Viewing:

Hose Hosea 14

Select a Chapter

1Samari kaane yulubine saranma e ra nɛn,

amasɔtɔ e bata murutɛ e Ala xili ma.

E faxama nɛn silanfanna ra,

e dii ɲɔrɛne bira bɔxɔni,

e ɲaxalan fudikanne kuine rabɔ ayi.

Isirayila kaane xa tubi Ala ma

2Isirayila, fa Alatala ma, i ya Ala!

Amasɔtɔ i hakɛne bata i rabira.

3Ɛ tubi Alatala ma

ɛ a mafan falan na.

Ɛ a fala a xa, ɛ naxa,

“Nxu mafelu nxu hakɛne birin na,

i nxu rasɛnɛ ki faɲi,

alogo nxu xa tantun xuiin findi nxɔ saraxan na.

4Asiriya kaa mi nxu rakisɛ,

nxu mi tema soone fari yɛngɛ xinla ma.

Nxu mi fa a falɛ nxɔ se rafalaxine ma, ‘Nxɔ ala!’

Amasɔtɔ i tan nan kininkininma kiridine ma.”

5N na e xɔnfenma nɛn e na xun xɔn sigani.

N na e xanuma nɛn fonisireyaan na,

amasɔtɔ n ma xɔlɔn bata xɛtɛ e fɔxɔ ra.

6N luma nɛn Isirayila xa alo xiila,

a tofanma nɛn

alo gabalan fugaxina.

A sabatima nɛn

alo wudi binla naxanye Liban yamanani,

7alo wudi binla na maɲingi a faɲin na,

a tofanma nɛn alo oliwi wudina,

a xiri faɲin yi mini

alo Liban suman fɔtɔnne.

8Yamaan fama Isirayila ma

alo e soma wudi binla nan ninin bun.

E maala mɔn fanma nɛn.

E sabatima

alo manpa binla na fuga.

E xinla sɔtɔma nɛn

alo Liban minseen faɲina.

9Efirami bɔnsɔnna,

nanse mɔn nxu nun suxurene tagi?

N tan nan i ramɛma,

n yi n yengi sa i xɔn.

N luma nɛn i xa

alo wudi gbee xindena.

I bogin sɔtɔma n tan nan na.

10Fekolonna nde ra?

A xa feni itoe famu!

Xaxilimane xa e yɛɛ to!

Amasɔtɔ Alatalaa kirane tinxin,

tinxin muxune sigan tima nɛn e xɔn,

koni murutɛ muxune dagalanma ayi nɛn na yi.