Viewing:

ʻIsaia Isaiah 63

Select a Chapter

1 ʻOku fakahā ʻe Kalaisi ʻa ʻene ʻafio, 2 Mo ʻene lavaʻi hono ngaahi fili, 7 Pea mo ʻene ʻaloʻofa ki hono siasi. 10 ʻI hono houhau totonu ʻoku ne manatu ki heʻene ʻaloʻofa lahi. 15 ʻOku fakahā ʻe he siasi ʻa ʻene tui ʻi heʻene hū mo ʻene lāunga.

1Ko hai eni ʻoku haʻu mei ʻItomi,

mo e kofu kulokula mei Posila?

ʻA eni ʻoku nāunauʻia hono kofu,

ʻo ne hāʻele ʻi he lahi ʻo hono mālohi?

“Ko au ia ʻoku folofola ʻi he māʻoniʻoni,

ko e māfimafi ke fakamoʻui.”

2Ko e hā ʻoku kulokula ai ho ngaahi kofu,

pea tatau ho ngaahi kofu mo ia ʻoku molomoloki ʻi he tataʻoʻanga uaine?

3“Kuo u molomoloki tokotaha pe ʻae tataʻoʻanga ʻoe uaine;

pea naʻe ʻikai kau ha tokotaha kiate au:

ne u molomoloki ʻakinautolu ʻi heʻeku ʻita,

pea moeʻi ʻakinautolu ʻi hoku houhau lahi;

pea kuo pani hoku kofuʻaki honau toto,

pea ne u ngaohi ke lanu hoku ngaahi kofu kotoa pē.

4He ʻoku ʻi hoku loto ʻae ʻaho ʻoe fai totongi,

pea kuo hokosia ʻae taʻu ʻo hoku huhuʻi.

5Pea ne u vakai, pea naʻe ʻikai ha taha ke tokoni;

pea ne u ofo ʻi he ʻikai ha taha ke poupou hake:

ko ia naʻe ʻomi ʻe hoku nima ʻoʻoku ʻae fakamoʻui kiate au;

pea ko hoku houhau, naʻa ne poupou au.

6Pea ne u molomoloki ʻae kakai ʻi hoku houhau,

pea ngaohi ke nau konā ʻi he houhau lahi,

pea ne u ʻomi ʻenau mālohi ki he kelekele.”

7Te u fakahā ʻae ngaahi ʻaloʻofa ʻa Sihova,

mo e ngaahi fakamālō ʻa Sihova,

ʻo hangē ko ia kotoa pē kuo foaki ʻe Sihova kiate kitautolu,

pea mo e angalelei lahi ki he fale ʻo ʻIsileli,

ʻaia kuo ne foaki kiate kinautolu ʻo hangē ko ʻene ngaahi ʻaloʻofa,

ʻo fakatatau mo hono lahi ʻaupito ʻo ʻene ʻaloʻofa ongongofua.

8He naʻa ne pehē, “Ko e moʻoni ko hoku kakai ʻakinautolu,

ko e fānau ʻe ʻikai te nau loi;”

pea naʻe hoko ia ko honau Fakamoʻui.

9‌ʻI heʻenau mamahi kotoa pē naʻe mamahi ia,

pea ko e ʻāngelo ʻo hono ʻao naʻa ne fakamoʻui ʻakinautolu:

ʻi heʻene ʻofa mo ʻene manavaʻofa naʻa ne huhuʻi ʻakinautolu:

pea ne toʻo hake ʻakinautolu,

mo fua ʻakinautolu ʻi he ngaahi ʻaho kotoa pē ʻi muʻa.

10Ka naʻa nau angatuʻu,

pea fakamamahi ki hono Laumālie Māʻoniʻoni:

ko ia naʻe liliu ai ia ko honau fili,

pea naʻa ne tauʻi ʻakinautolu.

11Pea naʻa ne manatu ki he ngaahi ʻaho ʻi muʻa,

kia Mōsese, mo hono kakai, ʻo ne pehē,

“ʻOku ʻi fē ia naʻe ʻomi ʻakinautolu mei he tahi, fakataha mo e tauhi ʻo ʻene fanga sipi?

ʻOku ʻi fē ia ʻaia naʻe ʻai kiate ia hono Laumālie māʻoniʻoni?

12‌ʻAia naʻe tataki ʻakinautolu ʻaki ʻae nima toʻomataʻu ʻo Mōsese, ʻaki ʻa hono nima nāunauʻia,

ʻo vaheʻi ʻae vai ʻi honau ʻao,

ke ngaohi moʻona ha huafa taʻengata?

13‌ʻAia naʻe tataki ʻakinautolu ʻi he moana,

ʻo hangē ko e hoosi ʻi he toafa,

koeʻuhi ke ʻoua te nau tūkia?”

14‌ʻO hangē ko e ʻalu hifo ʻae fanga manu ki he vahaʻa moʻunga,

naʻe ngaohi ia ʻe he Laumālie ʻo Sihova ke mālōlō:

naʻe pehē hoʻo tataki ʻa hoʻo kakai, ke ngaohi moʻou ha huafa ongoongolelei.

15‌ʻAfio hifo mei he langi,

pea vakai mei he ʻafioʻanga ʻo hoʻo māʻoniʻoni pea mo ho nāunau:

kofaʻā ia hoʻo ʻofa mo hoʻo māfimafi,

ʻae ngaue ʻo hoʻo manavaʻofa pea mo hoʻo ngaahi ʻaloʻofa kiate au? Kuo ke taʻofi ia?

16Ko e moʻoni ko ʻemau tamai koe,

neongo ʻoku taʻeʻilo ʻakimautolu ʻe ʻEpalahame,

pea taʻetokangaʻi ʻakimautolu ʻe ʻIsileli:

ko koe, ʻE Sihova, ko ʻemau tamai,

ko homau huhuʻi; talu mei muʻa ʻoku taʻetupu ʻa ho huafa.

17‌ʻE Sihova, ko e hā kuo ke tuku ai ʻakimautolu ke mau hē mei ho ngaahi hala,

pea fakafefeka homau loto ke ʻoua te mau manavahē kiate koe?

Toe tafoki mai koeʻuhi ko hoʻo kau tamaioʻeiki,

ko e ngaahi faʻahinga ʻo ho tofiʻa.

18Kuo maʻu fuonounou pe ia ʻe he kakai ʻa hoʻo māʻoniʻoni:

kuo molomoloki ʻe homau ngaahi fili ʻa ho fale tapu.

19‌ʻOku ʻaʻau ʻakimautolu: naʻe ʻikai ʻaupito te ke puleʻi ʻakinautolu;

naʻe ʻikai ui ʻaki ʻakinautolu ʻa ho huafa.