Viewing:

Ugubulo Revelation 5

Select a Chapter

Ikitabu na Mwanangoto

1Naho namuonaga yudya ekale mwe difumbi dya kiseuta mwo mkono wo kulume katoza kitabu kiwandikwe kosekose, naho kigeligwa maduha mfungate.

3. Kitabu na maduha mfungate
2Niyo naona mtumigwa ywa kwe mbingu mta udahi mkulu, akabilikiza kwa izwi kulu, “Niani awagilwe kunamatula maduha aya no kukigubula ikitabu?” 3Mna hakwandile na yeyose ukwo kwe mbingu na kwe isi na hasi ye isi adahaga kugubula kitabu hegu kukikaula mndani. 4Niyo nailisa kwa usungu kwaviya hakwandile mnt'hu aoneke kuwagilwa kugubula ikitabu na kukaula mndani mwakwe. 5Niyo yumwenga mwe wadya wadala anigamba, “Usekuila. Kaula, simba ywa kabila dya Yuda, ywo lukolo lwa Daudi, niye mhumi, naho yehe niye akudaha kunamatula yadya maduha mfungate no kukigubula kiya kitabu.”

6Niyo naona Mwanangoto kakimala hadya hagati he difumbi dya kiseuta andaga enga kachinjigwa, azungulukwe ni viya viumbwa ivi gima vine na wadya wadala. Andaga na mp'hembe mfungate hamwenga na meso mfungate, iyo niyo miuye mfungate ya Mnungu itumigwe mwe isi yose. 7Mwanangoto agendaga kukiguha kiya kitabu mwo mkono wakwe wo kulume wa yudya ekale mwe difumbi diya dya kiseuta. 8Eze akiguhe kiya ikitabu, viya viumbwa ivi ugima vine hamwenga na wadya wadala milongo miidi na wane wakefunamizaga mitwi yawe kubula hasi hameso ha Mwanangoto naho kila yumwenga andaga na sindamgunda hamwenga na viziga va zahabu vimemile ubani. Uwo wandaga ni malombezo ya want'hu wa Mnungu. 9Niyo watula wila wakagamba,

“Kuwagilwa weye kukiguha kitabu,

no kukigubula maduha vakwe.

Kwaviya nokuchinjigwa, naho kwa sakame yako kumkomboela Mnungu

want'hu mwe makabila na milosi yose na want'hu na isi zose.

10Kuwatenda kunda maseuta na walava nt'hambiko kwa ndima ya Mnungu ywetu,

naho nawaikaile isi.”

11Umwo nandile hakaula niyo neva izwi dya watumigwa wa kwe mbingu wabindile wingi, wazunguluke difumbi dye kiseuta, na wadya viumbwa wata ugima na wadya wadala, 12naho nawakakema kwa izwi kulu,

“Mwanangoto uchinjigwe, kawagilwa

kuhokela ludole na ugoli na ubala na udahi,

nt'hunyo no ukulu na nt'hogola!”

13Niyo neva kila kiumbwa kwe mbingu, na mwe isi na hasi ye isi hamwenga na mwe bahali, heiye, naho viumbwa vyose vimwe isi yose vikagamba,

“Kwa yudya ekale mwe difumbi dye Useuta hamwenga na Mwanangoto,

Uvikilwa na nt'hunyo no ukulu no udahi vinde kwakwe

ulo na ulo!”

14Viya viumbwa ivine ivi ugima niyo vagamba, “Taile!” Niyo wadya wadala wafunamiza mitwi yawe hasi no kuvika.