎሮዳይ?» ጌዒ ጌዒ ጳርቃኔ።

15ማዾ ማዻ ዒስራዔኤሌ ዓሶኮ ሱኡጋ ካኣቲ ቤርቶ ሺኢካዖ፦ «ካኣቲዮ! ኑና ኔ ዓይሎ ዑፆይዳ ዓይጋ ሃያ ቢያ ባኮ ኔ ዴኤፂሴይ? 16ፔቴታዖ ፑቃ ኑኡም ዒንጊንቱዋንቴ ፁኡቦ ኑ ማዣንዳጉዲ ዓይሢንቴኔ፤ ሃሣ ጊንሣ ዬያይዳ ኑ ጳርቂንቲ ጳርቂንቲ ዓኣኔ፤ ዻቢንታ ኑ ጊዳፓቱዋንቴ ኔ ዴሮፓኬ» ጌዒ ሜቶ ፔኤሲ ኬኤዜኔ።

17ካኣቲ ዔያቶም፦ «ዒንሢ ማዾ ናሽኩዋያ ቤልፃ ዓሲኬ፤ ‹ኑኡኒ ዴንዲ ናንጊና ናንጋ ጎዳም ዒንጎ ባኣዚ ዒንጊ ካኣሽካንዳኔ፥ ኑና ሃሼ› ጌዒ ዒንሢ ዖኦጫሢያ ዬያሮኬ፤ 18ሃሢ ዴንዲ ማዾ ማዹዋቴ፤ ፔቴታዖ ዒንሢም ፑቃ ዒንጊንታዓኬ፤ ጋዓንቴ ቤርታ ዒንሢ ማዣ ፁኡቦጉዴያ ማዢ ማዢ ዒንሢ ሺኢሻንዳያ ኮይሳኔ» ጌዔኔ። 19ማዾ ማዻ ዒስራዔኤሌ ዓሶኮ ሱኡጋ ቤርታ ዔያታ ማዣ ጎይፆጉዴያ ፁኡቤ ኬላ ኬላ ማዣንዳያ ኮይሳሢ ዔሬ ዎዶና ሜቶይዳ ዔያታ ኬዴሢ ዴንቄኔ።

20ካኣቲ ቤርታፓ ዔያታ ኬስካዖ ዔያቶ ካፒ ዓኣ፥ ሙሴና ዓኣሮኔና ዴንቂ፦ 21«ካኣቲ ፓኣሮኔንታ ዒዛና ዎላ ማዻ ዼኤፖ ዓሶንታ ቤርታ ኑ ዒፂንቴያ ማዓንዳጉዲ ማሂ፤ ሃሣ ጬንቻ ዓፓሮናኣ ኑና ዔያታ ዎዻንዳጉዲ ማሄሢ ዒንሢታሢሮ ናንጊና ናንጋ ጎዳ ዒንሢ ማዾ ዛጎንጎ! ዒዚ ዎጎንጎ!» ጌዔኔ።

ሙሴ ፆኦሲ ባንሢ ዒላቴ ዒላቶ

22ሙሴ ጊንሣ ናንጊና ናንጋ ጎዳ ኮራ፦ «ናንጊና ናንጋ ጎዳሢዮ! ሃያ ዴሮ ዑፆይዳ ሃያጉዴ ሜቶ ኔ ሄሊሳሢ ዓይጎሮዳይ? ያዺ ማዔቶ ታና ኔ ሃካ ዓይጎሮ ዳኬይ? 23ኔ ኬኤዛ ባኮ ታኣኒ ኬኤዛኒ ካኣቲ ኮይላ ሙኬማፓ ዓርቃዖ ዒዚ ሃያ ዴሮይዳ ዑሣ ዓኣዼ ሜቶ ዔኪ ዬዔኔ፤ ኔኤኒያ ሃያ ዴሮ ዓውሳኒ ማሊ ኮዒባኣሴ ጌይሢኬ» ጌዔኔ።