Viewing:

2 Samiyɛle 2-samuel 14

Select a Chapter

Aɓasalɔme ɠalema vai Zeluzalɛme

1Seluya ná-doun zunui Zoaɓe kaani ga masagi yiimaalɛiɗa Aɓasalɔme letegi. 2É keela leʋeni Tekoa, ti ʋa ga anzanui ta, nii gola zoogai faa ɓɛtɛzu, é ɠɛ ma: «Ɓɔɠɔ ɠɛ eɠɛ ɗa ɠɛ saa wɔlɔ wosu, è saa wɔlɔ zeɠei loo ɠɔba, mina gulɔ maku nɛɛnɛ siɛ ɓɔɠɔ ma, ɠaazuʋɛ ɠɛ eɠɛ anzanui nii é ná-nui ta zaa wɔlɔ wosu kaite. 3Ɗa li niina masagi ʋɔ bɛ, nii gè bosu è ma, è naa wo ma.» Zoaɓe naa lɛɛni la, nii maanɛɛni é bo masagi ma.

4Tekoa anzanui liini masagi ʋɔ bɛ, é la kɔɠɔwu, é ɠɛ ma: «Ee, masagi, kìzo.» 5Masagi ɠɛni ma: «Leeni ɠa è pɔ?» É ɠɛni ma: «Masagi! Nà ga poanzai, sìnigi zaa. 6Doun zunu felegɔ ɠa é ɠɛa zèa, nɛ̀i gè ga ɗa-wotiɠɛ anzanui. Ti felegɔ ti kɔɔni dɔɓɔi zu, nu la ná, é ʋa ti ɠaaɠwɛ, zɔi ɗa bɔɔlai loɠa, é paa. 7Pɛlɛyeɠei pɛ buzeɠe ʋele ɠana dàalɔɠɔma, ti ɠɛ mà: ‹Zɔi é bɔɔlai ʋaai, fe, gi paa, tɔɔzei é kɛɛɠɛloin ʋaaʋɛ. Ʋele ɠana gá pogani zeɠe nui undaaʋili da gaama.› Ta naa ɠɛɛna, ta nà-kito gaaɓelagi ɠoloɠolosu naazu. Sìnigi laaseigi ta mavofodai ɠa ɲɛɛlɛ zooi ɠa.»

8Masagi ɠɛni anzanui ma: «Li ɗa-laazu, nà deveiti feezu ɗa-vaa zu.» 9Tekoa anzanui ɠɛni ma: «Màliɠii masagi, niima vaaɠaazagi yɛ ga giye, gá nà-pɛlɛyeɠei, masagi ɠɛ ga sɔbalala nu, ta mavofodaiti, niima vai zu.» 10Masagi ɠɛni ma: «Ni nu nɔpɛ ka zelilona è ma niima vai zu, ʋaa la pɔ̀, toɠa è yɛ ná.»

11Anzanui kpɔɛi zeɠeni ʋolu, é ɠɛ ma: «Masagi soma, é minazeɠe bɛ̀ Ɠɔoɠɔ GALAGI laaseigi zu, ga potokula nui mina ta ʋɛɛ nà-maanɔɠɔi ʋa, ga é ʋa zɔi ʋaa, nii zɛgai zèa.» Masagi gooɠaaʋoteni, é ɠɛ ma: «Gè ɠonaa Ɠɔoɠɔ GALAGI ma, nii é vulua, ga è-loin unma undeɠai gila kpalaa ge la loa zooi ma.»

12Anzanui ɠɛni ma: «Ɗa va bu nɛi, màliɠii masagi, gè faa ɠili bo dɛ è ma, nɛ̀i gè ga ɗa-wotiɠɛ anzanui?» Masagi ɠɛ ma: «Ɓɔɛna.» 13Anzanui kpɔɛi zeɠeni ʋolu, é ɠɛ ma: «Lee vaa zu mu è ɠisiɛi ɠana, é lo GALA ná-nuɓusɛiti ba? Mazɔlɔɔ wooi niiti maaʋele ma, è ti wogai feya, masagi, è ɓɔɠɔ ɠwɛɛgɛ ga sɔba nu, mazɔlɔɔ è la Aɓasalɔme ɠaaɠaleni ma, nii è kpɛai. 14Yeeta ade pɛ ada zaazu, eɠɛ ziɛi puai ya zooi ma, nu la zooga zɛʋɛzu. GALA ge la ɗa ga zɛnvu ɠula nu ya, kɛlɛ toɠa ɗa pelei ɠaiziɛ ga nii kpɛai, é mina yɛ pela ʋelei zu. 15Ɗa kaana, pàai gè ɓɔɛ è ʋɔ, toɠa ga nuɓusɛiti kɛʋelei ɠa, é màaluai, gè ɠɛ ɓɔɠɔ ma: ‹Nà liizu, gè ɓɔɛ masagi ʋɔ, tanisu toɠa ziɛ ga nà-tɛnɛ gooi, nɛ̀i gè ga ná-botiɠɛ anzanui. 16Tanisu toɠa kɛ é ɓaa màazu, nɛ̀i gè ga ná-botiɠɛ anzanui, zunui naa laalɔɠɔma, nii é ɠɛa pɔ é gi laazeɠe etea, gá dòun zunui, ga é gi ɠula nuɓusɛiti saama, niiti GALA ge yiimazeɠeai ga tiye ga ti ɠɛ ga nɔnɔ.› 17Kɛ̀ɛʋɛ ɓɔɠɔ ma: ‹Maliɠii masagi laawooi ɠa ɠɛ ga ziilɛi kpɔɛ bɛ̀.› Mazɔlɔɔ màliɠii masagi ɠɛɛʋɛ eɠɛ GALA ná-geezuɠeelai ga é faa ʋagɔi ta faa ɲɔi yɔɠɔzuɠula. Ɠɔoɠɔ GALAGI ɗa-ƓALAGI yɛ è ʋa.»

18Masagi ɠɛni anzanui ma: «Nà ɓalaa, nii gè è ɠaazaɠasu ma, mina tanɔpɛ dɔɔɠu bà.» Anzanui ɠɛ ma: «Màliɠii masagi, ɓɔɛna.» 19Masagi kpɔɛi zeɠeni ʋolu, é ɠɛ ma: «Zoaɓe lɛi é ʋa ɠɛ ʋolu niima vai pɛ su?» Anzanui ɠɛ ma: «Ee, màliɠii masagi, GALA ka kàazu, eɠɛʋelei è vulua la ga ɠite, nii kpein màliɠii masagi boga, nu la zooga zeɠezu ba, è ʋa li ga yeeza ɓaa ɠɔʋɛzu ʋele. Ti pɛ ka ga gaamai, ɗa-wotiɠɛ nui Zoaɓe ɠa é tèʋega, ga gè ɓɔɛ è ʋɔ. Nii kpein maanɛai ga gè bo, nɛ̀i gè ga ɗa-wotiɠɛ anzanui, tɔ ɠa é ti pɛ pua dà. 20Ni ɗa-wotiɠɛ nui Zoaɓe naa ɠɛa, toɠa pɔ é niima vai ɠula ga kɛʋelei taɠili. Kɛlɛ ɠigi ɠa màliɠii ya, eɠɛ GALA ná-geezuɠeelai. Nii kpein é ɠɛɛzu zooi zu, é ti pɛ kwɛɛ.»

21Masagi liini, é ɠɛ Zoaɓe ma: «Nii è boga, gè vaa bu. Liina, è ʋa ga zunu loungoi Aɓasalɔme ʋɛ.» 22Zoaɓe laani masagi ɠɔɠɔwu, é ɠɛ ma: «GALA ge tuya loo è ʋɛ, masagi! Gè kwɛɛga ga è yiilaaʋɛ mà, tɔɔzei è naa ɠɛa, nii gè bogai è ma, nɛ̀i gè ga ɗa-wotiɠɛ nui.» 23Zoaɓe wuzeɠeni, é li Gesuul, é Aɓasalɔme zeɠe ná, é ʋaa la Zeluzalɛme.

24Masagi ɠɛni ma: «Aɓasalɔme mina zeeli pɔ̀ bɛ, é li ná-pɛlɛi wu.» Aɓasalɔme liini ná-pɛlɛi wu, é la ɠaazulaani masagi ma.

Davideni ta Aɓasalɔme ti yɔɠɔzuɓɛtɛ vai

25Izilayɛle yooi zu, Aɓasalɔme ɠɛɠala la ɠɛni ná pagi zu, é zo kɔɠɔaʋɛ, é lɛ unmaʋɛ, ná pɛ paga ɠɛni de. 26Konagi ɓesu ɠilagila, é ɠɛni nɔungi wosu, mazɔlɔɔ nɔundeɠai ɠɛni wuizu ma. Ti ɓena nɔundeɠai ɠɔɠɔ, é ɠɛ ga, kilo felegɔ ta tukpɛ (2,5), eɠɛʋelei masagi ná-kɔɠɔgiti ti la. 27Aɓasalɔme zunu loun saʋagɔ zɔlɔɔni, ta anzanu loun ɠila, nii é ɠɛni ga anzanu ʋapa gola, daa ɠɛni ga Tamaal.

28Aɓasalɔme kɛɛni ga kona felegɔ Zeluzalɛme, é la liini masagi ɠakala. 29Yeeta é Zoaɓe lolini ga é naa leʋe masagi ʋɔ bɛ, kɛlɛ Zoaɓe la ɠɛni kɛɛni, é ʋa li pɔ bɛ toligi ma. Aɓasalɔme tolini ná velesiɛi zu, kɛlɛ Zoaɓe la ɠɛni kɛɛni. 30Názu ɠa Aɓasalɔme ɠɛni la ná-botiɠɛ nuiti ma: «À wɛlɛ! Zoaɓe ná-kpalagi ɠa nɔ̀nɔi ɠoba. À li, wo abui ʋili ba.» Aɓasalɔme ná-botiɠɛ nuiti ti abui ʋilini Zoaɓe ná-kpalagi ʋa. 31Zoaɓe wuzeɠeni, é li Aɓasalɔme ʋɔ bɛ, é gaazaɠa, é ɠɛ ma: «Lee vaa zu ɗa-wotiɠɛ nuiti ti abui logai nà-kpalagi ʋa?» 32Aɓasalɔme gooɠaaʋoteni, é ɠɛ ma: «Gè è loligɛ, è la kɛɛni, è ʋa ʋa. Gè ɠɛa ɠɛɛzu, gè è leʋe, è masagi ɠaazaɠa, è ɠɛ ma: ‹Lee vaa zu sèɠeai Gesuul, gè ʋa? Maanɛɛni nɔ gè yɛ ná.› Nà pɔ niina ga gè ɠɛ masagi ɠakala niizu, ni nà ga sɔba nu, é pàa!» 33Zoaɓe liini masagi ʋɔ bɛ, é naa ná-doin laawooiti pɛ daazeeli ma. Masagi Aɓasalɔme lolini. Diai ma, é la masagi ɠɔɠɔwu. Masagi Aɓasalɔme nɛɛnɛni ga daaʋɛ komagai.