Viewing:

ዓይኑሞ ማፃኣፖ Psalms 34

Select a Chapter

ዳውቴ ዓቤሜሌኬ ቤርቶ ዣኣዦ ማሊ ሙኬሢሮ ዳውሴም ዒ ጳሽካዖ ዓይናዼ ዓይኑሞ

ናንጊና ናንጋ ጎዳኮ ኮሹሞሮ ጋላቲንታ ጋላታ

1ታኣኒ ቢያ ዎዴ ናንጊና ናንጋ ጎዳ ጋላታኔ፤

ታ ዒዛ ጋላቴ ጎይሣ ዴዓኔ።

2ታኣኒ ታኣኮ ጉቤ ዒናፓ ናንጊና ናንጋ ጎዳና ሄርሺንታኔ፤

ዒኖ ሼሌዞንሢ ዬያ ዋይዚ ዎዛዻኔ።

3ሃኒ ሙኩዋቴ፥ ታኣና ዎላ ናንጊና ናንጋ ጎዳ ኑ ቦንቾም፤

ኑኡኒ ዎላ ሱንፆ ዒዛኮ ዼግ ዼጊዶም።

4ናንጊና ናንጋ ጎዳ ታና ማኣዳንዳጉዲ

ታኣኒ ኮዓዛ ዒ ታኣም ዋይዜኔ፤

ታ ዒጊጫ ባኮ ቢያይዳፓ ታና ዒ ዓውሴኔ።

5ዒዛ ባንሢ ዛጋ ዓሶኮ ቢያ ዓኣፖ ካራ ፖዔኬ፤

ፔቴታዖ ቦርሲንቲ ዔያታ ቦርሲንቱዋሴ።

6ሜታዺ ማኣዶ ኮዓ ዓሢ ዒላቴኔ፤

ናንጊና ናንጋ ጎዳኣ ዒዛኮ ዬያ ዋይዜኔ፤

ሜታሢዳፓኣ ቢያ ዒዛ ዓውሴኔ።

7ናንጊና ናንጋ ጎዳኮ ኪኢታንቻሢ

ፆኦሲ ዒጊጫ ዓሶኮ ዓጮ ማንጊ ዔቂ ካፓኔ፤

ዔያቶኮ ኮይላ ማዒ ፑርታ ሜቶይዳፓ ዓውሳኔ።

8ናንጊና ናንጋ ጎዳኮ ኮሹሞ ሂንዳ ዛጉዋቴ፤

ዒዛ ፔኤኮ ጊቲማ ማሃ ዓሳ ዓንጂንቴያኬ።

9ዒንሢ ዱማዼ ዓሳ ዒዛ ዒጊጩዋቴ፤

ናንጊና ናንጋ ጎዳ ዒጊጫ ዓሶም ፓጫ ባኣዚ ባኣሴ።

10ዞባ ካራ ባይዛኒና ናይዺንታኒያ ዳንዳዓኔ፤

ናንጊና ናንጋ ጎዳ ኮዓዞንሢም ጋዓንቴ

ኮሺ ባኣዚ ፔቴታዖ ፓጫዓኬ።

11ታ ናይዮቴ! ሃኒ ሙኪ ዋይዙዋቴ፤

ናንጊና ናንጋ ጎዳ ዒጊጮንዶ ጎይሢ ታ ዒንሢ ዔርዛንዳኔ።

12ዒንሢዳፓ ናንጊ ናንጋኒ ናሽካያና

ሚርጌ ዎዴ ኮሺ ባኣዚ ዛጋኒ ኮዓሢ ዖናዳይ?

13ያዺ ማዔቴ ዻንጎ ኔኤኮ ፑርታ ባኣዚ ጌስቱዋጉዲ ዓርቄ፤

ዒንዲርዛ ኔኤኮ ሉኡዙሞ ባኣዚ ጌስቱዋጉዲ ካፔ።

14ፑርታ ባኣዚዳፓ ሺኢኬ፤

ኮሺ ባኣዚ ማዼ፤

ኮሹሞ ኮዔ፥ ጊንፆማ ዒዞኮ ዓኣዼ።

15ናንጊና ናንጋ ጎዳሢኮ ዓኣፓ ፂሎንሢ ባንሢ ዛጋኔ፤

ዋያ ዒዛሲ ዒላቶ ዔያቶኮ ዋይዛኒ ቡሊንቴያኬ።

16ሳዓፓ ዔያቶ ማሊሲ ጶቂሣ ባኣዚ ባይዛኒ

ዓኣፓ ዒዛኮ ፑርቶ ማዻዞንሢዳኬ።

17ፂሎ ዓሳ ዒላታዛ ናንጊና ናንጋ ጎዳ ዋይዛኔ፤

ዔያቶኮ ዓኣ ሜታስካፓ ዒ ዔያቶ ዓውሳኔ።

18ናንጊና ናንጋ ጎዳ ዒኖ ሜቂ ማላዞንሢም ዑኬኬ፤

ካራ ባይቂ ማላዞንሢያ ዒ ዓውሳኔ።

19ፂሎ ዓሶኮ ሜታ ሚርጌኬ፤

ናንጊና ናንጋ ጎዳ ጋዓንቴ ዬያ ቢያይዳፓ ዔያቶ ዓውሳኔ።

20ዔያቶኮ ሜጌፆ ቢያ ዒ ካፓሢሮ

ዬያቶይዳፓ ፔቴ ሜጌሢታዖ ሜቁዋሴ።

21ፑርቶ ማዻ ዓሶ ፑርቱማ ዎዻኔ፤

ኮዦ ዓሶ ዒፃ ዓሳ ሜቶ ዛጋንዳኔ።

22ናንጊና ናንጋ ጎዳ ዒዛም ማዻዞንሢኮ ሼምፓሢ ዓውሳንዳኔ፤

ዒዛ ጉሙርቃ ዓሶ ፑርታ ባኣዚ ሄላዓኬ።