Viewing:

Yaburina Psalms 140

Select a Chapter

Ala maxandina xunbana fe ra

1Dawudaa bɛtina, bɛti baane kuntigin xa.

2Alatala, n xunba muxu ɲaxine yii.

N natanga gbalotɔne ma.

3E fe ɲaxi yitɔnna nin waxatin birin.

E yɛngɛ ralanna nin lɔxɔ yo lɔxɔ!

4Fala xɔlɛne nan e lɛnne ma

alo saɲina.

E fala xuine xɔlɔ alo koson xɔlɛna.

Bɛti xuini te.

5Alatala, n natanga muxu ɲaxine sɛnbɛn ma.

N nakisi gbalotɔne ma,

naxanye kataxi n nabira feen na.

6Muxu wasoxine bata lutin nati n yɛɛ ra.

E bata e gbatune rati kiraan xɔn ma n suxu xinla ma.

Bɛti xuini te.

7N bata a fala Alatala xa n naxa,

“N ma Ala nan i tan na.

Alatala n ma maxandi xuiin namɛ!”

8Marigina Alatala, n nakisi sɛnbɛna,

i n xun mayɛngɛma yɛngɛ so waxatini.

9Alatala, i nama tin

muxu ɲaxine waxɔn feen yi liga.

I nama tin e fe nataxine yi kamali,

e yi waso ayi.

Bɛti xuini te.

10I nama tin n yaxune yi nɔɔn sɔtɔ.

Ala xa n yaxune gbalo falane so e xun na.

11Ala xa tɛɛ wolonne bɔxɔn e ma.

Ala xa e woli ayi tɛɛni.

Ala xa e woli yinla kui

e mi nɔɛ tɛ naxan na.

12Nafigine mi luma yamanani.

Ala xa yihadin so gbalotɔne xun na.

13N na a kolon

a Alatala kiti kɛndɛn sama tɔrɔ muxune xa,

a yi yiigelitɔne xun mayɛngɛ kitin sa.

14Tinxin muxune i tantunma nɛn yati!

Muxu faɲine yi lu i yɛtagi.