1–176 ʻOku fakahā ʻe he saame ni ʻae ngaahi lotu, mo e ngaahi fakamālō, pea mo e ngaahi fakaʻilonga ʻoe talangofua.

ʻALIFA

1‌ʻOku monūʻia ʻae haohaoa ʻi he hala,

ʻaia ʻoku ʻeveʻeva ʻi he fono ʻa Sihova.

2‌ʻOku monūʻia ʻakinautolu ʻoku tauhi ʻene ngaahi fakamoʻoni,

pea kumi kiate ia ʻaki honau loto kotoa pē.

3‌ʻOku ʻikai foki tenau fai ha kovi:

ʻoku nau ʻaʻeva ʻi hono ngaahi hala.

4Kuo ke fekau mai ke mau tauhi maʻu hoʻo ngaahi akonaki.

5‌ʻOku ʻamusiaange ʻeau kuo fakahinohino ki hoku ngaahi hala,

ke fai ki hoʻo ngaahi tuʻutuʻuni.

6Pea ʻe ʻikai te u mā,

ʻo kau ka tokanga ki hoʻo ngaahi fekau kotoa pē.

7Te u fakamālō kiate koe ʻi he angatonu ʻoe loto,

ʻo kau ka ʻilo hoʻo ngaahi fakamaau māʻoniʻoni.

8Te u fai ki hoʻo ngaahi tuʻutuʻuni:

ʻoua naʻa ke siʻaki ʻaupito au.

PETA

9‌ʻE fakamaʻa ʻe he tangata talavou hono hala ʻi he hā?

ʻI heʻene tokanga ki ai ʻo hangē ko hoʻo folofola.

10Kuo u kumi kiate koe ʻaki hoku loto kotoa pē:

ʻoua naʻa tuku au ke u hē mei hoʻo ngaahi fekau.

11Kuo u fufū hoʻo folofola ʻi hoku loto,

koeʻuhi ke ʻoua naʻaku angahala kiate koe.

12‌ʻE Sihova, ʻoku monūʻia ʻa hoʻo ʻafio:

ako kiate au hoʻo ngaahi tuʻutuʻuni.

13Kuo u fakahā ʻaki hoku loungutu,

ʻae ngaahi fakamaau kotoa pē ʻa ho fofonga.

14Naʻaku fiefia ʻi hono ʻalunga ʻo hoʻo ngaahi fakamoʻoni,

ʻo tatau mo e ngaahi koloa kotoa pē.

15Te u fakalaulauloto ki hoʻo ngaahi akonaki,

pea te u tokanga ki ho ngaahi hala.

16Te u fakafiefiaʻi au ʻi hoʻo ngaahi tuʻutuʻuni:

ʻe ʻikai ngalo ʻiate au hoʻo folofola.

KIMELA

17Foaki ke lahi ki hoʻo tamaioʻeiki,

koeʻuhi ke u moʻui, pea te u tauhi ki hoʻo folofola.

18Ke ke fakaʻā hoku mata,

koeʻuhi ke u mamata ki he ngaahi meʻa fakaofo ʻi hoʻo fono.

19Ko e muli au ʻi māmani:

ʻoua naʻa fufū hoʻo ngaahi fekau ʻiate au.

20‌ʻOku mafesi hoku laumālie koeʻuhi ko ʻene holi ki hoʻo ngaahi fakamaau ʻi he ʻaho kotoa pē.

21Kuo ke valokiʻi ʻae laukau, ʻakinautolu ʻoku malaʻia,

ʻaia kuo hē mei hoʻo ngaahi fekau.

22‌ʻAve ʻiate au ʻae taukaea mo e manukia;

he kuo u fai ki hoʻo ngaahi fakamoʻoni.

23Naʻe nofo foki ʻae ngaahi ʻeiki ʻo lauʻikoviʻi au:

ka naʻe fakalauloto ʻa hoʻo tamaioʻeiki ki hoʻo ngaahi tuʻutuʻuni.

24Ko hoʻo ngaahi fakamoʻoni foki ko hoku fiefiaʻanga ia,

mo hoku ngaahi akonakiʻi.

TALETA

25‌ʻOku pikitai ʻa hoku laumālie ki he efu:

ke ke fakamoʻui au ʻo hangē ko hoʻo folofola.

26Kuo u fakahā hoku ngaahi hala, pea naʻa ke ongoʻi au:

ako kiate au hoʻo ngaahi tuʻutuʻuni.

27Ngaohi au ke u ʻilo ʻae hala ʻo hoʻo ngaahi akonaki:

pea te u lea ki hoʻo ngaahi ngāue fakaofo.

28Kuo vai ʻa hoku laumālie koeʻuhi ko e ongosia:

fakamālohiʻi au ʻo hangē ko hoʻo folofola.

29Ke ke hiki ʻiate au ʻae hala ʻoe loi,

pea ke tuku mai hoʻo fono kiate au ʻi he ʻofa.

30Kuo u fili ʻae hala ʻoe moʻoni:

pea kuo u fokotuʻu hoʻo ngaahi fakamaau ʻi hoku ʻao.

31Kuo u pikitai ki hoʻo ngaahi fakamoʻoni;

ʻE Sihova, ʻoua naʻa ke fakamaaʻi au.

32Te u lele ʻi he hala ʻo hoʻo ngaahi fekau,

ʻoka ke ka fakaʻataʻatā hoku loto.

HE

33‌ʻE Sihova, ke ke ako kiate au ʻae hala ʻo hoʻo ngaahi tuʻutuʻuni;

pea te u fai ki ai ʻo aʻu ki he ngataʻanga.

34Foaki mai kiate au ʻae faʻa ʻilo, pea te u fai ki hoʻo fono;

ʻio, te u tokanga ki ai ʻaki hoku loto kotoa pē.

35Ngaohi au ke u ʻalu ʻi he hala ʻo hoʻo ngaahi fekau;

he ʻoku ou fiefia ai.

36Fakatokangaʻi hoku loto ki hoʻo ngaahi fakamoʻoni,

kae ʻikai ki he manumanu.

37Taʻofi hoku mata mei he vakai ki he meʻa vaʻinga;

pea ke fakaakeake au ʻi ho hala.

38Fakamoʻoni hoʻo folofola ki hoʻo tamaioʻeiki,

ʻaia ʻoku fakaʻapaʻapa kiate koe.

39Taʻofi atu hoku manukia ʻaia ʻoku ou manavahē ai:

he ʻoku lelei hoʻo ngaahi fakamaau.

40Vakai, ʻoku ou holi ki hoʻo ngaahi akonaki:

fakamoʻui au ʻi ho māʻoniʻoni.

VAU

41‌ʻE Sihova, tuku ke hoko foki hoʻo ngaahi ʻaloʻofa kiate au,

ʻio, ko hoʻo fakamoʻui, ʻo hangē ko hoʻo folofola.

42Pehē te u maʻu ha meʻa ke tali ʻaki kiate ia ʻoku manukiʻi au: he ʻoku ou falala ki hoʻo folofola.

43Pea ʻoua naʻa toʻo ʻaupito ʻae folofola ʻoe moʻoni mei hoku ngutu;

he kuo u ʻamanaki lelei ki hoʻo ngaahi fakamaau.

44Pea te u fai maʻuaipē ki hoʻo fono ʻo lauikuonga pea taʻengata.

45Pea te u ʻeveʻeva ʻi he tauʻatāina:

he ʻoku ou kumi ki hoʻo ngaahi akonaki.

46Te u lea foki ki hoʻo ngaahi fakamoʻoni ʻi he ʻao ʻoe ngaahi tuʻi,

pea ʻe ʻikai te u mā ai.

47Pea te u fakafiefiaʻi au ʻi hoʻo ngaahi fekau,

ʻaia kuo u ʻofa ki ai.

48Te u hiki hake foki hoku nima ki hoʻo ngaahi fekau,

ʻaia kuo u ʻofa ki ai pea te u fakalaulauloto ki hoʻo ngaahi tuʻutuʻuni.

SAINI

49Manatuʻi ʻae folofola ki hoʻo tamaioʻeiki,

ʻaia kuo ke fakaʻamanakiʻi au ki ai.

50Ko hoku fiemālieʻanga eni ʻi heʻeku mamahi:

he ko hoʻo folofola kuo ne fakamoʻui au.

51Kuo manuki lahi kiate au ʻae laukau:

ka naʻe ʻikai te u afe mei hoʻo fono.

52‌ʻE Sihova, naʻaku manatu ki hoʻo ngaahi fakamaau ʻi muʻa;

pea u fakafiemālieʻi au.

53Kuo pukea au ʻe he ilifia koeʻuhi ko e angahala kuo nau siʻaki hoʻo fono.

54Ko hoʻo ngaahi tuʻutuʻuni ko ʻeku hiva ia ʻi he fale ʻo ʻeku ʻāunofo.

55‌ʻE Sihova, kuo u manatu ki ho huafa ʻi he pō,

pea u fai ki hoʻo fono.

56Naʻaku maʻu eni,

ko e meʻa ʻi heʻeku fai ki hoʻo ngaahi akonaki.

KETA

57‌ʻE Sihova, ko hoku ʻinasi ʻa koe:

naʻaku pehē te u fai ki hoʻo ngaahi folofola.

58Naʻaku kole ki hoʻo ʻofa ʻaki hoku loto kotoa pē:

ke ke ʻaloʻofa mai kiate au ʻo hangē ko hoʻo folofola.

59Naʻaku fifili ki hoku ngaahi ʻaluʻanga,

pea u fakaafe hoku vaʻe ki hoʻo ngaahi fakamoʻoni.

60Ne u fakatoʻotoʻo, pea ʻikai tuai,

ʻeku fai ki hoʻo ngaahi fekau.

61Kuo kaihaʻasia au ʻe he ngaahi kaihaʻakau ʻoe kau angahala:

ka naʻe ʻikai ngalo ʻiate au ʻa hoʻo fono.

62Te u tuʻu hake ʻi he tuʻuapō mālie ke fakafetaʻi kiate koe,

koeʻuhi ko hoʻo ngaahi fakamaau māʻoniʻoni.

63‌ʻOku ou kaumeʻa mo kinautolu kotoa pē ʻoku manavahē kiate koe,

mo kinautolu ʻoku fai ki hoʻo ngaahi fekau.

64‌ʻE Sihova, ʻoku fonu ʻa māmani ʻi hoʻo ʻaloʻofa:

ke ke ako kiate au ʻa hoʻo ngaahi tuʻutuʻuni.

TETA

65‌ʻE Sihova, kuo ke fie fai lelei ki hoʻo tamaioʻeiki,

ʻo hangē ko hoʻo folofola.

66Ke ke ako kiate au ʻae fakamaau lelei mo e faʻa ʻilo:

he ʻoku ou tui ki hoʻo ngaahi fekau.

67‌ʻI he teʻeki ai te u mahaki naʻaku hē:

ka ko eni kuo u fai ki hoʻo folofola.

68‌ʻOku ke angalelei, pea ʻoku ke fai lelei;

ke ke ako kiate au ʻa hoʻo ngaahi tuʻutuʻuni.

69Kuo fakatupu ʻe he fielahi ʻae loi kiate au:

ka te u fai ki hoʻo ngaahi akonaki ʻaki hoku loto kotoa pē.

70‌ʻOku tatau honau loto mo e ngako,

ka ʻoku ou fiefia ʻi hoʻo fono.

71Kuo ʻaonga kiate au ʻa hoku mahaki;

koeʻuhi ke u ʻilo ai hoʻo ngaahi tuʻutuʻuni.

IOTA

72‌ʻOku lelei lahi kiate au ʻae fono ʻaho fofonga ʻi he ngaahi afe ʻoe kuonga koula mo e siliva.

73Ko ho nima naʻa ne ngaohi au mo fakatonutonu: foaki mai ʻae poto,

koeʻuhi ke u ʻiloʻi hoʻo ngaahi fekau.

74Ko kinautolu ʻoku manavahē kiate koe tenau fiefia ʻoka nau ka mamata kiate au;

koeʻuhi naʻaku ʻamanaki ki hoʻo folofola.

75‌ʻE Sihova, ʻoku ou ʻilo ʻoku totonu hoʻo ngaahi fakamaau,

pea ʻi he angatonu kuo ke fakamamahiʻi au.

76‌ʻOku ou kole kiate koe, tuku ke fakafiemālieʻi au ʻe hoʻo ʻaloʻofa,

ʻo hangē ko hoʻo folofola ki hoʻo tamaioʻeiki.

77Tuku ke hoko kiate au hoʻo ngaahi ʻaloʻofa ongongofua,

koeʻuhi ke u moʻui ai:

he ko hoʻo fono ko hoku fiefiaʻanga ia.

78Tuku ke mā ʻae fielahi; he naʻa Tuku ke tafoki mai kiate au ʻakinautolu ʻoku manavahē kiate koe,

pea mo kinautolu kuo nau ʻiloʻi hoʻo ngaahi fakamoʻoni.

79Tuku ke tafoki mai kiate au ʻakinautolu ʻoku manavahē kiate koe,

pea mo kinautolu kuo nau ʻiloʻi hoʻo ngaahi fakamoʻoni.

80Tuku ke haohaoa hoku loto ʻi hoʻo ngaahi tuʻutuʻuni;

koeʻuhi ke ʻoua naʻaku mā ai.

KAFA

81‌ʻOku pongia hoku laumālie ʻi he fiemaʻu hoʻo fakamoʻui:

ka ʻoku ou ʻamanaki ki hoʻo folofola.

82‌ʻOku vaivai hoku mata koeʻuhi ko hoʻo folofola,

ʻoku ou pehē, “Te ke fakafiemālieʻi au ʻafē?”

83He kuo u hoko ʻo tatau mo e hina ʻi he ʻohuafi;

ka ʻoku ʻikai ngalo ʻiate au hoʻo ngaahi tuʻutuʻuni.

84‌ʻOku fiha ʻae ngaahi ʻaho ʻo hoʻo tamaioʻeiki?

Te ke fakamaau ʻafē ʻakinautolu ʻoku fakatangaʻi au?

85Kuo keli ʻe he fielahi ʻae ngaahi luo kiate au ʻaia ʻoku ʻikai tatau mo hoʻo fono.

86‌ʻOku tuʻumaʻu hoʻo ngaahi fekau kotoa pē:

ʻoku taʻetotonu ʻenau fakatangaʻi au; ke ke tokoniʻi au,

87Naʻa nau meimei fakaʻauha au ʻi māmani ka naʻe ʻikai te u siʻaki hoʻo ngaahi akonaki.

88Fakamoʻui au ʻo hangē ko hoʻo ʻaloʻofa;

ko ia te u tauhi ai ʻae fakamoʻoni ʻa ho fofonga.

LAMETA

89‌ʻE Sihova, ʻoku tuʻumaʻu hoʻo folofola ʻi he langi ʻo lauikuonga.

90‌ʻOku aʻu atu hoʻo moʻoni ki he ngaahi toʻutangata kotoa pē:

kuo ke fokotuʻu ʻa māmani, pea ʻoku tuʻumaʻu ia.

91‌ʻOku nau tolonga he ʻaho ni ʻo hangē ko hoʻo ngaahi tuʻutuʻuni:

he ko hoʻo kau tamaioʻeiki ʻae meʻa kotoa pē.

92Ka ne ʻikai ko hoku fiefiaʻanga ʻa hoʻo fono,

pehē, ne u mate ʻi hoku mahaki.

93‌ʻE ʻikai siʻi ngalo ʻiate au hoʻo ngaahi akonaki ʻo lauikuonga:

he ko ia kuo ke fakamoʻui ai au.

94‌ʻOku ʻaʻau au,

ke ke fakamoʻui au he kuo u kumi ki hoʻo ngaahi akonaki.

95Kuo tatali ʻae angahala kiate au ke tāmateʻi au:

ka te u fifili ki hoʻo ngaahi fakamoʻoni.

96Kuo u mamata ki hono ngataʻanga ʻoe haohaoa kotoa pē:

ka ʻoku laulahi ʻaupito ʻa hoʻo fekau.

MEMA

97‌ʻOku ou ʻofa lahi ki hoʻo fono:

ʻoku ou fakalaulauloto ki ai ʻi he ʻaho kotoa pē.

98Kuo ke ngaohi au ʻi hoʻo ngaahi fekau ke u poto hake ʻi hoku ngaahi fili:

he ʻoku ʻiate au maʻuaipē ia.

99‌ʻOku ou poto lahi hake ʻi heʻeku kau akonaki kotoa pē:

he ko hoʻo ngaahi fakamoʻoni ko hoku fakakaukauʻanga ia.

100‌ʻOku ou ʻilo lahi hake ʻi he kau mātuʻa,

koeʻuhi ʻoku ou tauhi hoʻo ngaahi akonaki.

101Naʻaku taʻofi hoku vaʻe mei he hala kovi kotoa pē,

koeʻuhi ke u fai ki hoʻo folofola.

102Naʻe ʻikai te u afe mei hoʻo ngaahi fakamaau:

he kuo ke akonakiʻi au.

103‌ʻOku huʻamelie lahi hoʻo ngaahi folofola ki hoku ifo!

ʻIo, ʻoku melie lahi ʻi he hone ki hoku ngutu!

104‌ʻOku ou maʻu ʻae poto ʻi hoʻo ngaahi akonaki:

ko ia ʻoku ou fehiʻa ai ki he hala kotoa pē ʻoe loi.

NUNA

105Ko hoʻo folofola ko e tūhulu ia ki hoku vaʻe,

mo e maama ki hoku hala.

106Kuo u fuakava, pea te u fai ki ai,

ke u fai ki hoʻo ngaahi fakamaau māʻoniʻoni.

107‌ʻOku lahi ʻaupito hoku mahaki:

fakamoʻui au, ʻE Sihova, ʻo hangē ko hoʻo folofola.

108‌ʻE Sihova, ʻoku ou kole kiate koe, ke ke maʻu ʻae ngaahi feilaulau loto lelei ʻa hoku ngutu,

pea ke ako kiate au hoʻo ngaahi fakamaau.

109‌ʻOku ʻi hoku nima maʻuaipē ʻa ʻeku moʻui:

ka ʻoku ʻikai ngalo ʻiate au hoʻo fono.

110Kuo ʻai ʻe he angahala ʻae tauhele kiate au:

ka naʻe ʻikai te u hē mei hoʻo ngaahi akonaki.

111Kuo u maʻu ʻa hoʻo ngaahi fakamoʻoni ko hoku tofiʻa ʻo lauikuonga:

he ko e fiefiaʻanga ia ʻo hoku loto.

112Kuo u fakatokangaʻi hoku loto ke fai maʻuaipē ki hoʻo ngaahi tuʻutuʻuni,

ʻo aʻu ki he ngataʻanga.

SAMEHA

113‌ʻOku ou fehiʻa ki he ngaahi mahalo kovi:

ka ʻoku ou ʻofa ki hoʻo fono.

114Ko koe ko hoku toitoiʻanga, mo hoku fakaū;

ʻoku ou ʻamanaki lelei ʻi hoʻo folofola.

115‌ʻAlu ʻiate au, ʻakimoutolu ʻoku fai kovi:

he te u fai ki he ngaahi fekau ʻa hoku ʻOtua.

116Poupou hake au ʻo hangē ko hoʻo folofola, koeʻuhi ke u moʻui ai.

Pea ʻoua naʻa tuku au ke u mā ʻi heʻeku ʻamanaki.

117Ke ke poupou hake au, pea te u hao ai:

pea te u tokanga maʻuaipē ki hoʻo ngaahi tuʻutuʻuni.

118Kuo ke malaki hifo ʻakinautolu kotoa pē ʻoku hē mei hoʻo ngaahi tuʻutuʻuni:

he ko ʻenau kākā ko e loi ia.

119‌ʻOku ke siʻaki ʻae kau angahala kotoa pē ʻo māmani ʻo hangē ko e ʻotoʻota:

ko ia ʻoku ou ʻofa ai ki hoʻo ngaahi fakamoʻoni.

120‌ʻOku tetetete hoku kakano ko e meʻa ʻi heʻeku manavahē kiate koe;

pea ʻoku ou manavahē ki hoʻo ngaahi fakamaau.

OINI

121Kuo u fai ʻae fakamaau mo e angatonu:

ʻoua naʻa tukuange au ki he kau fakamālohi kiate au.

122Ke ke hoko ko e ungakiʻi ki hoʻo tamaioʻeiki ke u lelei ai;

ʻoua naʻa tuku ke taʻomia au ʻe he fielahi.

123‌ʻOku vaivai hoku mata koeʻuhi ko hoʻo fakamoʻui,

pea mo e folofola ʻo hoʻo māʻoniʻoni.

124Fai ki hoʻo tamaioʻeiki ʻo hangē ko hoʻo ʻaloʻofa,

pea ke ako kiate au ʻa hoʻo ngaahi tuʻutuʻuni.

125Ko hoʻo tamaioʻeiki au; foaki mai ʻae poto,

koeʻuhi ke u ʻilo ai hoʻo ngaahi fakamoʻoni.

126‌ʻE Sihova, kuo hoko ʻae kuonga ke ke ngāue ai:

he kuo nau fakataʻeʻaongaʻi hoʻo fono.

127Ko ia ʻoku ou ʻofa lahi hake ki hoʻo ngaahi fekau ʻi he koula;

ʻio, ʻi he koula lelei.

128Ko ia ʻoku ou pehē ʻoku totonu hoʻo ngaahi akonaki kotoa pē;

pea ʻoku ou fehiʻa ki he hala kotoa pē ʻoe loi.

PE

129‌ʻOku fakamanavahē hoʻo ngaahi fakamoʻoni:

ko ia ʻoku fai ki ai ʻa hoku laumālie.

130Ko e hū loto ʻa hoʻo ngaahi folofola ʻoku foaki ai ʻae maama;

ʻoku ʻomi ʻe ia ʻae poto ki he taʻekākā.

131Ne u mafaʻa hoku ngutu,

pea u holi he ʻoku ou feinga ki hoʻo ngaahi fekau.

132Ke ke ʻafio mai kiate au, mo ke ʻaloʻofa kiate au,

ʻo hangē ko hoʻo faʻa fai kiate kinautolu ʻoku ʻofa ki ho huafa.

133Tuʻutuʻuni ʻeku ngaahi laka ʻi hoʻo folofola:

pea ʻoua naʻa tuku ke pule kiate au ha hia ʻe taha.

134Fakamoʻui au mei he fakamālohi ʻae tangata:

pea te u fai ki hoʻo ngaahi akonaki.

135Tuku ke ulo mai ho fofonga ki hoʻo tamaioʻeiki;

pea ke ako kiate au hoʻo ngaahi tuʻutuʻuni.

136‌ʻOku tafe hifo ʻae ngaahi vaitafe ʻi hoku mata,

koeʻuhi ʻoku ʻikai tenau tokanga ki hoʻo fono.

SATI

137‌ʻE Sihova, ʻoku ke angatonu,

pea ʻoku totonu hoʻo ngaahi fakamaau.

138‌ʻOku māʻoniʻoni pea ʻoku tuʻumaʻu ʻaupito hoʻo ngaahi fakamoʻoni,

ʻaia kuo ke fekau mai.

139Kuo u ʻosiʻosiloto ʻi heʻeku fai feinga,

koeʻuhi kuo ngalo ʻi hoku ngaahi fili hoʻo ngaahi folofola.

140‌ʻOku haohaoa ʻaupito hoʻo folofola:

ko ia ʻoku ʻofa ki ai ʻa hoʻo tamaioʻeiki.

141‌ʻOku ou siʻi au mo manukia:

ka ʻoku ʻikai ngalo ʻiate au hoʻo ngaahi akonaki.

142Ko hoʻo māʻoniʻoni ko e māʻoniʻoni taʻengata,

pea ko hoʻo fono ko e moʻoni ia.

143Kuo pukea au ʻe he mamahi mo e feinga:

ka ko hoʻo ngaahi fekau ko hoku fiefiaʻanga ia.

144‌ʻOku taʻengata ʻae māʻoniʻoni ʻo hoʻo ngaahi fakamoʻoni:

ke ke foaki mai ʻae poto, pea te u moʻui ai.

KOFI

145Naʻaku tangi ʻaki hoku loto kotoa;

ke ke ongoʻi au, ʻE Sihova:

te u fai ki hoʻo ngaahi tuʻutuʻuni.

146Ne u tangi kiate koe; fakamoʻui au,

koeʻuhi ke u fai ki hoʻo ngaahi fakamoʻoni.

147Naʻaku muʻomuʻa ʻi he maʻa ʻae ʻaho, pea u tangi:

ne u ʻamanaki ʻi hoʻo folofola.

148‌ʻOku muʻomuʻa ʻa hoku mata ki he ngaahi leʻo ʻoe pō,

koeʻuhi ke u fakakaukau ki hoʻo folofola.

149Ke ke fanongo ki hoku leʻo ʻo hangē ko hoʻo ʻaloʻofa:

ʻE Sihova, fakamoʻui au ʻo hangē ko hoʻo fakamaau.

150‌ʻOku ʻunuʻunu mai ʻakinautolu ʻoku nau angimui ki he kovi:

ʻoku nau mamaʻo mei hoʻo fono.

151‌ʻOku ke ofi mai, ʻE Sihova;

pea ʻoku moʻoni hoʻo ngaahi fekau kotoa pē.

152Koeʻuhi ko hoʻo ngaahi fakamoʻoni,

kuo fuoloa ʻeku ʻilo kuo ke fakamaau ia ʻo lauikuonga.

LESA

153Ke ke tokanga ki hoku mahaki, pea ke fakamoʻui au:

he ʻoku ʻikai ngalo ʻiate au hoʻo fono.

154Ke ke fakamatala ʻeku meʻa, mo fakahaofi au:

fakamoʻui au ʻo hangē ko hoʻo folofola.

155‌ʻOku mamaʻo ʻae fakamoʻui mei he angahala:

he ʻoku ʻikai tenau kumi ki hoʻo ngaahi tuʻutuʻuni.

156‌ʻOku lahi hoʻo ngaahi ʻaloʻofa ongongofua, ʻE Sihova:

fakamoʻui au ʻo hangē ko hoʻo ngaahi fakamaau.

157‌ʻOku tokolahi hoku kau fakatanga mo hoku ngaahi fili;

ka ʻoku ʻikai te u afe mei hoʻo ngaahi fakamoʻoni.

158Naʻaku mamata ki he kau talangataʻa, pea u mamahi ai;

koeʻuhi naʻe ʻikai tenau fai ki hoʻo folofola.

159Ke ke ʻafio ki hono anga ʻo ʻeku ʻofa ki hoʻo ngaahi akonaki:

fakamoʻui au, ʻE Sihova, ʻo hangē ko hoʻo ʻaloʻofa.

160‌ʻOku moʻoni hoʻo folofola mei hono kamataʻanga:

pea ʻoku tolonga ʻo taʻengata hoʻo ngaahi fakamaau māʻoniʻoni kotoa pē.

SINI.

161Kuo fakatanga au taʻehanoʻuhinga ʻe he ngaahi ʻeiki:

ka ʻoku fakaʻapaʻapa ʻa hoku loto ki hoʻo folofola.

162‌ʻOku ou fiefia ʻi hoʻo folofola,

ʻo hangē ko e taha ʻoku ne ʻilo ʻae koloa lahi.

163‌ʻOku ou fehiʻa mo fākaliliʻa ki he loi:

ka ʻoku ou ʻofa ki hoʻo fono.

164‌ʻOku ou fakamālō kiate koe ʻo liunga fitu ʻi he ʻaho,

koeʻuhi ko hoʻo ngaahi fakamaau māʻoniʻoni.

165‌ʻOku maʻu ʻae fiemālie lahi ʻekinautolu ʻoku ʻofa ki hoʻo fono:

pea ʻe ʻikai tūkia ʻakinautolu ʻi ha meʻa.

166‌ʻE Sihova, kuo u ʻamanaki ki hoʻo fakamoʻui,

pea kuo u fai ki hoʻo ngaahi fekau.

167Kuo tauhi ʻe hoku laumālie ʻa hoʻo ngaahi fakamoʻoni;

pea ʻoku ou ʻofa lahi ʻaupito ki ai.

168Kuo u fai ki hoʻo ngaahi akonaki mo hoʻo ngaahi fakamoʻoni:

he ʻoku ʻi ho ʻao hoku ngaahi ʻaluʻanga kotoa pē.

TAU

169‌ʻE Sihova, tuku ke aʻu atu ʻeku tangi ʻo ofi kiate koe:

ke ke foaki mai ʻae poto ʻo hangē ko hoʻo folofola.

170Tuku ke aʻu atu ʻeku lotu tāumaʻu ki ho ʻao:

fakamoʻui au ʻo hangē ko hoʻo folofola.

171‌ʻE huaʻaki ʻe hoku loungutu ʻae fakamālō,

ʻoka ke ka ako hoʻo ngaahi tuʻutuʻuni kiate au.

172‌ʻE lea ʻaki ʻe hoku ʻelelo hoʻo folofola:

he ʻoku māʻoniʻoni hoʻo ngaahi fekau kotoa pē.

173Ke tokoni au ʻe ho nima;

he kuo u fili hoʻo ngaahi akonaki.

174‌ʻE Sihova, ʻoku ou holi ki hoʻo fakamoʻui;

pea ko hoʻo fono ko hoku fiefiaʻanga ia.

175Tuku ke moʻui ʻa hoku laumālie, pea ʻe fakamālō ia kiate koe;

pea ke tokoni au ʻe hoʻo ngaahi fakamaau.

176Naʻaku hē ʻo hangē ko e sipi kuo mole;

ke ke kumi hoʻo tamaioʻeiki;

he ʻoku ʻikai ngalo ʻiate au hoʻo ngaahi fekau.