Viewing:

ኮኦኪንሢ ማፃኣፔ Proverbs 17

Select a Chapter

1ዑራና ማርሞና ሚርጌ ማኣሪዳ

ጊኢጊሾና ዼኤፒ ሙኡዚሮ ዴይሢፓ

ኮሹሞ ዓኣ ማርካ ሜልዚ ላኣዳ ቡርሺሢ ሙይሢ ቃራኬ።

2ማኣሮ ዓዶ ማዒ ዎይሣሢኮ ናዓ ፓሡዋያ ቦኦዛ ማዔቴ

ዓይሌ ማዒ ማዻ ጪንጮ ዓሲ ፔ ጎዳ ናዖኮ ዑሢ ማዓኔ፤

ዬያ ናማኮ ጌርሲንሢጉዲ ዓዶ ባኮ ዻካላያ ማዓኔ።

3ዎርቄና ቢራና ታሚዳ ሼኤሺ ዶዱሞ ዔሮሢጉዲ

ናንጊና ናንጋ ጎዳ ዓሲኮ ዒኔ ዬያይዲ ዛጋኔ።

4ፑርታ ዓሲ ፑርታ ባኣዚ ዋይዛኔ፤

ሉኡዚ ዓሲያ ሉኡዙሞ ባኣዚ ዒናፓ ዋይዛኔ።

5ማንቆ ዓሶ ኔኤኒ ቶኦቻያ ማዔቴ

ዔያቶ ማዤ ጎዳ ጫሽኪሢ ማዓኔ፤

ሜሌ ዓሲ ዑስካ ሄላ ሜቶና ኔኤኒ ዎዛዻያ ማዔቴ

ኔኤኒያ ሜቶ ዔካንዳኔ።

6ጋርቾ ዓሳ ፔኤኮ ናኣቶኮ ናኣቶና ሄርሺንታሢጉዲ

ናኣታኣ ፔኤኮ ዓዶንሢና ሄርሺንታኔ።

7ዔኤያ ዓሲ ዔራቶ ጌኤሲ ጌስቱዋሴ፤

ቦንቺንታ ዓሲ ሃሣ ሉኡዙሞ ጌኤሲ ጌስታያቱዋሴ።

8ፔቴ ፔቴ ዓሶም ዴሚና ዒንጎ ሚኢሼ ዓዳ ማርሻጉዲ ማዻያ ማላኔ፤

ዴሚና ዒንጎ ሚኢሼ ዒንጊሢና ቢያ ባካ ኑኡም ጊኢጋንዳኔ ጌይ ዔያታ ጉሙርቃኔ።

9ዻቤሢም ዓቶም ጋዓሢ ላጋቶ ዶዲሻኔ፤

ዻቢንቲ ማሂ ማሂ ኬኤዛ ዓሲ ጋዓንቴ ፔኤኮ ዑኬ ላጋሢ ሴካ ዳካኔ።

10ዔኤያ ዓሲ ፄኤታ ማይንቲ ዢራፓና ጳርቂንቲ ዔኤቢ ዔራያይዳፓ

ማሊ ጶቂሣ ዓሲ ፔቴይዳፓ ዓኣዹዋያና ጎሪ ዞሮ ዞሮና ዔራሢ ባሻያኬ።

11ፑርታ ዓሲ ቢያ ዎዴ ዋይዚ ዒፃያኬ፤

ዬያሮ ዒዛም ማኣሪሢ ዔሩዋ ኪኢታ ዓሲ ዳኪንታኔ።

12ዔኤያ ዓሲ ዔኤዩሞ ማዾ ማዻንቴ ካኣሚሢፓ

ናይ ዔውቴ ዲቤ ጌይንታ ቦዖና ካኣሚፃ ቃራኬ።

13ኮሺ ባኣዚ ማዺንቴንቴ ፑርታ ባኣዚ ማሃሢኮ

ፑርታ ባኣዚ ቢያ ዎዴ ማኣራፓ ሺኢኩዋሴ።

14ዑራ ማዢሢ፦ ቃዚ ዴይሦና ዋኣሢ ዑሪሢጉዲኬ፤

ዬያሮ ዑራ ማዢንታንዳሢኮ ቤርታ ማርሞ ሃሼ።

15ጌኤሺ ዓሲ ፑርታ ማሂ ዎጊሢንታ

ዻቢንቴ ዓሲ ጌኤሺ ማሂ ዎጊሢንታ

ዬንሢ ላምዖ ባኮ ናንጊና ናንጋ ጎዳ ዒፃ ማዾኬ።

16ዔኤያ ዓሲኮ ማዢንቲፓ ዓርቃዖ ማሊ ጶቂሥሢ ማሊሢ ባኣሢሮ

ፔኤኮ ሚኢሾ ዔራቶ ሻንቃኒ ኬሴያታቴያ ዬይ ዒዛ ማኣዳንዳ ባኣዚ ባኣሴ።

17ላጌ ዓይጎ ዎዴናታቴያ ፔ ላጋሢ ናናሽካኔ፤

ጌርሲንሢ ማዒ ሾይንታሢያ ሜቶ ዎሊኮ ኬዳኒኬ።

18ማሊ ጶቂሥሢ ፓጬ ዓሲ ዔሩዋ ዓሲኮ ጋሌ ጪጋኒ ጫኣቃኔ፤

ፔና ዋኣሴ ማሂያኣ ሺኢሻኔ።

19ዑራ ናሽካሢ ጎሜ ናሽካኔ፤

ዼጊዲ ኮሾና ማርሻ ካራጉዲ ፔና ዼጊሳ ዓሲ ሎኦሚሢ ዔኤላኔ።

20ፑርታ ማላ ዒኔና ዓኣ ዓሲም ጊኢጋ ባኣዚ ባኣሴ፤

ጌሺሢ ጌኤሲ ጌስታ ዓሲያኣ ሜቶይዳ ሎኦማኔ።

21ቤልፃ ናይ ሾዔ ዓሲ ዖዖያኔ፤

ፑርታ ናይ ዓዶኮ ዎዛ ባኣሴ።

22ዎዛዻያ ማዒሢ ዒኔም ኮሺ ዼኤሻኬ፤

ዖዪሢ ጋዓንቴ ዓሲኮ ዎልቄ ባይዛኔ።

23ፑርታ ዓሲ ዎጌ ዎቢሳኒ

ዴሜና ዒንጎ ሚኢሾ ዔካኔ።

24ማሊ ጶቂሣ ዓሲ ፔ ዓኣፖ ካሮ ዔራቶ ባንሢ ሺርሻኔ፤

ዔኤያ ዓሲኮ ዓኣፖ ካራ ጋዓንቴ ቢያ ዛሎ ጉሪ ሊሲ ሊሲ ዛጋኔ።

25ቤልፃ ናይ ፔ ዓዶ ዖዪሢዳ ጌልዛኔ፤

ፔ ዒንዶማኣ ፑርታ ማሊሢ ዔኪ ሙካኔ።

26ጌኤሺ ዓሲ ዻቦ ጪጊሺሢ፤

ሃሣ ጊንሣ ቦንቺንታ ዓሲ ዢራፓና ጳርቂሲሢ ኮይሳያቱዋሴ።

27ጌኤዞ ፔኤኮ ቃዚ ጌስታሢ ዔራኬ፤

ታሣ ማሊሢ ዓኣ ዓሲ ማሊ ጶቂሣ ዓሲኬ።

28ዔኤያ ዓሲ ዚቲ ጋዓዛ ዔራ ዓሲ ማላኔ፤

ፔቴታዖ ዒዚ ጌስቱዋዖ ዓቴቴ ጪንጫ ዓሲ ማዒ ፓይዲንታኔ።