Viewing:

كِيتِسَيٍ Judges 19

Select a Chapter

قٍ حَاشِ بُنيَمِن بْشِ مَ

1مَنفّ يٌ مُ نُ نَ عِسِرَيِلَ بْشِ مَ نَ تّمُي. لٍوِكَ ندٍ، نَشَن نُ نَ عٍقِرَ مِ فٍيَيٍ يِرٍ، نَشَ كٌنيِ فِنّ ندٍ قٍن بّتّلّيمُ يُدَيَ بْشِ مَ. 2كْنْ نَ فِنّ نَشَ يّنّ رَبَ، عَ كٍلِ عَ شَ مْرِ شُن مَ، عَ سِفَ بّتّلّيمُ يُدَيَ بْشِ مَ عَ بَبَ شْنيِ. عَ تٌ كِكٍ نَانِ رَبَ نَا، 3عَ شَ مْرِ نَشَ سِفَ عَ يِرٍ عَلَكٌ عٍ شَ لَن قٍ كٍرٍن مَ. عَ شَ كٌنيِ قٌنِكٍ نَشَ عَ مَتِ، عٍ سِفَ سٌقَلٍ قِرِن قَرِ. نَ فِنّ نَشَ عَ رَ سٌ عَ بَبَ شْنيِ. نَ فِنّ بَبَ تٌ نَ شّمّ تٌ، عَ نَشَ عَ رَ سّنّ سّيوّ رَ. 4عَ بِتَنيِ نَشَ عَ مَكَنكَن، عٍ قَ لُ عَ شْنيِ شِ سَشَن. عَ نَشَ عٍ يِفِيَ عَ قَنيِ رَ.

5شِ نَانِ ندٍ، لٍوِكَ نَشَ كُرُن عَ شَ كٌتٍ يَءِلَن نَ، كْنْ عَ بِتَنيِ نَشَ عَ قَلَ عَ بّ، «عِ دّ عِبَ تَامِ رَ سِندٍن، وٌ قَ سِفَ.» 6عٍ نَشَ دْشْ، عٍ نَشَ عٍ دّفٍ يِرٍ كٍرٍن. نَ شَنبِ عَ بِتَنيِ نَشَ عَ قَلَ عَ بّ، «عِ شَ شِ بٍ تٌ كْي رَ. عِ شَ تِن نَ رَ عَلَكٌ عِ بْحّ شَ رَقَن عِ مَ.» 7نَ فِنّ شَ مْرِ نَشَ كٍلِ، عَ شَ سِفَ، كْنْ عَ بِتَنيِ نَشَ عَ كَرَشَن عَ شَ نَ كْي رَدَنفِ نَا.

8شِ سُولِ ندٍ، عَ مَن نَشَ كُرُن، عَ شَ سِفَ. عَ بِتَنيِ مَن نَشَ عَ قَلَ عَ بّ، «ﭑ بَرَ عِ مَيَندِ، عِ شَ عِ دّ عِبَ سِندٍن، عِ قَ سِفَ نُنمَرٍ رَ.» عٍ مَن نَشَ عٍ دّفٍ يِرٍ كٍرٍن. 9نَ شّمّ تٌ كٍلِ، عَ شَ سِفَ، عَ تَن نُن عَ شَ فِنّ، نُن عَ شَ قٌنِكٍ كٌنيِ، عَ بِتَنيِ مَن نَشَ عَ مَيَندِ، «عِ بَرَ عَ تٌ، كْي نَ سٌقٍ. وٌ شَ شِ بٍ تٌ، عِ بْحّ شَ رَقَن عِ مَ. تِنَ وٌ شَ كُرُن، وٌ شَ سِفَ وٌ شْنيِ.» 10نَ فِنّ شَ مْرِ مُ تِن نَ رَ. عَ نَشَ كٍلِ، عَ نُن عَ شَ فِنّ نَشَ دْشْ سٌقَلٍ قِرِنيِيٍ قَرِ، عٍ سِفَ يٍبُسُ بِرِ رَ، نَشَن قِندِشِ دَرِ سَلَمُ رَ. 11عٍ مَكْرّشِ يٍبُسُ رَ تّمُي نَشّ، نُنمَرٍ نُ بَرَ سٌ. يِ قٌنِكٍ كٌنيِ نَشَ عَ قَلَ عَ مَرِفِ بّ، «وٌن شَ تِ بٍ يٍبُسُ تَا كُي، وٌن شَ شِ بٍ.» 12عَ مَرِفِ نَشَ عَ يَابِ، «وٌن مُ سٌمَ تَا عِ سِ فبّتّ سَبَتِشِ دّننَشّ. وٌن شَ شِ عِسِرَيِلَ تَا ندٍ نّ فِبِيَ.» 13عَ مَن نَشَ عَ قَلَ عَ شَ قٌنِكٍ كٌنيِ بّ، «وٌن شّي، وٌن شَ سٌ فِبِيَ، شَ نَ مُ رَ مَ، وٌن شَ شِ مّننِ.» 14عٍ نَشَ حّرّ هَن سٌفٍ دُلَ تّمُي. عٍ نُ بَرَ مَكْرّ فِبِيَ رَ، بُنيَمِن بْنسْي شَ بْشِ مَ. 15عٍ نَشَ سٌ فِبِيَ، عٍ شَ شِ نَا. عٍ نَشَ تِ تَا تَفِ، كْنْ مِشِ يٌ مُ تِن عٍ يِفِيَدٍ.

16قٌرِ ندٍ، نَشَن كٍلِ عٍقِرَ مِ فٍيَيٍ مَبِرِ، كْنْ عَ نُ سَبَتِشِ فِبِيَ نّ، عَ نَشَ سٌ تَا كُي نُنمَرٍ، كٍلِقٍ وَلِدٍ شّ مَ. مّننِ مِشِيٍ تَن بُنيَمِن شَ دِيٍ نَن نُ عٍ رَ. 17نَ قٌرِ تٌ شْحّيٍ تٌ تَا تَفِ، عَ نَشَ عٍ مَشْرِن، «وٌ كٍلِشِ مِندٍن؟ وٌ سِفَقٍ مِندٍن؟» 18عٍ نَشَ عَ يَابِ، «مُشُ كٍلِشِ بّتّلّيمُ يُدَيَ بْشِ نَن مَ، مُشُ نَ سِفَقٍ عٍقِرَ مِ فٍيَيٍ مَ، ﭑ سَبَتِشِ دّننَشّ. ﭑ كٍلِشِ بّتّلّيمُ يُدَيَ بْشِ نَن مَ، ﭑ نَ سِفَقٍ عَلَتَلَ شَ بَنشِ، كْنْ ﭑ مُ يِفِيَ سْتْشِ سِندٍن. 19حٌوفٍ نُن بُرّشّ نَ مُشُ يِ مُشُ شَ سٌقَلٍ نَشَن دٌنمَ. تَامِ نُن وّنِ قَن نَ مُشُ يِ مُشُ نَشَن دٌنمَ، ﭑ تَن، ﭑ مَ فِنّ، نُن ﭑ مَ قٌنِكٍ كٌنيِ. سٍسٍ مُ لُشِ نَشَن مُ نَ مُشُ يِ رَ.» 20نَ قٌرِ نَشَ عَ قَلَ عَ بّ، «عَلَ شَ وٌ بْحّ سَ. ﭑ بَرَ وٌ يِفِيَ، وٌ مُ لُمَ تَا تَفِ تٌ كْي رَ.» 21عَ نَشَ عٍ شَنِن عَ شَ بَنشِ كُي، عَ حٌوفٍ سٌ سٌقَلٍيٍ يِ. بِيَاسِلَيٍ تٌ عٍ سَنيِيٍ مَشَ، عٍ نَشَ عٍ دّفٍ، عٍ نَشَ عٍ مِن.

22عٍ تٌ نُ نَ عٍ دّفٍقٍ، تَا مِشِ رَبّحِنشِيٍ نَشَ قَ، عٍ نَشَ بَنشِ بِلِن، عٍ نَادّ كْنكْن سّنبّ رَ. عٍ نُ قَ عَ قَلَ قٌرِ بّ، بَنشِ كَنيِ، «شّمّ نَشَن سٌشِ عِ شَ بَنشِ كُي، عَ رَ مِنِ عَلَكٌ مُشُ شَ يّنّ رَبَ عَ رَ.» 23بَنشِ كَنيِ نَشَ مِنِ، عَ عَ قَلَ عٍ بّ، «عَدٍ، ﭑ نفَشَكٍرٍنيِيٍ، وٌ نَشَ يِ قٍ حَاشِ رَبَ ﭑ مَ شْحّ رَ. ﭑ بَرَ وٌ مَيَندِ. يِ شّمّ بَرَ سٌ ﭑ شْنيِ، وٌ نَشَ يِ يُنُبِ شْنشِ رَبَ عَ رَ. 24ﭑ مَ دِ فِنّدِ مّدِ نَن يِ كِ، عَ نُن يِ شّمّ شَ فِنّ، ﭑ شَ نٍيٍ رَ مِنِ وٌ مَ، وٌ شَ وٌ وَشْنقٍ رَبَ عٍ رَ. كْنْ وٌ نَشَ نَ قٍ شْنشِ مْولِ رَبَ يِ شّمّ رَ.» 25يِ شّمّيٍ مُ تِن عٍ تُلِ مَتِدٍ عَ رَ. نَ كُي، شّمّ نَشَ عَ شَ فِنّ سُشُ، عَ عَ رَ مِنِ عٍ مَ تَندٍ. عٍ نَشَ عَ كٌلٌن فِنّ رَ، عٍ قَ عَ مَشِ نَ كْي بِرِن نَ هَن فّيسّفّ. كُيٍ تٌ عِبَ، عٍ نَشَ عَ بّحِن.

26سُبَشّ يِ فِنّ نَشَ قَ، عَ بِرَ بَنشِ دّ رَ، عَ شَ مْرِ يِفِيَشِ دّننَشّ. عَ نَشَ لُ نَا هَن فّيسّفّ. 27فّيسّفّ عَ شَ مْرِ نَشَ كٍلِ، عَ شَ سِفَ. عَ تٌ نَادّ رَبِ، عَ نَشَ عَ شَ فِنّ تٌ بَنشِ سٌدٍ دّ رَ، عَ بّلّشّ سَشِ نَادّ فٌنيِ مَ. 28عَ نَشَ عَ قَلَ عَ شَ فِنّ بّ، «وٌن شّي،» كْنْ عَ مُ عَ يَابِ. عَ نُ بَرَ قَشَ. نَ كُي عَ نَشَ عَ سَ عَ شَ سٌقَلٍ قَرِ، عَ سِفَ عَ شْنيِ. 29عَ تٌ سٌ عَ شْنيِ، عَ نَشَ قِنّ تٌنفٌ، عَ نَشَ عَ شَ فِنّ عِبٌلٌن عَ سَلٌنسٍيٍ مَ دْشْ قُ نُن قِرِن. عَ نَشَ نَ شُنتُنيِيٍ رَ سَنبَ عِسِرَيِلَ بْنسْي قُ نُن قِرِنيِيٍ مَ.

30نَشٍيٍ بِرِن نَ تٌ، عٍ نَشَ عَ قَلَ، «كَقِ عِسِرَيِلَكَيٍ نَشَ كٍلِ مِسِرَ بْشِ مَ، هَن تٌ، يِ قٍ حَاشِ مْولِ مُ نُ رَبَ سِندٍن. وٌن شَ لُ يِرٍ كٍرٍن، وٌ شَ نَتّ تٌنفٌ يِ شَ قٍ رَ.»