Viewing:

Ɛgezɔde Exodus 15

Select a Chapter

Unmɔɔ guyei

1Názuʋɛ, Moize ta Izilayɛle nuiti ti niima wuyei looni Ɠɔoɠɔ GALAGI ʋɛ, ti ɠɛ ma:

«Nà guyei loozu Ɠɔoɠɔ GALAGI ʋɛ, mazɔlɔɔ é ná-fɔnifaamai ɠulaʋɛ kɛlɛma,

é sooi ta kpizɛ nui ʋiliga kpoloɗɛi wu.

2Ɠɔoɠɔ GALAGI ɠa ga sùvikɛi ta nà-maamusɛ wuyeiti ma ungi,

tɔ ɠa é ga nà-kizogi.

Toɠa ga nà-GALAGI, nà bɔɔlɔ.

Toɠa ga kɛ̀ɛ ná-GALAGI, nà maamusɛzu.

3Ɠɔoɠɔ GALAGI ɠa ga kɔɔɠuluɓai.

Daaseigi ɠa ga Ɠɔoɠɔ GALAGI.

4É Falaɠɔn ná-wotoloiti ta ná-kɔɔɓɔgi ʋiliga kpoloɗɛi wu,

ná-kɔɔɠuluɓa ɠɛzɛiti maaɓɔlega Seeli Kpoloɗɛi wu.

5Ziɛ lakpatakpagiti ti ti maaɓɔleni,

ti yeini ziɛi ɓomaʋɛti eɠɛ kɔtui.

6Ee, Ɠɔoɠɔ GALAGI, è-yeezai maayikiʋɛ ga suvikɛi.

Ee, Ɠɔoɠɔ GALAGI, è-yeezai ɠa é è zili nui ɠaayɔni.

7Ee, è ɠaazu unfegi wɔɔlɔʋɛ!

Ɗa naati tokasu, niiti ti wuzeɠezu è laalɔɠɔma,

ɗa yeeɓesu ɗa-yiiɠaawana wolai ʋa,

é ti ɠala eɠɛ kpakui.

8Ziɛi ma ziɠigiti ti loni ga è-zokpa zu viilɛiti maaʋele.

Ziɛi ɠaalɛɛni ba eɠɛ siɠigi,

paliiti ti ɓaani kpe kpoloɗɛi zaamaʋɛ.

9Sili nui ɠɛni ɠɛɛzu ma: ‹Nà ʋilɛ ti ʋolu, gè ti zo.

Nà ta-naavoloi ɠaaɠwɛ, gè ta mi.

Nà boɠa zɔkpɔi mɛɛn, gè yeei ʋɛɛ ti ma.›

10È laavuuvuuni, kpoloɗɛi ti maaɓɔleni.

Ti ɠɛni loozu eɠɛ kena kpui ziɛi wu, ti wola yeeɠaaɓaai.

11Ee, Ɠɔoɠɔ GALAGI, ɓɛ ɠa é ga è ɠɛʋele galagiti saama?

Ɓɛ ɠa é ga è ɠɛʋele, maayikiai ɲadedai zu,

ɠaazu unfegi bɛ, maamusɛi zoloogai ma,

é laavɔɔ vaiti kɛɛzu?

12È yeezai maaleni nɔ,

zooi gi ɓɛɛ nuiti kpɔle.

13Nuɓusɛiti é ti unmɔɔni, è loni naati tuɠɔ ga ɗa-wooɠɛɠiladai,

ɗa losu ti luɠɔ ga è-zuvikɛi, è li ga tiye è-zeizu ɲadegai.

14Nuɓusɛiti ti mɛnini, ti zuɓali,

dualuagi Filisiti nuiti soga.

15Edɔme ɠundiɠiiti sasu ɠa ɓalizu,

sasuɓalii Moaɓe ɠɔɔɠuluɓaiti soni,

Kanaan zei wo nuiti dɔtɔzuleʋea.

16Maalua vai ta dualuagiti ta zeeli ti ma.

È-yeelokoi ná-bɔɔlɔi maaʋele ma, ta ɠɛɛzu ga ɓoɓoiti eɠɛ kɔtui,

ee, Ɠɔoɠɔ GALAGI, eyɛsu ɗa-nuɓusɛiti ti leʋe,

ɗa-nuɓusɛiti è ti ɠeyaai.

17Ɗa liizu ga tiye, è ti zei ɗa-ɠizei ma,

ee, Ɠɔoɠɔ GALAGI, adaʋɛ è ná ɓɛtɛa ga è-zeizuʋɛ,

ee, Maliɠii, seizu ɲadegai, nii è-yeeiti ti kpɛtɛni.

18Ɠɔoɠɔ GALAGI ɠa masadai ɠɛɛzu eyɛsu ɠɔ.»

19Mazɔlɔɔ Falaɠɔn ná-sooiti, ta ná-wotoloiti ta ná-soo ɓizɛ zalaʋusuiti ti lɔɔni kpoloɗɛi zaamaʋɛ. Ɠɔoɠɔ GALAGI kpoloɗɛi ɠaaɠale ma ti ma, kɛlɛ Izilayɛle nuiti ti ziɛni ga ɠɔɠɔa vɔɔi kpoloɗɛi zaamaʋɛ.

20Miliyame é ga GALA goo wo anzanui, Aalɔn baazeelai, tamadegi zeɠeni. Anzanuiti kpein ti ʋilɛni polu ga tamadegiti, ti ɗa kuai wo. 21Miliyame ɠɛni guyei laazosu, é ɗa ɠɛ ma:

«À guyei loo Ɠɔoɠɔ GALAGI ʋɛ, mazɔlɔɔ é ná-bɔɔlɔlai ɠula kɛlɛma,

é sooi ta kpizɛ nui ʋiliga kpoloɗɛi wu.»

Izilayɛle Nuiti Ta-Ziɛi Teʋebai Zu

(15:22—18:27)

Mala ɗɛi ʋɔ bɛ

22Moize liini ga Izilayɛle nuiti, ti zeɠe Seeli Kpoloɗɛi ʋɔ bɛ. Ti Suul teʋebai zu ʋelei zeɠeni, ti ziɛni teʋebai zu ga folo saʋagɔ, ti la ɠɛni ziɛ ɠaani ɲɛgɛlɛin.

23Ti zeelini Mala, kɛlɛ ti la ɠɛni zooni, ti ʋa Mala ɗɛi ta ɓɔle, tɔɔzei é wanani. Naa ɠa é kɛɛni, naama laaseigi ʋɛɛni ba ga Mala (nii poluʋɛ ga «wanaʋɛ»). 24Nuɓusɛiti ti zelii loni Moize ma, ti ɠɛ ma: «Leeni ɠa gá kpɔle?» 25Moize wooɠulani Ɠɔoɠɔ GALAGI ma. Ɠɔoɠɔ GALAGI gului ta lɛɛni la. É ma ɓuɠai ta ʋilini ziɛi wu, ziɛi nɛɛni.

Miná ɠa Ɠɔoɠɔ GALAGI tɔgiti ta deveiti feeni ná-nuɓusɛiti zea ná. Miná ɠa é ti ʋoluɠulani ná. 26É ɠɛni ma: «Ni wa woilona gòo ma ga pagɔ, nɛ̀i gè ga Ɠɔoɠɔ GALAGI wa-ƓALAGI, ni wa naa ɠɛɛna, nii sɔlegai gàazu, ni wa woilona nà-deveiti ma, ta ni wa nà-tɔgiti kpein sona, gè la seeɓɛiti taɠila kpalaa pɛa wo ʋa, nii gè pɛɛni Ezipete nuiti ba, mazɔlɔɔ nà ga Ɠɔoɠɔ GALAGI, nii é wo ɠɛdɛsu.»

27Ti zeelini Elime, ʋɛ ziɛun puugɔ maazu felegɔ (12) ɠɛni ná, ta dɔɔ wulu ʋuulɔfela (70). Ti ʋuuni miná ziɛlaʋɛ.