Viewing:

Kukumbuchila Deuteronomy 32

Select a Chapter

1“Uwiche goya makutu, gwa ulanga, nani ndolonga,

hegwe isi uhulichize ulonzi wondilingulonga.

2Malanguso ga heni nagalagale kota nhonya,

ulonzi wa heni ulagale kota nhungwi,

na kota upesi wa nhonya kuli mizuchila mido,

kota upesi wa nhonya kuli misolo midodi.

3Mina ndolidamla itagwa lya Mkulu Nguluwi,

namwe mlonje, ‘Nguluwi wa hetwe ka Mkulu!’

4“Mkulu Nguluwi ndo Italawe lya kwamila,

mijito ja heye jenela,

nzila za heye zeng'ha ndo za hachi.

Heye ndo Nguluwi wa kitumbila yalihela nongwa,

heye kangudita mbuli za kukomya na za hachi.

5Ila hemwe mwahela utumbilo kwa heye,

hemwe hamuwele wana wa heye kahi kwa chiwalo cha soni,

hemwe ndo lulelo lwihile na lwajilile.

6Mwangujeza ndaze kumditila ahyo Mkulu Nguluwi,

hemwe wanhu wapoka na msowile nyhala?

Ndaze, heye hawele mhaza wa hemwe yawalumbile,

yawaditile na kuwakangaza?

7Mkumbuchile mazuwa gapulute,

mijese miyaka ja katali,

muwauze wahaza wa hemwe na hewo wowazelesa,

muwauze wakulu wa hemwe na hewo wowalonjelani.

8Nguluwi yawele kuchanya hoyazipele isi zeng'ha lufufu lwao,

naloyawagawile wanhu weng'ha,

chila isi nakaibasila mbaka,

kwa kuwinza winji wa wana wa Isilaeli,

9ila nakewichila wana wa Yakobo wawe wa heye, Mkulu Nguluwi,

awo nakehagulila wawe wa heye.

10“Nakawafika kuli isi igunuche,

chiwala cheng'ha chiwele na mbeho.

Nakawamila na kuwalolela,

nakawadita kota iziho lya heye.

11Kota ikungule vyolilingulolela chimvulila chake,

na kugulukaguluka mchanya mwa mibofu jake,

yogolosa mbawa zake leka kuwebatilila,

na kuwapapa mchanya mwa mbawa zake.

12Heye yuye Mkulu Nguluwi nakawalongoza

na hakuwele na mlungu yunji wa kumtanza.

13Nakamkwiniza hali honhu ha isi henuche,

na heye nakalya mbena ya mgunda.

Nakawapa hanombwa nailawile kuli italawe

na mafuta galawile kuli italawe ikavu.

14Nakawapa mtindi na matombo ga migongolo

na mafuta ga ming'holo myana,

na ming'holo milume ja Bashani na mhene.

Nakawapa ngano inojile ng'hatu na divai inyale nawanwa.

15“Lelo Waisilaeli nawaneneha na kutowa teche,

nawaneneha na wawa na mida kusu na kudedemka,

hamba nawamleka Nguluwi yawalumbile,

nawabeza Italawe lya kwamila naliwele ndo ulohozi wa hewo.

16Nawamdita yone fihi kwa milungu jawo,

nawamdita yazudile kwa madito ga hewo ga kuzudiza.

17Nawavilavila nhambiko vijeni, vyohaviwele Nguluwi, nawajilutila milungu johawajizelele ng'oo,

milungu minyale jilawile mazuwa ga sambi baha,

jiwele wasekulu wa hewo hawajikundile hebu.

18Hawakumbuchile Italawe lya kwamila liwapele ukomu,

namumsemwa Nguluwi yawapondile hemwe.

19“Mkulu Nguluwi nakayona mbuli ayo nakawaleka,

nakawalema wana wa heye, walume na wadala.

20Nakalonga, ‘Ndovisa kumeho kwa heni,

ndole kuduma kwa hewo wowa ndaze.

Mina hewo ndo lulelo lwajilile,

wana wohawawele wakitumbila ng'hatu.

21Nawandita mbone fihi kwa chinhu chohachiwele nguluwi,

wanzudiza kwa jimalukolo ja hewo.

Ahyo ndowadita wone maya kwa chohachiwele wanhu,

ndowazudiza kwa yila nhanzi ya wapoka.

22Ng'halazi ya heni yokwaka kota chiluli,

chowasoma mbaka isi ya wabagame,

cholakaza isi na mbena,

chosoma misisi ja vidunda.

23“ ‘Ndowika magazo menji ng'hatu kwa chiwalo cha hewo,

ndowakongozela misale ja heni.

24Woganda kwa nzala,

wodumigwa kwa kugula lukami kwa matamwa.

Ndohilika migongolo jiwele na mizino jihongoche kuwaluma,

na mizoka jiwele na dunga jilingutambala kuli nhimbwisi.

25Ngondo yokwambuza kubagama kwinji kunze

na haluga lunhwinhwi lolongoza,

wasongolo na wahinza wokopoligwa

na wala walingong'a na wasekulu wawele na mbuliza hawopona hebu.

26Nandonga, “Nandawadumile ng'hatu

na kuwadita mleche kukumbuchilwa kahi na munhu yoneche,”

27ila kwa chiwalo cha kidaya kwa wang'honyo wa hewo,

leka wang'honyo waleche kulonga, “Hetwe natuwasumya,

na Mkulu Nguluwi nahaditile mbuli azi.” ’

28“Isilaeli ndo isi isowile nyhala,

wanhu wake wahela luhala mgati mwake.

29Wone wahawele na luhala nawahavizelele lekachoni nawalemwela,

nawahajezile kuvizela kuduma kwa hewo kowa ndaze.

30Munhu yumwe koweza ndaze kuwadumya wanhu elufu imwe,

ama wanhu weli woweza ndaze kuwadumya wanhu elufu kumi,

ila wone Italawe lya kwamila hewo naliwataga,

Mkulu Nguluwi wa hewo nakawaleka?

31Na wang'honyo wa hetwe nawakunda hazelu,

kota hewo wahela ludali kota Italawe lya hetwe lya kwamila.

32Mina mizabibu ja hewo ndo mizuchila ja Sodoma

jilawile kuli ibindi lya Gomola,

zabibu zake ndo ziwele na dunga,

zabibu zake zausungu.

33Divai ya hewo ndo kota dunga ya mizoka,

ina dunga yihile ya ngole.

34“Ndaze ndahela nzila ya kuwagaza?

Ndangubeteza mhela unojile wa kuwagaza hewo.

35Kuhilula chibida ndo kwa chiwalo cha heni, heni ndolipiza,

mhela magulu ga hewo hogotelela,

mina zuwa lya hewo lya kubagama lyuya,

kuduma kwa hewo kwa habehi ng'hatu.

36Mkulu Nguluwi kowalewela wanhu wa heye

na kuwonela isungu vitumagwa wa heye,

mhela hoyokona ludali lwawo luduma

na haduhu yaponile, yawele mchinweng'ho ama munhu yelejehe.

37Aho ndo Mkulu Nguluwi hoyowauza wanhu wa heye,

‘Ja kohi jila milungu ja hemwe,

Italawe lyomlibilimile kwa kwamilwa?’

38Ja kohi ajo milungu ja hemwe jidile mafuta ga nhambiko,

na kunwa divai na nhambiko za hemwe za chakunwa?

Lelo najime, jiwatanzeni,

jiwamile hemwe.

39“ ‘Mlole kota heni nda Nguluwi

na kuduhu yunji ila heni.

Heni ndangukopola na kuwika ukomu,

ndangulumiza na kuwika goya,

na kuduhu yoweza kumlohola yoneche kuli moko ga heni.

40Ndangugolola moko ga heni kilanga,

na kilaha kwa ukomu wa heni wa mazuwa gose,

41wone nole ipanga lyangu lilingupulika,

na kugolola moko kulavya utaguso,

ndowahilusila chibida wang'honyo wa heni,

ndowagaza wala walingunzudila heni.

42Misale ja heni ndojigaliza kwa danda,

ipanga lyangu lyochiguta miwunde,

lyododa danda ya walumizwe na wapogozi

na wang'honyo wawele na mnvili zisoloche.’

43“Hemwe isi msangalale na wanhu wa hemwe,

mina heye nakahilulaga chibida kwa danda ya vitumagwa wa heye,

kanguwaditila uhanyisi walingitwanza na heye

na kuyeliza isi ya wanhu wa heye.”

44Musa nakoya hamwe na Yoshua, mwana wa Nuni, nawadekuliza ulonzi wa lwimbo alu, leka Waisilaeli weng'ha wauhuliche.

Ulonzi wa Musa

45Musa loyasindile kuwalonjela wanhu wa Isilaeli ulonzi awu weng'ha, 46nakawalonjela, “Muuwiche mnhumbula za hemwe ulonzi weng'ha wondilinguwapani lehano, leka muwalajize wana wa hemwe wawinze goya ulonzi weng'ha wa malajizo aga. 47Mina malajizo aga hagawele ulonzi hela, ila ndo ukomu wa hemwe, kwa malajizo aga, mochikala kwa miyaka minji kuli isi yomlinguluta kuihola, kumwambu mwa lwanda lwa Yolodani.”

48Zuwa lilyo, Mkulu Nguluwi nakamlonjela Musa, 49“Ukwine chidunda achi cha Abalimu, chidunda cha Nebo kuli isi ya Moabu, chilingilola na muji wa Yeliko, ukailole isi ya Kanaani yondilinguwapa Waisilaeli waihole. 50Hamba kobagama kuko kuchidunda kota mkulugo Aluni navyoyabagame kuli chidunda cha Holi, 51kwa vila weng'ha weli nambena kitumbila kwa hemwe kwa heni hali Waisilaeli nalomuwele kuli mazi ga Meliba, habehi na muji wa Kadeshi, kuli kuchiwala cha Sini, na mlemwela kunditila heni kota nda yelile hali Waisilaeli. 52Koyona isi iwele kumwando kwa hegwe, ila haukwinjila kuli isi ayo yondilinguwapa Waisilaeli.”