Viewing:

مَتِيُ Matthew 27

Select a Chapter

يُوِقِيٍ عِسَ شَنِنقٍ ثِلَتِ شْن

مَرَكِ ١٥‏؛١، لُكِ ٢٢‏؛٦٣ ٬ ٧١، يَيَ ١٨‏؛٢٨ ٬ ٣٢

1كُيٍ تٌ عِبَ، سّرّشّدُبّ كُنتِفِيٍ بِرِن نُن يُوِقِيٍ شَ قٌرِيٍ تٌ نُ مَلَنشِ، عٍ نَشَ نَتّ تٌنفٌ عٍ شَ عِسَ قَشَ. 2عٍ تٌ عِسَ شِرِ، عٍ نَشَ عَ شَنِن فٌمِنَ ثِلَتِ شْن.

يُدَ سِ شَ قَشّ

3يُدَ سِ، عِسَ يَنقَمَ، عَ تٌ عَ تٌ عٍ بَرَ عِسَ مَكِيتِ عَ لَن عَ شَ قَشَ، عَ نَشَ نِمِسَ عَ شَ يَنقَنتٍيَ شَ قٍ رَ. عَ نَشَ نَ فبٍتِ كٌلٍ تٌنفٌ سَشَن نَفبِلٍن سّرّشّدُبّ كُنتِفِيٍ نُن قٌرِيٍ مَ، 4عَ عَ قَلَ، «ﭑ بَرَ يُنُبِ رَبَ! شّمّ نَشَن قَشَمَ يِ كِ، سّنِيّنتْي نَن عَ رَ، عَ قَ لِ ﭑ تَن نَن عَ يَنقَشِ!» عٍ نَشَ عَ يَابِ، «نَ مُ مُشُ تَن مَتٌشِ. نَ عِ تَن نَن مَتٌشِ.» 5عَ تٌ فبٍتِ كٌلٍيٍ وٌلِ هْرْ مْبَنشِ كُي، يُدَ سِ نَشَ سِفَ عَ يّتّ فبَكُدٍ وُرِ كْن نَ. 6سّرّشّدُبّ كُنتِفِيٍ تٌ فبٍتِ كٌلٍيٍ مَتٌنفٌ، عٍ نَشَ عَ قَلَ، «عَ مُ دَشَ مُشُ شَ يِ فبٍتِ كٌلٍيٍ سَ هْرْ مْبَنشِ شَ كْبِرِ شُن مَ، بَرِ مَ نِي سَرٍ نَن عَ رَ.» 7عٍ تٌ وْيّن، عٍ نَشَ قّحّ يَءِلَنيِ شَ شّ يِرٍ سَرَ نَ كْبِرِ رَ، نَ شَ قِندِ فَبُرِ يِرٍ رَ شْحّيٍ بّ. 8نَ نَن عَ تٌشِ، هَن تٌ نَ شّ شِلِ قَلَمَ «وُلِ بْشِ.» 9نَ كُي، عَننَبِ يٍرٍ مِ شَ مَسٍنيِ نَشَ كَمَلِ، عَ تٌ عَ مَسٍن، «عٍ نَشَ فبٍتِ كٌلٍ تٌنفٌ سَشَن تٌنفٌ، عِسِرَيِلَكَيٍ ندٍيٍ سَرٍ نَشَن سَشِ عَ شُن، 10عٍ قّحّ يَءِلَنيِ شَ شّ سَرَ نَ كْبِرِ رَ، عَلْ مَرِفِ ﭑ يَمَرِ كِ نَشّ.»

عِسَ تِقٍ ثِلَتِ يَ عِ

مَرَكِ ١٥‏؛٢ ٬ ١٥، لُكِ ٢٣‏؛٢ ٬ ٥،١٣ ٬ ٢٥، يَيَ ١٨‏؛٢٨ ٬ ١٩‏؛١٦

11عِسَ تٌ تِ فٌمِنَ ثِلَتِ يَ عِ، فٌمِنَ نَشَ عَ مَشْرِن، «عِ تَن نَن قِندِشِ يُوِقِيٍ شَ مَنفّ رَ؟» عِسَ نَشَ عَ يَابِ، «عِ تَن نَن عَ قَلَشِ.» 12كْنْ سّرّشّدُبّ كُنتِفِيٍ نُن قٌرِيٍ نُ عَ تْوحّفّمَ تّمُي نَشّ، عِسَ مُ يَابِ يٌ قِ. 13نَ تّمُي ثِلَتِ نَشَ عَ مَشْرِن، «عِ مُ يِ قٍيٍ مّشِ عٍ نَشَن بِرِن سَقٍ عِ شُن مَ يِ كِ؟» 14كْنْ عِسَ مُ عٍ شَ وْيّنيِ يٌ يَابِ. نَ نَشَ فٌمِنَ كَابَ كِ قَنيِ.

15حّ يٌ حّ، سَلِ تّمُي، فٌمِنَ دَرِقٍ نَن نُ عَ رَ، عَ شَ فٍيلِمَنِ كٍرٍن نَبّحِن حَمَ بّ، عٍ نَ وَ نَشَن يٌ شْن. 16نَ وَشَتِ، فٍيلِمَنِ ندٍ نُ نَ، بِرِن نُ نَشَن كٌلٌن عَ شَ حَاشُحَ مَ. عَ نُ شِلِ بَرَبَسِ. 17حَمَ تٌ مَلَن، ثِلَتِ نَشَ عٍ مَشْرِن، «وٌ وَ مَ ﭑ شَ ندٍ رَبّحِن وٌ بّ، بَرَبَسِ بَ، كَ عِسَ، نَشَن شِلِ قَلَمَ عَلَ شَ مِشِ سُفَندِشِ؟» 18ثِلَتِ نُ عَ كٌلٌن عَ سّرّشّدُبّ كُنتِفِيٍ نُ عِسَ سَشِ عَ بّلّشّ تْونّ نَن مَ. 19بَ نَ رَ، عَ تٌ نُ دْشْشِ كِيتِ سَدٍ، عَ شَ فِنّ نَشَ شّيرَ رَ سِفَ عَ مَ، عَ عَ قَلَ عَ بّ، «عِ نَشَ سٌ يِ تِنشِنتْي شَ قٍ كُي قٍقٍ مَ، بَرِ مَ ﭑ بَرَ شِيٍ سَ عَ شَ قٍ رَ، شِيٍ نَشَن بَرَ ﭑ تْورْ تٌ كِ قَنيِ.»

20كْنْ سّرّشّدُبّ كُنتِفِيٍ نُن يُوِقِيٍ شَ قٌرِيٍ نَشَ حَمَ كُي عِسٌ عٍ شَ بَرَبَسِ مَشْرِن ثِلَتِ مَ، عِسَ تَن شَ قَشَ. 21فٌمِنَ مَن نَشَ عٍ مَشْرِن، «يِ مِشِ قِرِن يَ مَ، وٌ وَ مَ ﭑ شَ مُندُن نَبّحِن وٌ بّ؟» عٍ نَشَ عَ يَابِ، «بَرَبَسِ!» 22ثِلَتِ قَن نَشَ عٍ مَشْرِن، «ﭑ شَ مُنسٍ رَبَ عِسَ رَ، نَشَن شِلِ قَلَمَ عَلَ شَ مِشِ سُفَندِشِ؟» حَمَ بِرِن نَشَ عَ يَابِ، «عَ بَنبَن وُرِ مَفَلَنبُشِ مَ!» 23عَ مَن نَشَ عٍ مَشْرِن، «مُنقٍ مَ؟ عَ قٍ حَاشِ مُندُن نَبَشِ؟» كْنْ عٍ تَن سْنشْي نَن تُن شُن مَسَ، «عَ بَنبَن وُرِ مَ!»

24ثِلَتِ تٌ عَ تٌ عَ عَ مُ نْشِ قٍقٍ رَ، حَمَ قَن نُ وَشِ كٍلِقٍ عَ رَ، عَ نَشَ يٍ تٌنفٌ، عَ عَ بّلّشّ رَشَ عٍ يَ شْرِ، عَ عَ قَلَ عٍ بّ، «يِ شّمّ قَشَقٍ مُ نَ ﭑ تَن مَ دٍ! عَ لُمَ وٌ تَن نَن مَ.» 25حَمَ بِرِن نَشَ عَ يَابِ، «عَ شَ قَشّ وُلِ شَ لُ مُشُ نُن مُشُ شَ دِيٍ شُن مَ!» 26نَ كُي، ثِلَتِ نَشَ بَرَبَسِ رَبّحِن عٍ بّ. عَ نَشَ يَامَرِ قِ سْورِيٍ شَ عِسَ بْنبْ سّبّرّ رَ. نَ شَنبِ، عَ نَشَ عِسَ سٌ عٍ يِ عٍ شَ سَ عَ بَنبَن وُرِ مَفَلَنبُشِ مَ.

سْورِيٍ عِسَ مَيٍلٍقٍ

مَرَكِ ١٥‏؛١٦ ٬ ٢٠، يَيَ ١٩‏؛٢ ٬ ٣

27رْ مَ سْورِيٍ تٌ عِسَ شَنِن فٌمِنَ شْنيِ، عٍ نَشَ عٍ بٌورٍ سْورِيٍ بِرِن شِلِ، عٍ فَلِ نَشَ تِ عَ رَبِلِنيِ. 28عٍ نَشَ عِسَ شَ سٌسٍ بَ عَ مَ، عٍ مَنفّ فُبَ فبٍيلِ رَفٌرٌ عَ مَ. 29عٍ نَشَ تُنبٍيٍ مَقِلِن، عٍ عٍ يَءِلَن مَنفّ كَتَنيِ مَنِيّ رَ، عٍ عَ سَ عَ شُن مَ. عٍ نَشَ وُرِ رَ سٌ عَ يِرٍقَنيِ بّلّشّ كُي، عٍ عَ مَيٍلٍ، عٍ نُ عٍ شِنبِ سِن عَ بُن مَ، عٍ نُ عَ قَلَ، «عِ كّنَ، يُوِقِيٍ شَ مَنفّ.» 30عٍ نَشَ دّيٍ بْشُن عَ مَ، عٍ نَ وُرِ بَ عَ يِ، عٍ نُ عَ شُنيِ بْنبْ عَ رَ. 31عٍ تٌ فّ عِسَ مَيٍلٍدٍ، عٍ نَشَ مَنفّ فُبَ رَتٍ عَ مَ، عٍ عَ فبٍ دُفِ رَفٌرٌ عَ مَ، عٍ قَ عَ رَ مِنِ عٍ شَ سَ عَ بَنبَن وُرِ مَفَلَنبُشِ مَ.

عِسَ بَنبَنقٍ وُرِ مَفَلَنبُشِ مَ

مَرَكِ ١٥‏؛٢١ ٬ ٣٢، لُكِ ٢٣‏؛٢٦ ٬ ٤٣، يَيَ ١٩‏؛١٧ ٬ ٢٧

32عٍ تٌ نُ مِنِقٍ تَا رَ، عٍ نَشَ سِرٍنِكَ شّمّ ندٍ تٌ نَشَن نُ شِلِ سِمْن. سْورِيٍ نَشَ عَ يَمَرِ، عَ تَن شَ عِسَ شَ وُرِ مَفَلَنبُشِ شَنِن. 33عٍ تٌ يِرٍ لِ نَشَن شِلِ فٌلٌفٌتَ، نَ نَن قَلَشِ عٍ شَ شُي، «شُنكٌنكٌتَ يِرٍ،» 34عٍ نَشَ وّنِ سٌ عَ يِ، سٍرِ سَشِ نَشَن شُن، كْنْ عَ تٌ عَ نّمُننّمُن، عَ مُ تِن عَ مِندٍ.

35عٍ تٌ فّ عَ مَبَنبَندٍ وُرِ مَ، عٍ نَشَ كَندَ بُن عَ شَ دُفِيٍ شَ قٍ رَ، عَلَكٌ عٍ شَ عَ كٌلٌن كَنكَن نَشَن سْتْمَ. 36نَ دَنفِ شَنبِ، عٍ نَشَ دْشْ عَ كَنتَدٍ.

37عٍ تٌ نُ وَ مَ بِرِن شَ عَ كٌلٌن عٍ عَ بَنبَنشِ قٍ نَشَن مَ، عٍ يِ سّبّلِ نَن فبَكُ عَ شُن مَ، «عِسَ نَن يَ، يُوِقِيٍ شَ مَنفّ.» 38نَ تّمُي، عٍ نَشَ سُوتٍ مِشِ قِرِن قَن بَنبَن وُرِ مَفَلَنبُشِيٍ مَ عِسَ قّ مَ، كٍرٍن عَ يِرٍقَنيِ مَ، بٌورٍ عَ كْولَ مَ.

39مِشِيٍ نُ دَنفِمَ عِسَ كٌنبِ رَ، عٍ نُ عٍ شُنيِ لِنتَن عَ مَ، 40عٍ عَ قَلَ، «عِ تَن نَشَن هْرْ مْبَنشِ رَبِرَ مَ، عِ مَن قَ عَ تِ شِ سَشَن بُن مَ، عِ يّتّ رَكِسِ! شَ عَلَ شَ دِ نَن عِ رَ، فٌرٌ وُرِ كْن نَ!» 41سّرّشّدُبّ كُنتِفِيٍ، سّرِيّ كَرَ مْشْيٍ، نُن يُوِقِيٍ شَ قٌرِيٍ قَن نُ عَ مَيٍلٍقٍ، عٍ نُ عَ قَلَ، 42«عَ بَرَ مِشِ فبّتّيٍ رَكِسِ، كْنْ عَ مُ نْمَ عَ يّتّ تَن نَكِسِدٍ. عِسِرَيِلَ مَنفّ شَ مُ عَ رَ؟ عَ شَ فٌرٌ وُرِ كْن نَ بٍ يَ، عَلَكٌ مُشُ شَ لَ عَ رَ. 43عَ بَرَ عَ شَشِلِ تِ عَلَ رَ، عَ مَن قَ عَ قَلَ، ‹ﭑ قِندِشِ عَلَ شَ دِ نَن نَ.› يَكْسِ، شَ عَ رَقَنشِ عَلَ مَ، عَ شَ عَ رَكِسِ!» 44سُوتٍ نَشٍيٍ نُ بَنبَنشِ عَ قّ مَ، عٍ قَن نُ عِسَ كٌنبِقٍ نَ كِ نّ.

عِسَ شَ قَشّ

مَرَكِ ١٥‏؛٣٣ ٬ ٤١، لُكِ ٢٣‏؛٤٤ ٬ ٤٩، يَيَ ١٩‏؛٢٨ ٬ ٣٠

45يَنيِ تَفِ، دِ مِ نَشَ سِن بْشِ بِرِن مَ لّيرِ سَشَن بُن مَ. 46نَ وَشَتِ مَ، عِسَ نَشَ فبٍلٍفبٍلٍ سّنبّ رَ، «عٍلٌيِ، عٍلٌيِ، لّمَ سَبَشَتَنِ؟» نَ نَن قَلَشِ عٍ شَ شُي، «ﭑ مَرِفِ عَلَ، ﭑ مَرِفِ عَلَ، عِ ﭑ نَبّحِنشِ مُنقٍ رَ؟» 47مِشِ نَشٍيٍ نُ نَ نَا، عٍ تٌ عَ شُي مّ، عٍ نَشَ عَ قَلَ، «عَ نَ عَننَبِ عٍلِيَ نَن شِلِقٍ!» 48مِشِ ندٍ نَشَ عَ فِ، عَ سَ دُنكٌبِ رَ سِن وّنِ شْنّ شْورَ، عَ عَ سٌ وُرِ دّ عِ، عَ قَ عَ تِ عِسَ بّ عَلَكٌ عَ شَ عَ مِن. 49كْنْ بٌورٍيٍ نَشَ عَ قَلَ، «وٌ عَ لُ، وٌن شَ عَ مَتٌ شَ عَننَبِ عٍلِيَ قَمَ عَ رَكِسِدٍ.» 50عِسَ مَن نَشَ عَ شُي عِتٍ سّنبّ رَ، عَ قَ لَاشِرَ.

51نَ وَشَتِ، دُفِ شُنفبٍ نَشَن سِنفَنشِ هْرْ مْبَنشِ كُي، عَ نَشَ عِبْو قِرِن نَ، كٍلِ عَ قُفٍ هَن عَ لَابٍ. بْشِ نَشَ سّرّن، فّمّيٍ نَشَ عِبْو، 52فَبُرِيٍ قَن نَشَ رَبِ. سّنِيّنتْي لَاشِرَشِ فبٍفبٍ نَشَ كٍلِ قَشّ مَ، 53عٍ مِنِ فَبُرِيٍ كُي. عِسَ تٌ كٍلِ قَشّ مَ، عٍ سٌ نّ دَرِ سَلَمُ، تَا سّنِيّنشِ كُي، عٍ قَ مِنِ مِشِ وُيَشِ مَ. 54سْورِ مَنفّ نُن عَ بٌورٍ سْورِيٍ نَشٍيٍ نُ عِسَ كَنتَقٍ، عٍ تٌ بْشِ شَ سّرّنيِ تٌ، عَ نُن نَشَن نَبَ عِسَ قَشَ تّمُي، عٍ نَشَ فَاشُ كِ قَنيِ، عٍ عَ قَلَ، «نْندِ نَن عَ رَ يَتِ، عَلَ شَ دِ نَن نُ يِ شّمّ رَ!»

55فِنّ وُيَشِ قَن نُ نَ نَا، عٍ ندٍدِ مَكُيَشِ عِسَ يِرٍ رَ، عٍ يِ قٍ بِرِن مَتٌمَ. عٍ نُ بَرَ بِرَ عِسَ قْشْ رَ كٍلِقٍ فَلِلٍ بْشِ مَ، عٍ نُ عَ مَلِ. 56مَرِيَمَ مَفِدَلَكَ نُ نَ عٍ يَ مَ، عَ نُن مَرِيَمَ يَكِ نُن يُسُقُ نفَ، عَ نُن سٍبٍدٍ شَ دِيٍ نفَ.

عِسَ شَ مَرَفَتّ

مَرَكِ ١٥‏؛٤٢ ٬ ٤٧، لُكِ ٢٣‏؛٥٠ ٬ ٥٦، يَيَ ١٩‏؛٣٨ ٬ ٤٢

57نُنمَرٍ تٌ سٌ، عَرِ مَتٍكَ بَننَمِشِ ندٍ نَشَ قَ نَشَن نُ شِلِ يُسُقُ. عِسَ قْشِرَبِرّ ندٍ نَن نُ عَ قَن نَ. 58عَ نَشَ سِفَ ثِلَتِ يِرٍ، عَ عِسَ قُرٍ مَشَندِ عَ مَ. ثِلَتِ نَشَ يَامَرِ قِ عٍ شَ عَ سٌ عَ يِ رَ. 59يُسُقُ نَشَ عِسَ قُرٍ تٌنفٌ، عَ عَ مَقِلِن كَسَنفٍ قَنيِ كُي، 60عَ عَ بّلّ فَبُرِ نّينّ كُي، نَشَن نُ فٍشِ فّمّ كُي عَ تَن يُسُقُ بّ. عَ تٌ فّمّ شُنفبٍ مَحِندِفِلِن، عَ عَ دْشْ فَبُرِ دّ مَ، عَ نَشَ سِفَ. 61مَرِيَمَ مَفِدَلَكَ نُن بٌورٍ مَرِيَمَ نُ نَ نَا، عٍ دْشْشِ فَبُرِ يَ رَ.

سْورِيٍ تِقٍ عِسَ شَ فَبُرِ كَنتَدٍ

62مَلَبُ لْشْي سٍيٍ رَقَلَ لْشْي كُيٍ عِبَ، سّرّشّدُبّ كُنتِفِيٍ نُن قَرِ سّنِيٍ نَشَ سِفَ ثِلَتِ يِرٍ. 63عٍ نَشَ عَ مَسٍن عَ بّ، «مَنفّ، مُشُ رَتُشِ عَ مَ يِ وُلٍ قَلّ، بٍينُن عَ شَ قَشَ، عَ عَ قَلَ نّ، ‹شِ سَشَن دَنفِ شَنبِ، ﭑ كٍلِمَ نّ قَشّ مَ.› 64نَ كُي، عِ شَ يَامَرِ قِ عَ شَ فَبُرِ شَ مَكَنتَ هَن عَ شِ سَشَن ندٍ، عَلَكٌ عَ قْشِرَبِرّيٍ نَشَ قَ عَ قُرٍ مُحَ، عٍ قَ عَ قَلَ حَمَ بّ، ‹عَ بَرَ كٍلِ قَشّ مَ.› شَ نَ سَ رَبَ، وُلٍ دْنشْي دَنفِمَ نّ وُلٍ سِنفٍ رَ.» 65ثِلَتِ نَشَ عٍ يَابِ، «عَوَ، ﭑ بَرَ سْورِيٍ سٌ وٌ يِ. وٌ سَ فَبُرِ مَكَنتَ عَلْ وٌ وَ مَ عَ شْن مَ كِ نَشّ.» 66عٍ نَشَ سِفَ، عٍ سَ تْنشُمَ سَ فّمّ مَ نَشَن نُ نَ فَبُرِ دّ مَ، عَلَكٌ شَ فَبُرِ قَ سَ رَبِ، عَ كٌلٌنمَ نّ. عٍ نَشَ سْورِيٍ لُ نَا، نَ كَنتَقٍ رَ.