Viewing:

Psalms Psalms 105

Select a Chapter

Got nge girdi’ rok

(1 Kronicles 16:8–22)

1Mu pininged e magaer ngak SOMOL,

moged u fithik’ e girdi’ feni sorok,

mi gimed weliy ngak e pi nam e tin ke rin’!

2Mu tang niged e sorok ngak SOMOL;

mu weliyed urngin e pin’en ni bfel’ nike rin’!

3Mu felfelan’gad ni gadad girdi’en;

gubin e pi’in yad be pigpig ngak SOMOL e ngar felfelan’gad!

4Mman ngak SOMOL nge ayuwegnem;

mu’um liyor ngak ni gubin ngiyal’.

5Mu ted u wan’med feni manigil e pi maruwel rok nike ngongliy,

pi maang’ang rok, nge pin’en nike tirigiliy keyog,

6Gimed pifak Abraham ni tapigpig rok,

pi pumo’on ni fak Jakob, ni ir e mel’eg!

7I SOMOL e Got rodad;

tin keyog e fan nga ga’ngin e fayleng.

8M’ag rok e bayi tay u gil’ ndariy n’umngin nap’an,

nike micheg nga bbiyu’ e mfen.

9Ra tay u gil’ e thin rorow Abraham,

nge n’en ni micheg ngak Isak.

10I SOMOL e ngongliy ba m’ag u thilrow Jakob,

nra par ni dariy n’umngin nap’an.

11I ga’ar, “Bay gu pi’ ngom e nam nu Kanaan;

me par nike mil suwon ngom.”

12Girdi’ rok Got e ur moyed ni yad ba lich,

ni yad e milekag u lan e nam nu Kanaan.

13Ya uranod u reb e nam nga reb,

u tan gil’ilungun reb e pilung nge reb,

14machane de pag Got be’ nge gafgow nagrad,

ma i puwan’ ngak e pi pilung ni bochrad.

15I ga’ar, “Dabi math pa’med ngak e pi tapigpig rog ni gu mel’egrad;

dab mu rin’ed ban’en ngak e pi profet rog!”

16I SOMOL e pi’ e uyongol nge yib ko nam rorad,

me chuweg urngin e ggan rorad.

17Machane pi’ be’ nib mo’on nge m’on rorad,

Josef, nni pi’ nchuway’ ni nge mang ba sib.

18Ruw raba’ i ay ni kan chennag,

ma kan the’ ba wasey nga belel’ugun,

19nge yan i mada’ ko ngiyal’ ni yib i m’ug nib riyul’ e tin ni yi’iynag.

Thin rok SOMOL e micheg nib riyul’ e tin ni yog Josef.

20Ma aram me chuweg fare pilung nu Egypt Josef u kalbus;

en ni pilung ko pi nam e chuweg u kalbus.

21Me tay e pilung nu Egypt Josef ni ir e nge gagiyegnag e nam nu Egypt,

nge yog e thin ko re nam nem ni ga’ngin,

22urngin e pi tolang ni yad bay u tan pa’ e en ni pilung nranod nga tan pa’ Josef,

me yib mat’wun ni ngi i fonownag e pi’in yad ma puruy e en ni pilung.

23Me yan Jakob nga Egypt,

me par ko re nam nem.

24I SOMOL e gagiyegnag e tirok e girdi’ nge yib pifakrad ni pire’,

me gagiyeg nagrad ngu’ur gelgad ngak e pi to’ogor rorad.

25I gagiyegnag piyu Egypt ngar fanenikayed e tirok e girdi’,

ngu’ur ban niged e pi tapigpig rok.

26Me l’oeg Moses ni tapigpig rok,

nge Aron ni ir e turguy.

27Ra ngongliyew bogi ban’en ni Got

e be ngongliy u pa’row,

ur ngongliyew e maang’ang u lan yu Egypt.

28I gagiyegnag Got yu Egypt nge nep’ riy,

machane de fol yu Egypt ko tin keyog.

29Me pingeg e ran u lan e pi lul’ rorad nge ngal’ ni racha’,

me yim’ e nig ni bay riy ni gubin.

30Me sugnag e kayru lan e nam rorad,

ni mus nga tafen e en ni pilung me sugnag e kayru.

31Me non Got me sugnag e lal nge yinuk

lan e nam ni ga’ngin.

32Ma ayis nike el e aw nn’uw u daken fare nam

ma be mat e uluch u fithik’;

33me kirebnag yungi woldug ni grapes nge gek’iy ni fig ni fi’irad,

me t’et’ar urngin e gek’iy nga but’.

34Me non me yib e asmen’ing nga daken e nam,

ni bo’or e million ndabiyag i the’eg;

35miyad longuy urngin e woldug ni bay u lan e nam;

ra longuy wom’ngin e woldug ni urngin.

36Me li’ urngin e tin nganni’ e bitir ni pumo’on

ko tabinaw nu Egypt ni gubin.

37Me pow’iy yu Israel nga wuru’ e nam nu Egypt;

ni yad be fek e silber nge gol,

yad gubin ni yad ba gel ni dariy e m’ar rorad.

38Fa’anra chuwgad ngranod me felan’ yu Egypt,

ya ke tamdag yu Egypt ngorad.

39Me tay Got bangi manileng u puluwon e tirok e girdi’ ngalang,

nge ba nifiy ni nge tamilangnag owcherad nnep’.

40Ra weniggad ngak, me pi’ e arche’ ni quail nge yib ngorad,

me pi’ e ggan ngorad u tharmiy ngar gaman gad riy.

41Me bing ba war, me po’ e ran riy nga but’

nge yan u daken e ted ni bod ba lul’.

42Thin rok nib thothup ni micheg ngak Abraham ni tapigpig rok

e de pag talin.

43Me fek e girdi’ rok ngranod nga wuru’ e nam ni yad be tang,

ni girdi’ rok ni ir e mel’eg ngranod ni yad be tolulnag e felfelan’.

44Me pi’ boch e nam ngar tafned, ni tafen yugu boch e girdi’,

me gagiyeg nagrad ngar fi’iyed e woldug rorad,

45ni fan e nge fol e girdi’ rok ko pi motochiyel rok,

mu’ur rin’ed gubin e tin ke ta’chiylen.

Mu pining e sorok ngak SOMOL!