Viewing:

Ezekiel Ezekiel 32

Select a Chapter

Pilung nu Egypt nni ta’rebnag ko gayuch

1U lan e bin ni m’on e rran ko bin ni ragag nge l’agruw e pul ko duw ni ragag nge l’agruw ni gamad ba kalbus u wuru’ e nam, me non SOMOL ngog, 2ni ga’ar, “Fak e girdi’, ngam mpi’ e thin nib muduwgil ni nge ginaeng e pilung nu Egypt. Ngamog e re thin rog ney ngak: Gur e ga be ngongol ni bod e layon u fithik’ e pi nam, machane ri ga bod e gayuch ni be atul u lan ba lul’. Ga be aer aer nag e ran nga rifrifen em ma ga be burownag e pi lul’. 3Nap’an nra mukun bo’or e nam nga ta’bang, ma bay gu kolem ko nug rog mug pagrad ngar girengiyed fare nug nga talang. 4Bay gon’em nga daken e but’ mug pining gubin e arche’ nge gamanman u fayleng ngar languyed gur. 5Bay gu wereg downgim nike mel nga daken e pi burey nge lan e pi loway. 6Bay gu pu’og racha’em nge garer u daken e pi burey me suguy e pi lul’. 7Nap’an ni gu ra kireb nagem, mu gu upnguy lanelang mu gu m’aynag ram’en e t’uf. Ma yal’ e bayi mith nga fon e manileng, me m’ay ra’en e pul. 8Bay gu thang gubin e magal u tharmiy mu gu rugoy e birom e fayleng nga fithik’ e lumor. I Gag SOMOL ni Th’abi Tolang e gu be non.

9“Pire’ e nam e bayi wagagey lanin’rad u thin e gafgow rom ni bay gu wereg ko nam ni dawor mu rung’ag murung’agen bingyal’. 10Bo’or e nam e ra gin ko tin gu ra rin’ ngom. Nap’an ni gu ra furuy e saydon rog, mra dada’ e pilung ko marus. Rofen ni ga ra thay nga but’, ma urngin i yad nra t’on ni karrus naged e pogofan rorad.”

11I SOMOL ni Th’abi Tolang e ga’ar ko pilung nu Egypt, “Bay machda’ gow e saydon rok e pilung nu Babylon. 12Bay gu pag e salthaw ko pi nam nib buchan’ ngar girngiyed e saydon rorad ngar li’ed gubin e girdi’ rom. Urngin e girdi’ nge gubin ban’en rom ni gab uf ngay e bay ni gathay. 13Bay gu li’ e garbaw rom u charen gubin e pi luwed ko ran. Nge par ni dakriy be’ fa ba garbaw ni ngki aer aer nag e ran bi’id. 14Bay gu mocha’nag e pi ran romed me machalbog me yan e ran u lan e lul’ nib yal’uw. I Gag SOMOL ni Th’abi Tolang e gu be non. 15Nap’an ni gu ra tay yu Egypt nge par ndakuriy e wulgo’ riy mug gechignag e pi’in yad ma par u rom, ma aram e bay ra nanged ni Gag fare SOMOL. 16Re thin ney nni gineangrad ngay e bayi mang ba daloloy’. Pi’in nib ppin ko pi nam e bay ron’ed ni ba dololoy’ ni fen yu Egypt nge gubin e girdi’ ni bay riy. I Gag SOMOL ni Th’abi Tolang e gu be non.”

Fayleng ko yam

17U lan e bin ni ragag nge lal e rran ko re pul ni ta’reb ko duw ni ragag nge l’agruw ni gamad ba kalbus u wuru’ e nam, me non SOMOL ngog. 18“Fak e girdi’, mu dololoy’nag urngin e girdi’ nu Egypt. Mon’rad nga’ar nib cheag fapi nam ngay nib gel gelngirad ngranod ko fayleng ko yam’. 19Mag ga’ar ngorad:

“Gimed be leamnag ni bfel’ ya’amed ngak gubin e girdi?

Bay mmarod nga’ar ko fare fayleng ko pi’in yad ba yam’

ngu’um thiggad u rom u fithik’ e pi’in tadenen.

20“Girdi’ nu Egypt e bay ra mulgad ngar uned ngak e pi’in nni thang e pogofan rorad ko mael. Kan mu’ i fal’eg rogon e saydon ni nge li’rad ngarm’ad ni yad gubin. 21Pi’in falu’ ni yad ba gilbugwan nge pi’in ni ur chamgad ni pa’ yu Egypt e bay rabad ra rurged pa’ yu Egypt ni kafin rtawgad nga langgin e fayleng ko yam’. Yad ra tolul ni yad be ga’ar: ‘Pi’ ni yad ba tadenen ni kan li’rad u fithik’ e mael e karbad ngaray nga’ar, yad ba’aray ni yad ba thig aray u but’!’

22“Assyria e bay u rom, ni go’ bay e pi malangen e yam’ ko salthaw rok u rom. Yad gubin ni ram’ad u fithik’ e mael, 23ma low rorad e bay u lan e gin th’abi to’ar ko fayleng ko yam’. Urngin e salthaw rok ni yim’ u fithik’ e mael, e ba langbiy e malang rorad e birok’ e malang. Immoy bingyal’ ni ur karnged e marus u daken e binaw ko pi’in yad bfos.

24“I Elam e bay u rom, nib liyeg fapi malangen e yam’ ko salthaw rok. Yad gubin nli’rad ko mael, miyad yan nga’ar ko fare fayleng ko pi’in karm’ad nda ni maad’ad nagrad ni bod ni yog e motochiyel ku Moses. Nap’an e yad bfos ma ur k’arnged e marus i yan, machiney e yad ba thig u but’ ni yad ba yam’ nib m’ayfarad. 25Elam e ba thig u but’ u fithik’ e pi’in kan li’rad ko mael, ni pi malangne yam’ ko salthaw rok e go’ yad ba liyeg u but’. Ni yad urngin ni da’an ni maad’ad nagrad ni bod ni yog e motochiyel ku Moses, nram’ad ko mael. Nap’an ni yad bfos ma ur k’arnged e marus i yan, machiney e yad ba thig u but’ ni yad ba yam’ nib m’ayfarad ni bod e pi’in li’rad ko mael, ni kan unegrad nga tanggin e buchwa’athan ko pi’in li’rad ko mael.

26“Meshek nge Tubal e yow ba mu’un nga fithik’, e malangne yam’ ko salthaw rorow ni go’ ba sug u but’ i yan. Yad urngin mada ni maad’ad nagrad ni bod ni yog e motochiyel rok Moses, e yi go’ ram’ad ko mael. Immoy bingyal’ ni ur karinged e marus ko pi’in nib fos. 27Dan tay fan e gum’eyag rorad ni bod e gume’yag rok e pi’in nib gilbugwan kakrom, ni yima k’eyagrad ngaranod ko fayleng ko yam’ nib mu’un talin e cham rorad ngorad, pi saydon rorad e yima tay nga tan lolugenrad ma yung i shield rorad e yima ta’ nga daken e ldow rorad. Yad bogni’ ni yad ba gilbugwan nib gaman gelngirad ni ur karnged e marus ko pi’in nib fos.

28“Aray rogon piyu Egypt ni yad ra thig u fithik’ e pi’in nda ni maad’ad nagrad ni bod ni yog e motochiyel rok Moses nli’rad ko mael.

29“Ku bay Edom u rom niyad e pi pilung nge pi tagagiyeg rok. Ni aram ferad gel makar thiggad u fithik’ e pi’in nli’rad ko mael; kar thiggad u but’ u lan e fayleng ko yam’ ni yad mu’un ko pi’in nda ni maad’ad nagrad ni bod ni yog e motochiyel rok Moses nramad’ ko mael.

30“Urngin e fak e pilung ko lel’och ni yad bay u rom, ma ku aram rogon e piyu Sidon. Gelngirad e immoy bangyal’ ni ur k’arnged e marus i yan, machane chiney e karanod nga’ar nib m’ayfarad, ko pi’in li’rad ko mael ni kan k’eyegrad, ndariy bagyad nni maad’adnag ni bod ni yog e motochiyel rok Moses. Kar uned ko m’ayfan ko pi’in nranod nga’ar ko fare fayleng ko yam’.

31“Urngin e pi’in li’rad ko mael e paslagnag lanyan’ e pilung nu Egypt nge salthaw rok,” I SOMOL ni Th’abi Tolang e be non.

32“I gag e kug gagiyegnag e pilung nu Egypt ni nge k’armarus ko girdi’, machane ir nge urngin e salthaw rok e ran li’rad ngarm’ad min keyegrad u fithik’ urngin e pi’in nra m’ad ko mael nda ni maad’ad nagrad ni bod ni yog e motochiyel rok Moses.” I SOMOL ni Th’abi Tolang e be non.