Viewing:

Esayi Isaiah 35

Select a Chapter

Yerusalɛn xunba fena konyiyani

1Tonbonna nun bɔxɔ xaren sɛwama nɛn!

Burunna ɲingima nɛn sɛwani

a fuga alo gabala fugena.

2Fugene luma nɛn burunna yiren birin yi.

Burunna ɲingine yiriwama nɛn ɲaxanni.

A sɔnxɔ sɛwani!

Liban yamanan nɔrɔn sifan bata fi a ma,

e nun Karemele geyaan nun Sarɔn mɛrɛmɛrɛna.

Nayi, muxune nɔɛ Alatalaa binye gbeen toɛ nɛn,

en ma Alaa nɔrɔna.

3Ɛ muxu xadanxine rawɛkilɛ.

Naxanye xinbiye xuruxurunma,

ɛ ne sɛnbɛ so.

4Naxanye bɔɲɛ bata mini,

ɛ a fala ne xa, ɛ naxa,

“Ɛ wɛkilɛ, ɛ nama gaxu,

ɛ Ala famaan ni i ra ɛ gbeen ɲɔxɔdeni.

Ala ɛ yaxune saranna fima nɛn,

a tan yɛtɛɛn yi fa ɛ rakisideni.”

5Nayi, danxutɔne seen toma nɛn,

tuli xɔrine yi feen mɛ.

6Nayi, sankalatɔne yi tuganɲɛ ayi

alo xɛnle,

bobone yi sɔnxɔn nate sɛwani.

Amasɔtɔ tigi ige gbeen minima nɛn tonbonni,

baane yi mini bɔxɔ xareni.

7Ɲɛmɛnsin wolonxin findima nɛn daraan na,

min xɔli yiren yi masara tigi yirene ra.

Kankone yi xima dɛnaxanye yi nun,

gbalan nun tanbinna yi sabati mɛnni.

8Kira gbeen luma mɛnna nin

naxan xili bama

a “Sariɲanna Kirana.”

Muxu haramuxine mi sigan tima a xɔn

fɔ a xa findi ne nan gbee ra

naxanye na bira a fɔxɔ ra.

Xaxilitare yo mi na xɔn sigɛ.

9Yatane mi luma mɛnni,

sube xaɲɛne mi fɛ na mumɛ!

E mi toɛ na!

Alaa muxu xunbaxine nan sigan tima mɛnni.

10Alatala na naxanye xɔrɔya,

ne fama mɛnna nin.

E fama nɛn gbelegbelɛ ɲaxaɲaxani Siyon taani,

habadan sɛwan yi e yɛtagini yalan.

Ɲaxaɲaxan nun sɛwan luma nɛn e yi,

sunun nun kutunna yi ɲan fefe!