Viewing:

ኮኦኪንሢ ማፃኣፔ Proverbs 26

Select a Chapter

1ሻቺ ዖጎሢ ዓጊኒና፥ ዒርዚ ሃሣ ማኣሊ ቡሪሢና ኮይሱዋኣሢጉዲ ዔኤያ ዓሲም ቦንቾ ኮይሱዋሴ።

2ካፓ ሴካ ሃንጋ ባራናዖ ፔቴታዖ ሜቶ ኔጊዳ ሄሊሳኒ ዳንዳዑዋኣሢጉዲ ጉሪ ጋዳማ ፔቴታዖ ሜቶ ኔጊዳ ሄሊሳዓኬ።

3ፓሮ ጳርቂሢ፥ ባቁሎ ቢፃልቂሢ ኮይሳሢጉዲ ቤልፃ ዓሲም ጳዺ ኮይሳኔ።

4ፓሡዋ ዖኦጪሢ ኔና ዖኦጫ ዔኤያ ዓሲም፥ ኔኤኒያ ዒዛጉዲ ማዑዋጉዲ ማሂ ዒዛም ኬኤዚፖ።

5ጋዓንቴ «ታ ዔራኬ» ጌይ ሙኩዋጉዲ ዒዚ ዔኤያ ማዔሢ ፔጋሲ ዒዛም ማሂ ኬኤዜ።

6ዔኤያ ዓሲ ኪኢታሮ ዳኪሢ ፔ ቶኮ ቲቂሢጉዴያ፤ ሃሣ ዎዻ ዼኤሻ ዑሽኪሢጉዲኬ።

7ዔኤያ ዓሲኮ ኮኦኪንሢና ጌስቲፃ ዎቦ ዓሲ ዎቦ ቶኮና ሃንታሢጉዴያኬ።

8ዔኤያ ዓሲ ቦንቺሢ ሹቺ ዎራይዳ ዓይሢ ቱኪ ዎራኒ ማሊሢጉዴያኬ።

9ዔኤያ ዓሲኮ ኮኦኪንሢና ኬኤዚፃ ማሢንቴ ዓሲ ፔኤኮ ኩጫ ጫርጌ ዓንጊሢ ኬሳኒ ላባሢጉዴያኬ።

10ጎይሢና ዓኣዻ ዔኤያ ዓሲ፤ ጊንሣ ሃሣ ማሢንቴ ዓሲ ቢያ ማዾም ዔኪ ማዺሻ ሱኡጌ ዴንቄ ዓሲ ቢያ ሂኢሺና ዱካ ዓሲጉዲኬ።

11ፔኤኮ ዔኤያቶ ላሚ ላሚ ፔጋሲ ዻዋ ዔኤያ ዓሲ ፔ ጮኦሽኬ ጮኦዦ ጊንሣ ሙዓ ካኒጉዲኬ።

12ፔ ማሊፆና ዔራ ማዔያ ማላ ዓሢዳፓ ዔኤያ ዓሲኮ ሃጊ ማዓ ዎዛ ዓኣኔ። 13ቤልፃ ዓሲ፦ «ዞቢ ጎይፆይዳ ዓኣኔ፤ ኮሺ ዒጊቻ ዞቢ ዳልጎ ጎይፆይዳ ሃንታኔ» ጋዓኔ።

14ካሮ ሳንቃ ጳንጪንታ ዓንጎይዳ ሺራሢጉዲ ቤልፃ ዓሲ ፔኤኮ ሻኣሎይዳ ሴካ ሃንጋ ሺሪ ሺሪ ላሂሢ ሚርጊሻኔ።

15ፔቴ ፔቴ ዓሳ ኮሺ ቤልፃኬ፤ ሜሌዓቴም ዔያታ ዓንዳ ኩጮ ዳኬሢ ማሂ ዔኪ ካሦ ኩኡሊፃ ዔያቶ ባባሻኔ።

16ቤልፃ ዓሲ ጊዳያ ማዓ ላንካይ ዓሲ ማርካዻያፓ ዒዚ ባሼ ማሊ ጶቂሣ ዓሲ ማዔያ ዒዛም ማላኔ።

17ኔና ኮይሱዋ ባኣዚዳ ጌሊ ማርሚሢ ጎይሢና ዓኣዻ ካኒኮ ዋይዚ ዓርቂሢጉዲኬ።

18-19ዓሲ ጌሺጋፓ «ታ ዓማሊ ማዼኔ» ጋዓ ዓሲ ፑርታ ዖልዚ ዓንጋሞና ዓማላ ዣኣዦ ዓሲጉዲኬ።

20ሃንፂሌ ባኣቴ ታሚ ሃሃይቃኔ፤ ኬኤሴ ዓሲ ባኣቴ ዑራ ባይቃኔ።

21ቃኣጫ ቄንሢ፤ ሃንፂሌ ሃሣ ታሚ ዔኤሣሢጉዲ ዑራ ማዣ ዓሲ ዑራ ዳልጊሻኔ።

22ኬኤሴ ዓሲኮ ሃይሳ ዓኣሢ ሙኡዚጉዲ ኮሽኪ ኮሽኪ ኬዲ ዑፆኮ ጋሮ ጌላኔ።

23ዒኖ ጋሮና ፑርቱሞ ዓኣንቴ ዻንጎና ሺኢቲ ጌስታ ዓሲ ዙላ ሚዛጳ ቢራ ዓንጊ ሼኤሾናያና ቲሽኪ ሚዛጲሶና ዓጪፓ ኮሾና ሜሄጉዴያኬ።

24ጌኔ ዓሲ ዻንጋና ጌሻኔ፤ ፔኤኮ ዒኖና ጋዓንቴ ጌኖ ማሊፆ ሱካኔ። 25ዒዛኮ ዒና ዒሡሞና ኩሜያ ማዔሢሮ ጌሻ ዑኡሲና ኔና ዒ ሳልማሴቴ ዒዛ ጉሙርቂፖ፤ 26ዒዚ ፔኤኮ ዒፂፆ ዓኣቼያታቴያ ዒ ማዻ ፑርቶ ማዻ ዓሲ ቢያኮ ቤርታ ፔጋኣኬ።

27ሜሌ ዓሲም ፒሮ ፒራ ዓሳ ፔኤሮ ዬያና ዓርቂንታንዳኔ፤ ዓሶይዳ ዔያታ ኮላሲ ዳካ ሹዋ ማዒ ጊንሣ ዔያቶ ዳኣፃንዳኔ።

28ሉኡቃ ዓሲ ዒዚ ሉኡቂ ኬኤዛ ዓሶ ዒፃኔ፤ ሃሣ ጌኔ ማዾ ዔያቶም ማዻኔ።