Viewing:

Jeremiah Jeremiah 5

Select a Chapter

Denen rok yu Jerusalem

1Gimed e girdi’ nu Jerusalem, mmilgad u daken e yupa’ i kanawo’!

Mu changar gad u charmed! Mi gimed guy!

Mu wirgiyed e yungin ni yima market riy!

Ko gimed ra pir’eg ta’be’

nma rin’ e n’en nib mat’aw

mma guy rogon ni ngi i par nib yul’yul’ ngak Got fa?

Fa’anra gimed ra pir’eg, ma SOMOL e ra n’ag fan u wan’ e denen nu Jerusalem.

2Yug aram rogon ni gimed ma yog ni gimed ma tay fan SOMOL,

ma gathi aram rogon u wan’med.

3Ba muduwgil nra changarnag SOMOL e yul’yul’.

Be toymed, machane damur motoyilgad;

ke masengseng nagmed, machane dabmed ni ngam folgad.

Gimed ba gelan’ ndamur paged e kireb romed.

4Ma aram mu gu leam, mug ga’ar, “Pi girdi’ ney e kemus ni pi’in gafgow ma dar nanged ban’en.

Yad ba ngongoli balyang;

der nanged ko mang e be yog e Got rorad ni dabisiy ni ngan rin’,

fa mang e ba’adag SOMOL ni ngar rin’ed.

5Ere bay gu waen ngak e pi’in yad ma gagiyeg

nggu weliy ngorad.

Bmich ni yad manang ko mang e be yog Got,

fa mang e ba’adag SOMOL ni ngar rin’ed.”

Machane yad gubin nra siyegned mat’wun SOMOL

miyad siyeg ni ngar folgad rok.

6Aramfan ni gamanman ni layon u loway e bayi thangrad;

ma pilis ni malboch u daken e ted ni desert e bayi popofrad ni yochyang,

ma pi leopard e bay ura pachpach gad niyad be fita’ u lan e yochi binaw rorad.

Pi girdi’ ney e yad ra yan nga waen, ma yira popofrad

ni bochan e denen rorad ni kaygi yo’or

ma ke yo’or yay ni yad be pi’ keru’rad ngak Got.

7I SOMOL e fith ni ga’ar, “Gur mangfan ni nggu n’ag fan u wun’ug e denen rok e girdi’ rog?

Yad e ka ra n’aged gag

yad be tay fan boch e got nde riyul’.

Ku gu durwi’iy e girdi’ rog karfos gad,

machane yad be par e girdi’ ni gathi mabgol rorad

ke ga’ forad ngak e ppin ni yad ma falchuway’ ngorad.

8Yad bod e os ni pumo’on nib thum’ ngaru’ farad ar ar,

nra bagyad ma keyim’ ni bochan le’engin e en ni yow bbuguliyoror.

9Ere mang ni dab gu gechig nagrad ko pin’ey

nggu togopluw nga ba nam ni aray rogon’?

10Bay gul’og e to’ogor ni nge th’ab nga but’ e grape ni fi’in e girdi’ rog,

machane gathi gubin ni ngan thang mit.

Bay gog ngorad ni ngar th’abed papa’ngin,

ni bochan e pi papa’ngin nem e de milfan ngog.

11Girdi’ nu Israel ngu Judah

e kar feked yathig.

I Gag SOMOL e gu be non.”

I SOMOL ni fek owchen rok yu Israel

12Girdi’ rok SOMOL e ka ra siyegned kar ga’argad, “Gathi ra rin’ ban’en. Dariy ba magawon nra yib ngodad; dabib e mael fa uyngol ngodad.” 13-14Yad be yog ni pi profet e dariy rograd ni yad bogi nifeng ni der pi’ SOMOL e thin rok ngorad. I SOMOL ni Got ni Gubin ma Rayag Rok e ke ga’ar ngog, “Jeremiah, bochan e pi thin nike yog e pi girdi’ ney, ma bay gu tay e thin rog nga langam ni bod ba nifiy. Girdi’ e bay ra boded e l’ud, ma nifiy e bayi urfiyrad ngar m’ay gad.”

15Gimed e girdi’ nu Israel, I SOMOL e be pining ba nam nib orel ni nge cham ngomed. Ba nam nib gel ma ba kakrom, ni ba nam ni da mananged lungun. 16Girdi’en e mun gat’ing rorad e bogi salthaw nib gel gelingrad ni yad ma cham ni dariy be’ ni yad ma runguy. 17Bay ra ful’ed wom’ngin e woldug romed nge ganmed; bay ra thanged e pogofan rok e pagel nge rugod ni pifakmed. Bay ra li’ed e yu ran’ nge yu ulung i gamanman romed miyad gathay fi’imed ni grape nge gek’iy ni fig. Yungi binaw ni ka ni yororiy ni fan ko mael ni pagan’ romed e bayi buthug e salthaw rorad nga but’.

18I SOMOL e ga’ar, “Machane mus ko tinem e rran ma dab gu thang owchen e girdi’ rog ni gubin. 19Nap’an ni yad ra fith ko mang ni gu rin’ gubin e pin’ey, me gur Jeremiah e ngamog ngorad, ri bod rogon nra chealgad rog nga orel ngu’ur pigpig gad rok yug boch e got nu bang u lan taferad, ere bay ur pigpig gad ko milekag u bang ni gathi taferad.”

Got ni puwan’ ko girdi’ rok

20I SOMOL e ga’ar, “Mog ko pi’in owchen Jakob, ma gog ko girdi’ nu Judah ni ngam ga’ar: 21Mu motoyilgad, gimed e girdi’ ni balyang ni manan’, ni bay owchamed machane damur guyed ban’en, ma bay telmed machane dabiyag ni ngam rung’aged ban’en. 22I gag e SOMOL, ere mangfan ni damur rus gad ngog? Mang ni damur t’on gad u p’eowcheg? Gu tay e yan’ ni aram e mathil ko day, ni ba mathil nib muduwgil ni dabi th’ab e day nga barba’. Ra i malach e day, machane dabyag ni nge th’ab nga barba’; ma ra mada’ lingan e n’ew ngalang ma dabyag ni nge pil nga barba. 23Machane gimed e pi girdi’ nir! Gimed bogi gelan’ ni tatogopluw; ka mu chealgad nga bang ka mu paged gag. 24Dakriy e ngiyal ni gimed be finey ni ngam liyorgad ngog, ni yug aram rogon ni gu ma pi’ e n’uw u nap’an ni be mul mul yuwan e gek’iy ni aram e nge yib e ayis, ma nap’an e n’uw ma gu ma pi’ wom’ngin e woldug romed ni gubin e duw. 25Machane pi denen romed e ke tay e pin’en nib manigil u orel romed.

26“Girdi’ nib kireb e yad be par u fithik’ e girdi’ rog; yad be pach yad be son ni bod e girdi’ nma pag e nug ni nge kol e arche’ ngay, machane wup ni yad be tay e girdi’ e ngar koled ngay. 27Nri bod be’ nib tamun arche’ nike suguy tafen e arche’ rok ko arche’, naun rorad e ka ra sugyed ko chugom ni ur laegged. Aram fan nike gel gelingrad ma kefel’ rograd, 28ma ka ra sugsug gad ya bfel’ e darwo’ ngorad. Ma dariy folen e kireb ni yad be rin’. Darir pi’ed mat’wun e pi’in kanim’ rorad fa rdaged ni bfel’ e rok e pi’in ni yibe gafgow nagrad.

29“Machane i gag SOMOL e bay gu gechig nagrad ni bochan e pin’ey; Bay gu fulweg taban ko re nam nem. 30Ban’en nib oloboch ni gin’an’uy ngay e ke buch u lan fare binaw. 31Pi profet e go’ ban e yad ma tay, ma prist e yad be gagiyeg u rogon nike yog e profet, ma girdi’ e dariy ban’en niyad be yog riy. Machane mang e yad ra rin’ ko ngiyal’ nike taw gubin ban’en ko tungun?”