1 ʻOku enginakiʻi ʻe Tevita hono loto ke fakamālō ki he ʻOtua. 5 ʻOku ne kole ki he tokoni ʻae ʻOtua ʻo fakatatau mo ʻene talaʻofa. 11 Ko ʻene tui ki he tokoni mei he ʻOtua.

Ko e Hiva pe ko e Saame ʻa Tevita.

1‌ʻE ʻOtua, kuo maʻu hoku loto;

te u hiva mo ʻatu ʻae fakamālō ʻaki hoku nāunau.

2Ke ʻā hake ʻae saliteli mo e haʻape:

te u ʻa hengihengi hake pe au.

3‌ʻE Sihova, te u fakamālō kiate koe ʻi he ʻao ʻoe kakai:

pea te u hiva fakamālō kiate koe ʻi he ngaahi puleʻanga.

4He ʻoku lahi hoʻo ʻaloʻofa ʻo māʻolunga hake ʻi he ngaahi langi:

mo hoʻo moʻoni ʻoku aʻu atu ki he ngaahi ʻao.

5‌ʻE ʻOtua, ke māʻolunga lahi hake koe ʻi he ngaahi langi:

pea ke māʻolunga hake ho nāunau ʻi māmani kotoa pē;

6Koeʻuhi ke hao ʻaia ʻoku ke ʻofa ai ke ke fakamoʻui

ʻaki ho nima toʻomataʻu, ʻo talia au.

7Kuo folofola ʻae ʻOtua ʻi heʻene māʻoniʻoni; te u fiefia,

“Te u vaeua ʻa Sikemi, ʻo fuofua ʻae luo ʻo Sukote.

8‌ʻOku ʻoʻoku ʻa Kiliati; ʻoku ʻoʻoku mo Manase;

ko hono mālohi foki ʻo hoku ʻulu ʻa ʻIfalemi;

ko ʻeku fai fono ʻa Siuta.

9Ko ʻeku ipu kaukauʻanga ʻa Moape;

te u lī hoku topuvaʻe ki ʻolunga ki ʻItomi;

te u vikiviki koeʻuhi ko Filisitia.”

10Ko hai te ne ʻomi au ki he kolo mālohi?

Ko hai te ne aʻutaki au ki ʻItomi?

11‌ʻE ʻOtua, ʻe ʻikai, te ke fai ia, ʻa koe kuo ke liʻaki ʻakimautolu?

Pea ʻikai te ke ʻalu atu, ʻE ʻOtua, mo ʻemau ngaahi kautau?

12Ke ke tuku kiate kimautolu ʻae tokoni ʻi he mamahi:

he ʻoku taʻeʻaonga ʻae tokoni ʻae tangata.

13Ko e meʻa ʻi he ʻOtua te tau fai mālohi ai:

he ko ia ia te ne malaki hifo hotau ngaahi fili.