1 Ko e enginaki ke fakamālō ki he ʻOtua ʻi he fiefia, 3 Koeʻuhi ko ʻene māfimafi, 4 Mo ʻene angalelei.

Ko e Saame ʻoe fakafetaʻi.

1Mou mavava ʻi he fiefia kia Sihova, ʻae ngaahi fonua kotoa pē.

2Tauhi ʻa Sihova ʻi he fiefia:

haʻu mo e hiva ki hono ʻao.

3Mou ʻilo ko Sihova ko ia pe ko e ʻOtua:

ko ia pe naʻa ne ngaohi ʻakitautolu,

ka naʻe ʻikai te tau ngaohi ʻakitautolu;

ko hono kakai ʻakitautolu,

mo e fanga sipi ʻo ʻene ngoue.

4Hū ʻi hono ngaahi matapā mo e fakafetaʻi,

pea ki hono ngaahi lotoʻā mo e fakamālō:

mou fakafetaʻi kiate ia, pea fakamālō ki hono huafa.

5He ʻoku angalelei ʻa Sihova;

ʻoku taʻengata ʻene ʻaloʻofa;

pea ʻoku tolonga maʻuaipē ʻene moʻoni mei he toʻutangata ki he toʻutangata.