Viewing:

Levitikus Leviticus 6

Select a Chapter

1I SOMOL e pi’ e pi gafal ni ba’aray ngak Moses. 2Ni bay ba maligach ni yira pi’ ni fa’anra denen be’ nib togopluw ngak SOMOL, ni bochan ke siyeg ni nge fulweg ban’en rok be’ nu Israel ni pi’ ngak ni nge ayuweg, fa ke iring ban’en rok be’, fa ke sasalap ngak be’, 3fa ke ban u murung’agen ban’en nike yan nga bang nike pir’eg ma be micheg ni dawori pir’eg. 4-5Fa’anra denen be’ nike bucheg reb e pin’ey, ma dabisiy ni nge fulweg e n’en nike fek ni gathi fen. Ma rofen nni pir’eg nib bbuch e rok ma thangri fulweg labgen ni gubin ngak e en ni fen, miki puthuy rliw’ e pasent ngay. 6Thangri fek i yib ko prist ba saf ni pumo’on ara ba kaming ni pumo’on ni dariy bochyang u downgin nib kireb ni aram e ba maligach ngak SOMOL nib mathang malfith. Ni bod rogon puluwon ni kan turguy. 7Ma fare prist e ra pi’ fare maligach ni fan ko denen rok facha’, ma yira n’ag fan rok.

Maligach ni yima Urfiy ni Kareb

8I SOMOL e yog ngak Moses 9ni nge pi’ ngak Aron nge pi pumo’on ni pifak e pi gafal ni ba’aray ni murung’agen e maligach ni mo’oruf. Ba maligach ni mo’oruf e ngan pag u daken e altar nib polo’ e n’ep ndabi math e nifiy riy. 10Me kadbul me yin’ fare prist madan e prist, me chuw ko fa ley i zubong rok. Ma aram me chuweg e awat nike aw ko fare maligach u daken e altar nge tay nga barba’ i charen fare altar. 11Ngemu’ me thilyeg e mad rok me fek fapi awat nga wuru’ e gin ma par yu Israel riy ko fa gin’en nib tabgul. 12Fare nifiy nu daken fare altar e thangri par ndabi math. Gubin e kadbul ni ngi i tay fare prist e l’ud ngay, me yarmiy e maligach ni mo’oruf u daken, me tay e mam ko fare maligach nma gapeseg thilin Got nge girdi’ nga daken. 13Thangri i par fare nifiy u daken e altar ni dabi math, ni dariy e ngiyal’ ni ngan pag nge math.

Grain ni ngan pi’ ni aram e kan ognag

14Irera’ gafalen e grain ni yima ognag, ba prist ko tabnaw rok Aron e nge fek e grain ni ngan pi’ ngak SOMOL nga mit fare altar. 15Me fek ba gogow i flour ni bay e gapgep, nge incense riy, nge urfiy u daken fare altar ni aram e pow riy ni kan pi’ ni ga’ngin ngak SOMOL. Bon e re maligach ney e rib fel’ u wan’ SOMOL. 16Ma tin nra aw riy e nge kay Aron nge fapi pumo’on ni fak; thingar ni kay ni dariy e is riy u lan e gin nib thothup; u lan e yoror ko fare Tent u P’eowchen SOMOL. 17Thingar dab nlith ni bay e is riy. I SOMOL e nge pi’ ni f’oth rok fapi prist ko fare maligach ni ggan. Rib tabgul, ni bod e maligach ko denen nge maligach ni mathang malfith. 18Chiney i yan ngaram e demturug be’ nib mo’on ni owchen Aron, ma rayag ni nge kay e pi ggan ney ni kan pi’ ni maligach ngak SOMOL. Ma yug be’ e ra math ko pi ggan ney mra afmachan nga feni tabgul.

19I SOMOL e pi’ e tin ba’aray e gafal ngak ngak Moses, 20ni fan ngak Aron nge pi pumo’on ni pifak ko ngiyal’ ni ngan yiblay bagyad ni nge yan ko fare liw ko prist. Rofen ni yira yiblay bagyad ni nge mang prist e ra pi’ l’agruw e pawn e flour (ni bod urngin e tin yima pi’ ko fare maligach ni grain), ra pi’ reb e pawn ni kadbul me baleyal’ miki pi’ reb. 21Yira athkuy e gapgep ngay min lith u lan e griddle nge mu’ min din’uf nge m’ingm’ing mi ni pi’ ni bod ba maligach ni grain, ni bon e bm’ag u wan’ SOMOL. 22Ma chiney i yan e ngaram e go’ pi’in owchen Aron nike mang Prist ni Th’abi Ga’ e ra pi’ e re maligach ney. Thingar ni urfiy nib polo’ ni ba maligach ngak SOMOL. 23Dariy bochiyang ni yi ra kay ko re maligach ni grain ney nma pi’ e prist; gubin nthingar ni urfiy.

Pi maligach ni Fan ko Denen

24Me yog SOMOL ngak Moses 25ni nge pi’ ngak Aron nge pi pumo’on ni pifak e pi gafal ni ba’aray ni fan ko maligach ko denen. Fare gamanman ni fan ko maligach ko denen e thingar nli’ nge yim’ u ba’ ni lel’och fare altar, ko gin yima li’ e gamanman ni fen e maligach ni mo’oruf riy. Re maligach ney e rib tabgul. 26Re prist nra pi’ fare gamanman ni maligach e thangri kay u lan e gin nib thothup, u lan e yoror ko fare Tent u p’eowchen SOMOL. 27Demturug ban’en nra math nga ufin fare gamanman mra afmachan; ma rachey nma’atang e racha’ riy nga daken bmad, ma thingar ni luknag u lan e gin nib thothup. 28Ma re th’ib ni but’ ni yira dulnguy ufin e re gamanman ni maligach ney u langgin e yira mu’ riy ma thingar ni bilig. Ma fa’anra ba th’ib ni wasey e ndulnguy u langgin, ma yira mu’ riy ma thingar ni gichiy min luknag ko ran. 29Demturug be’ nib mo’on u lan fapi tabnaw ko prist ma rayag ni kay e re maligach ney; re maligach ney e rib tabgul. 30Machane fa’anra ni fek yug boch ko fare racha’ i yan nga langgin e Tent ngan fanay ni nge chuweg e denen, ma fare gamanman e thingar dab ni kay; ma dabisiy ni ngan urfiy.