Viewing:

Esayi Isaiah 33

Select a Chapter

Gbalon halagi tiin xa

1Gbaloni i xa,

i tan naxan halagin tima

i tan naxan munma halagin sɔtɔ singen,

i tan naxan bonne yanfama

muxe munma i tan naxan yanfa singen!

I na yelin halagin tiyɛ waxatin naxan yi,

i fan yi halagi.

I na yanfantenyaan dan waxatin naxan yi,

muxune yi i fan yanfa.

2Alatala, hinan nxu ra!

Nxu xaxili tixi i tan nan na.

Findi nxu fangan na xɔtɔn yo xɔtɔn,

i nxu rakisi tɔrɔ waxatini!

3Siyane na i xuiin mɛ,

e yi e gi.

I nɛɛn fa keli,

yamanane muxune bata xuya ayi.

4Ɛ tan siyane,

ɛ seen naxanye tongoxi yɛngɛni,

muxune bata fu na ma

alo tuguminne na so.

Muxune dutunma ne ma

alo suɲɛ sɛtɛna.

5Alatala na feene birin xun ma

bayo a dɔxi kore xɔnna ma.

A bata sariyan nun tinxinna raso Siyon taan yiren birin yi.

6I tan, Alatalaa yamana,

i luma nɛn makantanni.

Xaxilimayaan nun Ala kolonna findixi kisin nan na,

e nun Marigin binyana

na nan findixi i ya nafunla ra.

Ala kelima nɛn yaxune xili ma

7Sofa wɛkilɛxine nan gbelegbele xui ito ra kirane xɔn.

Bɔɲɛ xunbenla rali muxune yi xɛtɛ wugɛ xɔlɛni.

8Kirane bata rabeɲin,

muxu yo mi fa danguma kirane xɔn.

Yaxun bata layirin kala,

a yi taane raɲaxu,

a mi muxu yo binyaxi.

9Yamanan bata lu sununi,

a kalama.

Liban yamanan bata yagi,

a fɔtɔnna bata xara.

Sarɔn mɛrɛmɛrɛn luxi

alo tonbonna,

Basan nun Karemele yamanane wudine dɛɛne yi yolon.

10Alatala naxa,

“Iki, n bata keli.

Iki, n na n ma binyen mayitama nɛn.

Iki, n na n ma fe yitema nɛn.

11Ɛ feen naxanye yitɔnma,

ne luxi nɛn

alo se dagina hanma sɛxɛna.

Ɛ yɛtɛɛn yengin yi findi tɛɛn na

naxan ɛ raxɔrima.

12Siyane ganma nɛn

e lu alo xuben sulun tɛɛni,

alo tansinne na masɛgɛ,

e gan.”

13Ɛ tan naxanye makuya,

ɛ tuli mati n naxan ligaxi.

Ɛ tan naxanye maso,

ɛ n sɛnbɛn yatɛn kolon.

14Yulubitɔne bata gaxu Siyon yi,

xuruxurunna bata so Ala kolontarene yi.

E maxɔdinna tima, e naxa,

“Nde luyɛ halagi tɛɛni ito dɛxɔn en yɛ?

Nde nɔɛ luyɛ habadan tɛɛ wolonni ito dɛxɔn en yɛ?”

15Fɔ naxan sigan tima tinxinni,

a ɲɔndin fala,

naxan a mɛma tɔnɔne ra

naxanye sɔtɔxi gbaloni,

naxan mi tinma dimi yi seen nasuxɛ mayifuni,

a tunla ba muxune ra

naxanye faxa ti feene yitɔnma,

a yɛɛn ba fe ɲaxine ra.

16Na kanna fe luma nɛn

alo a na dɔxɔ yire matexini,

geyaan faran makantanxin yi findi a luxunden na.

A donseen nun igen mi dasama.

Yerusalɛn yi xunba

17I mangan toma nɛn i yɛɛn na a nɔrɔ gbeeni,

i yi yamanan danne to masigaxi pon!

18Nayi, i mirima nɛn i ya ɲaxankata danguxine ma,

i yi a fala, i naxa,

“Na kuntigine minɛn

naxanye yi mudun nasuxuma

e nun naxanye yi makantan yinna xun matoma a ra?”

19I mi fa na yama wasoxin toma sɔnɔn,

xɔɲɛn naxanye fala xuine mi nɔɛ famunɲɛ,

xɔɲɛn naxanye fala xui mi mɛma a faɲin na.

20Siyon taan mato,

en sanle rabama taan naxan yi.

Ɛ yɛɛn tima nɛn Yerusalɛn ra,

bɔɲɛ xunbeli yirena,

a lu alo bubun naxan mi fa wayanma,

naxan wudiye mi fa talama

naxan lutiye mi fa fulunma sɔnɔn.

21Alatala a yɛtɛ yitama en na Ala Sɛnbɛmaan na mɛnna nin.

Xudene nun baa gbeene luma nɛn mɛnni,

yɛngɛ so kunkine mi danguɛ dɛnaxan yi.

Kunki gbeene mi danguɛ na mumɛ!

22Amasɔtɔ Alatala nan en ma kitisaan na.

Alatala nan en ma sariyasaan na.

Alatala nan en ma mangan na.

A tan nan en nakisima.

23Koni yaxune luxi nɛn

alo kunkin naxan lutiye bata fulun,

foyen kunkin nasigama dugin naxanye xɔn

ne mi fa xidixi sɔnɔn,

ne fan singanxi wudi kuyen naxan na,

na mi fa suxi.

Nayi, e se tongoxi gbeen yɛngɛni,

na yitaxunma nɛn

hali sankalatɔne e gbeen xalima nɛn.

24Nayi, Yerusalɛn kaa yo mi a falɛ,

e naxa, “N mi yalan.”

Na taan muxune hakɛne mafeluma nɛn.