1 Ko e tokoni ʻaki ʻe Tevita ʻene hū ʻi heʻene ʻiloʻi ʻae ʻofa, mo e angalelei, mo e mālohi ʻae ʻOtua. 11 ʻOku ne holi ke ne maʻu pe ʻae hala ʻo ia. 14 ʻOku hanu ia ʻi he kau fielahi, pea ne kole fakaʻilonga ki he angalelei ʻae ʻOtua.

Ko e Lotu ʻa Tevita.

1‌ʻE Sihova, ke ke fofonga mai, ʻo fanongo kiate au:

he ʻoku ou masiva mo mamahi.

2Fakamoʻui hoku laumālie; he ʻoku ou māʻoniʻoni:

ʻa koe ko hoku ʻOtua, fakamoʻui hoʻo tamaioʻeiki ʻaia ʻoku falala kiate koe.

3‌ʻE ʻEiki, ke ke ʻaloʻofa kiate au:

he ʻoku ou tangi kiate koe ʻi he ʻaho kotoa pē.

4‌ʻE ʻEiki, fakafiefiaʻi ʻae laumālie ʻo hoʻo tamaioʻeiki:

he ʻoku ou hiki hake hoku laumālie kiate koe.

5He ko koe, ʻE ʻEiki ʻoku ke angalelei, pea faʻa fakamolemole;

pea mohu ʻaloʻofa kiate kinautolu kotoa pē ʻoku ui kiate koe.

6Fanongo, ʻE Sihova, ki heʻeku lotu

pea tokanga ki he leʻo ʻo ʻeku ngaahi lotu tāumaʻu.

7‌ʻI he ʻaho ʻo ʻeku mamahi te u ui kiate koe;

he te ke talia au.

8‌ʻE ʻEiki, ʻoku ʻikai ha tokotaha ʻi he ngaahi ʻotua ʻoku tatau mo koe;

pea ʻoku ʻikai ha ngāue ʻe hangē ko hoʻo ngaahi ngāue.

9‌ʻE ʻEiki, ʻe haʻu ʻo hū ʻi ho ʻao ʻae ngaahi puleʻanga kotoa pē naʻa ke ngaohi;

pea tenau fakaongoongoleleiʻi ho huafa.

10He ʻoku ke lahi, pea ʻoku ke fai ʻae ngaahi meʻa mana:

ko koe pē ko e ʻOtua.

11‌ʻE Sihova, ako kiate au ho hala;

te u ʻeveʻeva ʻi hoʻo moʻoni:

ngaohi ke taha pē hoku loto ke manavahē ki ho huafa.

12‌ʻE ʻEiki ko hoku ʻOtua, te u fakafetaʻi kiate koe ʻaki hoku loto kotoa:

pea te u fakaongoongolelei ho huafa ʻo taʻengata.

13He ʻoku lahi hoʻo ʻaloʻofa kiate au:

pea kuo ke fakamoʻui hoku laumālie mei he loto heli.

14‌ʻE ʻOtua, kuo tuʻu hake kiate au ʻae kau fielahi,

pea naʻe kumi hoku laumālie ʻe he ngaahi fakataha ʻoe kau fakamālohi;

pea ʻoku ʻikai tenau fokotuʻu ʻa hoʻo ʻafio ʻi honau ʻao.

15Ka ko koe, ʻE ʻEiki, ko e ʻOtua ʻoku fonu ʻi he manavaʻofa, mo e angalelei,

ʻoku ke kātaki fuoloa, pea mohu ʻaloʻofa mo e moʻoni.

16Ke ke tafoki mai kiate au, pea ʻaloʻofa kiate au;

foaki ho mālohi ki hoʻo tamaioʻeiki,

pea fakamoʻui ʻae tama ʻa hoʻo kaunanga.

17Fakahā kiate au ʻae fakaʻilonga ʻoe lelei;

koeʻuhi ke mamata ki ai ʻakinautolu ʻoku fehiʻa kiate au, pea mā ai:

koeʻuhi kuo ke tokoniʻi au, ʻE Sihova, ʻo fakafiemālieʻi au.