Viewing:

Ɛgezɔde Exodus 34

Select a Chapter

Tɔgi ma ɠokolo niinɛiti saɠa vai

(Tɔ Sɛʋɛi Velesiɛi 10:1-5)

1Ɠɔoɠɔ GALAGI ɠɛni Moize ma: «Kɔtu ɠokolo felegɔ zaɠa ga ma mɔungiti kɛʋele. Nà wooiti sɛʋɛzu naama ɠɔtu ɠokologiti ma, wooi niiti ti ɠɛni ma mɔungiti ma, niiti è ti wolowoloni. 2Sobuzobui, ɠɛʋele ɓɛtɛ, sobui nɔ, è lɛ Sinayi gizei ma, ɗa losu náʋɛ kàkala, gizei unmaʋɛ. 3Nu nɔpɛ ge mina ʋilɛ è ʋolu, wo ʋa lɛ. Nu nɔpɛ ge mina ɓɔɠɔ lɛ gizei ma ná tanɔpɛ. Toganii ma go ɓaa ma wola mina ɓalaa daami wo gizei ma, ma lugi zu kpein.»

4Moize kɔtu ɠokolo felegɔi zaɠani, eɠɛʋelei ma mɔungiti ti ɠɛni la. Moize wuzeɠeni sobuzobui, é lɛ Sinayi gizei ma, eɠɛʋelei Ɠɔoɠɔ GALAGI devei veeni la zea, é kɔtu ɠokolo felegɔiti seɠeni ya.

5Ɠɔoɠɔ GALAGI yeini tonaɓiingi zu, é lo ná kobaʋɛ, é Ɠɔoɠɔ GALAGI laaseigi lɛɛni. 6Ɠɔoɠɔ GALAGI leʋeni kakalaʋɛ, é wooɠulani, é ɠɛ ma: «Ɠɔoɠɔ GALAGI, Ɠɔoɠɔ GALAGI, maawɔinɠa ƓALAGI, nii é zaalai veezu, zii la ɠula fala, kpɛtɛai nuɓɔɠɔlai ta wooɠɛɠiladai zu, 7é wooɠɛɠiladai ɠɛɛzu, eyɛsu é zeeli yamani waagilasiɛi (1.000) ma, é faa ɲɔi zuvaayɛsu, ta tɔ koloɠologiti, ta kotoi, kɛlɛ é la sɔba nui zoga ga sɔbalala nu, a ɗa ɠɛɛɠɛiti ta-vaa ɲɔi ʋotokula ti-lointi ma, ta ti-lounlointi ma, eyɛsu é zeeli yamani zaʋasiɛi ta naanisiɛi ma.»

8Moize zuvilɛni ga maaʋɛa zooi ma, é nɔkɔ. 9É ɠɛni ma: «Màliɠii, ni gè zaalai zɔlɔɔgɛ è ɠaazu, ɠɛ gi zaama. Anɛɛ ni suvɔ nuɓusɛiti be, gá-vaa ɲɔiti suvaayɛ, ta gá-ɠotoiti, gi zeɠe, è gi ɠɛ ga ɗɔnɔ.»

Ɠɔoɠɔ GALAGI ná-minazeɠegi

(Ɛgezɔde 23:14-19; Tɔ Sɛʋɛi Velesiɛi 16:1-17)

10Ɠɔoɠɔ GALAGI gooɠaaʋoteni, é ɠɛ ma: «Nà ɓɔɠɔ nà minazeɠegi ɠɛɛzu wo ʋɛ. Nà laavɔɔ vaiti kɛɛzu ɗa-nuɓusɛiti kpein gaazu, niiti ti ta la dɛ ɠɛɛni eteai zu ná tanɔpɛ, ziiti kpein saama. Nuɓusɛiti kpein wo zeini ti zaama, ta Ɠɔoɠɔ GALAGI ná-kɛɛwotii ɠa, kɛɛwotii nii maaluaai, nii nà kɛ ga è maaʋele.

11«À dama ga devei gè feezu wo ya za. Nà ʋaazu Amool nuiti kpɛɛzu wo luɠɔ, ta Kanaan nuiti, ta Ɠɛte nuiti, ta Felɛze nuiti, ta Ɠeve nuiti, ta Yeɓuse nuiti. 12À dama, wo mina minazeɠe kɛ zooi zu nuɓusɛiti bɛ, ʋɛ wo ʋaazu zeizu ná, naa ɠa a kɛ, ti mina ɠɛ ga balii wo zaama. 13Kɛlɛ, kɛni wo ta-zalaɠa ɠulazuʋɛti golo, wo ta-zale ɠɔtuiti kpezeɠele, wo ta-zale wuluiti teʋe ga. 14À mina nɔkɔ gala kili bu, mazɔlɔɔ nà, nɛ̀i gè ga Ɠɔoɠɔ GALAGI, dàaseigi ɠa ga ‹nii toloai›. Nà ga tolo ƓALAGI.

15«À mina minazeɠe kɛ zooi zu nuɓusɛiti bɛ, naa ɠa a kɛ, ta koloɠologi ɠɛɛna ta ta-ɠalagiti, ti ti ɠɔ ga zalaɠaiti, ti mina wo loli, wo ʋa ta mi. 16À mina ti-loun anzanuiti seɠe wo-loun zunuiti bɛ, ti-loun anzanuiti ta koloɠologi ɠɛɛna ta ta-ɠalagiti, ti mina wo-loun zunuiti maalɛlɛ ga ti ʋa ɗa naa ta ɠɛ.

17«À mina kɔlui ɠaawuun, wo ʋa kpɛtɛ ɓɔɠɔ ʋɛ ga galagi.

18«Ɓului nii lɛʋɛ la su, wa naama vɛtii makɛ, folo lɔfela laawu, molo ɠulasu ziɛgi ma yeeɠɛɠalai zu, teʋeai ba, wa ɓuluiti mi nii lɛʋɛ la su, eɠɛʋelei gè devei veeni la wo ya, mazɔlɔɔ molo ɠulasu alugi ma ɠa wo ɠulani la Ezipete yooi zu.

19«Doun mɔungi kpein ka ga nɔ̀nɔ, anɛɛ toganii ma yiʋo mɔungi ma zinɛi, é ɠɛni ga nikɛ yiʋo, ɓaa baala ziʋo. 20Wa soovale ziʋo mɔungi unmɔɔ ga baala ziʋoi. Ni wo la unmɔɔni, wa kɔtɔɠaʋɛ wolo. Wa zunu loun mɔungi kpein unmɔɔ. Nu nɔpɛ ge mina ɠula kɛlɛma gàazu ga yeaɲaka.

21«Wa botii ɠɛ folo lɔzita laawu, wo looɠo folo lɔfelasiɛi, anɛɛ wozawoli ta molo leʋe ziɛgi zu ʋe.

22«Wa dɔɔɠɔiti ma vɛtii ɠula, ga moloi é ga ɓeleegi ma mɔɔ mɔungi, ta molo leʋe vɛtii konagi a ɓena. 23Ná zeizu ɠa ɠɛ saʋa konagi zu, zunuiti kpein ti ɠula kɛlɛma Maliɠii ɠaazu, Ɠɔoɠɔ GALAGI, Izilayɛle ná-GALAGI. 24Mazɔlɔɔ nà ziiti kpɛɛzu wo luɠɔ, nà wa-ɠwɛpelemaʋɛti bɔɔlɔzu. Nu nɔpɛ gaazu la ɠulaa wa-yooi ʋa, siɛgi zu wo lɛɛzu la ga wo ɠula kɛlɛma Ɠɔoɠɔ GALAGI, wa-ƓALAGI ɠaazu, ná zeizu ɠa ɠɛ saʋa konagi zu.

25«Ɓului nii lɛʋɛi su, à mina naa ɓɔ suai ʋa, wo ʋa kula ga nà-zalaɠai. À mina Pakegi ná-fɛtii ma zalaɠai makɛ kpidii laawu, é ʋa yɛsu sobu ʋa zeeli.

26«Wa ʋa ga wa-yooi ʋaalɔnɔ mɔungiti Ɠɔoɠɔ GALAGI wa-ƓALAGI zei ʋɛlɛi wu.

«À mina boli yiʋoi ɠili ga dee ná-ɲiimiɗɛi.»

27Ɠɔoɠɔ GALAGI ɠɛni Moize ma: «Wooi niiti sɛʋɛ, mazɔlɔɔ minazeɠegi gè kɛɛzu è ʋɛ, ta Izilayɛle ʋɛ, toɠa zoloosu niima wooiti ma.» 28Moize kɛɛni Ɠɔoɠɔ GALAGI ɠoba náʋɛ ga folo ʋuunaanigɔ (40) ta kpidi ʋuunaanigɔ (40). É la daami woni, ta é la ziɛ ɓɔleni. É minazeɠe gooiti sɛʋɛni kokologiti ma, ti ga tɔ puugɔi ma wooiti.

Moize ɠaazuʋɛ volo vai

29Moize yeini, é zeɠe Sinayi gizei ma, zeele woo ɠokolo felegɔiti ti ɠɛni zea, zeizuʋɛ é zeɠe gizei ma. É la ɠɛni kwɛɛ ga gaazuʋɛ ɠɛni volozu, tɔɔzei ti yɛpɛni ta Ɠɔoɠɔ GALAGI. 30Aalɔn ta Izilayɛle nuiti kpein ti wɛlɛni Moize ʋa, pɛtɛ, gaazuʋɛ ɠɛni volozu, ti ɠɛni luazu ga ti ʋa maaɓuɠa ba. 31Moize ti lolini. Aalɔn ta bɛbɛiti ta-ɠundiɠiiti kpein ti ʋaani pɔ bɛ, é ɓɔɛni ti ʋɔ. 32Naa ʋoluma, Izilayɛle nuiti kpein ti maaɓuɠani ba. É deveiti kpein feeni ti ya, niiti é ti zɔlɔɔni Ɠɔoɠɔ GALAGI ya, Sinayi gizei ma. 33Siɛgi zu Moize ɓeni la ga ɓɔɛ ti ʋɔ, é seɠei ʋɛɛni ɠaazu. 34Siɛgi zu Moize a la ɠɛna lɛa la Ɠɔoɠɔ GALAGI ʋɔ bɛ, ga é ɓɔɛ pɔ, é ɠɛni seɠei ɠulazu ɠaazu, eyɛsu é ɠula. Siɛgi zu a la ɠulana la, é ɠɛni naa wosu Izilayɛle nuiti ma, nii é ga devei é veeni zea. 35Izilayɛle nuiti ti ɠɛni wɛlɛzu Moize ɠaazuʋɛ, ti kaani ga gaazuʋɛ ɠɛni volozu, Moize ɠɛni seɠei ʋɛɛzu ɠaazu ʋolu, eyɛsu é lɛ, é ɓɔɛ Ɠɔoɠɔ GALAGI ʋɔ.