Viewing:

ኮኦኪንሢ ማፃኣፔ Proverbs 19

Select a Chapter

1ጌኤዛ ዎቦ ማዔ ፓሡዋ ዓሲዳፓ

ፒዜና ናንጋ ማንቆ ዓሲ ባሼኬ።

2ዔራቶ ጊዳ ቃሲንቲባኣንቴ ዶዲ ማዺሢ ማኣዳያቱዋሴ፤

ሩኡሪ ጳሽካ ዓሲ ጎይፆ ዻዻባኔ።

3ፔቴ ዓሲ ዒዛ ዔኤያቶና ባይሲንታ ዒዛ ሄላዛ

ዒዚ ጋዓንቴ ናንጊና ናንጋ ጎዳ ዑፃ ዻጋዻኔ።

4ዓሲ ፔ ቆሎና ሚርጌ ላጌ ማዣኔ፤

ማንቆ ዓሶኮ ጋዓንቴ ዔያቶኮ ዓኣ ዻኮ ላጎንሢታዖ ዔያቶይዳፓ ሃካኔ።

5ሉኡዙሞና ማርካዻ ዓሲ ሜቶ ዔኩዋዖ ዓቱዋሴ፤

ሉኡዙሞ ጌስታ ዓሲ ሜቶፓ ቶላዓኬ።

6ሚርጌ ዓሲ ቦንቺንታ ዓሲኮ ላጌ ማዓኒ ኮዓኔ፤

ዔኤቢ ዒንጋ ዓሲም ቢያሢ ዒዛኮ ላጌኬ።

7ማንቃሢ ዒዛኮ ጌርሲንሢታዖ ዒዛ ዒዒፃኔ፤

ዒዛኮ ላጋኣ ዒዛ ባሼና ሃኪሲ ዱማሳኔ፤

ዔያቶኮ ዒዚ ጊንፆ ሃንቲ ሺኢቂንቴቴያ ላጌ ዒዛኮ ባኣያ ማዓኔ።

8ዔራቶ ሻንቃ ዓሲ ፔና ናሽካኔ፤

ዔራቶ ኮሺ ዶዲሺ ዓርቃሢ ዖርጎጫኔ።

9ሉኡዙሞ ማርካዻ ዓሲ ሜቶ ዔኩዋ ዓቱዋሴ፤

ሉኡዙሞ ጌስታሢያ ባይሲንታ ሄላኔ።

10ዔኤያ ዓሲም ኮሺ ናንጊ ኮይሱዋሴ፤

ዓይሌ ማዔ ዓሳ ዔያቶ ዎይሣ ዓሶ ሺሪ ዎይሣያ ማዒፃ ዎዚ ፑርታይ?

11ጎሪንቲ ሼኔ ዓርቂ ቃዛሢ ማሊ ጶቂሥሢኬ፤

ዻቤ ዓሲም ዓቶም ጌይሢያ ዒኔና ዓኣ ዓሲ ማዒሢኬ።

12ካኣቲኮ ጎሪንቲ ዞቢ ጉዻጉዲ ዒጊቻያኬ፤

ካኣቶ ቤርታ ዓሲ ማዒ ጴዺፃ ጋዓንቴ

ማኣቲ ዓኣዒሳ ዖልኬጉዲኬ።

13ዔኤያ ናይ ፔ ዓዶ ባይሲንታይዳ ጌልዛኔ፤

ጎሪንቲ ሺራ ማቻ ፆዻ ማኣሪጉዲኬ።

14ፔቴ ዓሲ ማኣሪና ቆሎና ሾዔ ዓሶፓ ዻካላኒ ዳንዳዓኔ፤

ማሊ ጶቂሣ ማቾ ዒንጋሢ ጋዓንቴ ናንጊና ናንጋ ጎዳ ሌሊኬ።

15ቤልፁሞ ሃይቄያጉዲ ጊንዒሻኔ፤

ዬያሮ ቤልፃ ዓሲ ናናይዺንታኔ።

16ናንጊና ናንጋ ጎዳኮ ዓይሢፆ ካፓሢ ሼምፔና ናንጋኔ፤

ዒዛኮ ቃኣሎ ቶኦቻሢ ጋዓንቴ ባይቃኔ።

17ማንቆ ዓሲም ዒንጋሢ

ናንጊና ናንጋ ጎዳም ታልዔያ ማዓኔ፤

ናንጊና ናንጋ ጎዳኣ ዒ ማዼ ኮዦ ማዾ ዛሎ ጪጋኔ።

18ሃጊ ዔያታ ናኣቶ ዓኣንቴ ናኣቶ ኔኤኮ ሻርሼ፤

ኔ ሻርሺባኣቶ ጋዓንቴ ባይሲንታም ኔ ዔያቶ ዓኣሢ ዒንጌያ ማዓኔ።

19ኔጉዋዖ ዻጋዻ ዓሲ ዓኣቶ

ዒዛኮ ዻጎ ዛሎ ዒንጎ ባኮ ዴንቃንዳጉዲ ሃሼ፤

ፔቴና ሜታሢዳፓ ኬሳኒ ኔ ዒዛ ማሌያታቴ

ሜሌ ዎዴናኣ ዒማይዲፃ ኔኤኮ ዓታዓኬ።

20ዞሮ ኔ ዋይዜቴ፥ ሃሣ ዔራኒያ ናሽካያ ማዔቴ

ናንጊቤቃ ዔራቶ ዴንቂሢ ኔ ዓታዓኬ።

21ዓሲ ሚርጌ ባኣዚ ማሊ ቱካኔ፤

ማዺንቲ ኩማሢ ጋዓንቴ ናንጊና ናንጋ ጎዳ «ማዖንጎ» ጋዓዛኬ።

22ዓሲዳፓ ኮይንታማ ጉሙርቂንቲሢኬ፤

ሉኡዚ ዓሲ ማዒሢዳፓ ማንቆ ዓሲ ማዒሢ ባሼኬ።

23ናንጊና ናንጋ ጎዳ ኔ ዒጊጬቴ ናንጎ ሌዓ ኔኤኮ ዖዶቃኔ፤

ሜታ ኔና ሄሊባኣንቴ ዎዛዺ ኮሹሞና ኔኤኒ ናንጋንዳኔ።

24ፔቴ ፔቴ ዓሳ ኮሺ ቤልፃኬ፤

ሜሌዓቴም ዔያታ ዓንዳ ኩጮ ዳኬሢ

ማሂ ዔኪ ካሦ ኩኡሊፃ ዔያቶ ባባሻኔ።

25ቦሂ ዓማሊ ሺራ ዓሲ ኔኤኒ ሻርሼቴ

ዔኤያ ዓሲ ዬያ ዛጊ ጪንጫ ማዓኔ፤

ማሊ ጶቂሣ ዓሲ ጎሪ ኔ ዞሬቴ ባሼ ዔራቶ ቃሳኔ።

26ቦርሲሳያና ዻውሲሳያ ማዔ ናይ ፔ ዓዶ ላቢሳኔ፤

ፔኤኮ ዒንዶዋ ማኣራፓ ዳውሳኔ።

27ታ ናዓሢዮ! ዞሮ ታኣኮ ኔ ዋይዚባኣቴ

ኔ ዔራ ዔራቶታዖ ዑኬና ዋሊ ኔ ዻቢንታንዳኔ።

28ሜሌ ዓሲም ፑርታ ማዻኒ

ሉኡዙሞና ማርካዻ ዓሲ ዓኣቶ

ፒዜ ዎጌ ባይቃኔ።

ዋይዚ ዒፃ ዓሳኣ ፑርቱሞ ማዾ ሚርጊሻኔ።

29ቦሂ ዓማሊ ሺራ ዓሶም ፑርታ ዎጌ

ዔኤዮ ዓሶማኣ ዢራፓና ጳዺ ጊኢጊንቴኔ።