Ala fan
1Dawuda gbeena. A to a yɛtɛ findi fatɔɔn na Abimeleki fɛma, naxan a kedi.
2N barikan birama Alatala xa waxatin birin,
n lu a tantunɲɛ!
3N na Alatala matɔxɔma n sɔndɔmɛni.
Tɔrɔ muxune yi a mɛ, e ɲaxan.
4En xa Alatala gbona fe fala!
En na a xinli te en bode xɔn!
5N bata Alatala xandi,
a yi n yabi,
a gaxun birin ba n yi.
6Naxanye yɛɛn tixi a tan na,
ne sɛwama nɛn,
e mi yarabɛ mumɛ!
7N tan yiigelitɔna n xui ramini nɛn Alatala ma,
a yi n xuiin mɛ,
a yi n nakisi gbalon ma.
8Alatalaa malekana a yɛɛragaxu muxune rabilinma nɛn,
a yi e kantan.
9A mato,
i a kolonɲɛ a Alatala fan.
Sɛwan na kanna xa
naxan na a luxun i tan yi.
10Ɛ gaxu Alatala yɛɛ ra,
ɛ tan a yama sariɲanxina,
bayo naxan na gaxu a yɛɛ ra,
na makoon fanma nɛn.
11Hali yatane,
kamɛna e suxuma nɛn,
koni naxanye Alatala fenma,
ne mi dasɛ se faɲi yo ra.
12N ma diidine, ɛ fa,
ɛ fa ɛ tuli mati n na.
N xa ɛ xaran Alatala yɛɛragaxun ma.
13Ndee waxi siimayaan xɔn?
Ndee waxi siimaya xunkuyen nun sɛwan xɔn?
14Nayi, ɛ fala ɲaxine yiba,
e nun wulena.
15Ɛ ɛ xun xanbi so fe ɲaxini,
ɛ fe faɲin liga.
Ɛ bɔɲɛ xunbenla fen,
ɛ lu a fɔxɔ ra.
16Alatala yɛɛn muxu tinxinxine ra,
a tuli matixi e xuiin na.
17Alatala xun xanbi soxi fe ɲaxi rabane yi.
E na faxa,
ɲinan tima e xɔn nɛn sinma!
18Tinxin muxune na e mawuga Alatala xa,
a tuli matima e ra nɛn,
a e xunba e tɔrɔne birin yi.
19Alatala luma nɛn ne xɔn
naxanye bɔɲɛn kalaxi.
A yigitɛgɛtɔne rakisi.
20Tɔrɔ wuyaxi tinxin muxun lima nɛn,
koni Alatala a bama nɛn e birin yi.
21Ala a xɔnne birin kantanma nɛn,
hali keden, a mi girɛ.
22Fe ɲaxin nan muxu ɲaxin faxama.
Tinxin muxune yaxune yalagima nɛn.
23Alatala a walikɛne niin xunbama nɛn.
Naxan na a luxun a yi,
na mi yalagɛ mumɛ!