1 ʻOku lotu ʻa Tevita ke toe ʻomi ia ki he falelotu lahi, pea ne fakahā te ne tauhi fiefia ai ʻae ʻOtua. 5 ʻOku ne enginakiʻi hono laumālie ke falala ki he ʻOtua.

1‌ʻE ʻOtua, ke ke fakamaau au, ʻo langomakiʻi au telia ʻae puleʻanga angakovi:

ke ke fakamoʻui au mei he tangata kākā mo taʻeangatonu.

2He ko koe ko e ʻOtua ʻo ʻeku mālohi: ko e hā ʻoku ke liʻaki ai au?

Ko e hā ʻoku ou ʻalu mamahi pe ʻi he taʻomia ʻe he fili?

3Ke ke fekau atu hoʻo maama mo hoʻo moʻoni:

tuku ke na tataki au;

tuku ke na ʻomi au ki ho moʻunga māʻoniʻoni,

mo ho ngaahi fale fehikitaki.

4Ko ia te u toki ʻalu atu ki he feilaulauʻanga ʻoe ʻOtua,

ki he ʻOtua ko hoku fiefiaʻanga lahi ʻaupito:

ʻio, ʻi he haʻape te u fakamālō kiate koe, ʻE ʻOtua ko hoku ʻOtua.

5Ko e hā ʻoku ke mapelu ai ki lalo, ʻE hoku laumālie?

pea ko e hā ʻoku ke maveuveu ai ʻi loto ʻiate au?

ʻAmanaki lelei ki he ʻOtua:

he ko e moʻoni te u fakafetaʻi kiate ia,

ʻaia ko e fakamoʻui ʻo hoku mata, mo hoku ʻOtua.