Viewing:

Psalms Psalms 145

Select a Chapter

Ba tang ni nga ni pining e sorok ngak Got

1Got rog ma pilung rog, bay ug weliy rogon feni sorom ngan nang;

bay ug pining e magaer ngom ndariy n’umngin nap’an.

2Gubin e rran ni bay ug pining e magaer ngom;

bay ug pining e sorok ngom ndariy n’umngin nap’an.

3I SOMOL e ba sorok, ma ri lr e thingar ni pining e sorok ngak;

rogon feni sorok e dabi taw e leam ngay.

4Tin ni kam rin’ e bay ni pining e sorok riy ngom u reb e mfen ngu reb;

bay ur weliyed ngan nang e pin’en nib sorom ni kam ngongliy.

5Girdi’ e bay ur weliyed murung’agen e fla’ab rom nge rogon feni sorom,

ma bay ug leamnag e pin’en nrib fel’ ni kam ngongliy.

6Ma girdi’ e bay ur weliyed e pin’en nib sorom ni kam ngongliy,

ma bay ug weliy rogon feni sorom ngan nang.

7Bay ur weliyed murung’agen fanam fel’,

miyad tangnag murung’agem nri gab gol.

8I SOMOL e ba t’uf e girdi’ rok mma runguyrad,

ba sowath ni nge damumuw ma ba sug ko t’ufeg ni dabimus.

9Bfel’ e tin ma rin’ ngak urngin e girdi’,

mma runguy urngin e tin ke sunumeg.

10SOMOL, urngin e tin kam sunumeg e bay ur pininged e sorok ngom,

ma tirom e girdi’ e bay ur pininged e magaer ngom!

11Bay ur weliyed murung’agen e fla’ab ko gagiyeg rom,

miyad weliy murung’agen gelngim ni bay nib gel,

12ya nge nang urngin e girdi’ feni sorom ko tin kam rin’,

nge gagiyeg ni ga be tay.

13Gagiyeg rom e bayi par ndariy n’umngin nap’an,

ma bay um par ni gur e pilung ndariy n’umngin nap’an.

I SOMOL e ba yul’yul’ ko tin keyog nra rin’,

ma bfel’ urngin e tin ma rin’.

14Ma ayuweg urngin e pi’in ke yib e gafgow ngorad;

ma pi’ e athamgil nga laniyan’ e pi’in ke mulan’rad.

15Urngin e tin nib fos ban’en ni yad be toer ngak,

mma pi’ e ggan ngorad ko ngiyal’ ni nge yog ngorad.

16Ba gaman urngin ni be pi’ ngorad

nge yan i aw ni kefel’ u wun’rad ni yad gubin e tin ke yag ngorad.

17I SOMOL e mmat’aw urngin e tin ma rin’,

mma runguy e girdi’ u fithik’ urngin e ngongol rok.

18Ma ba chugur ngak urngin e pi’in yad ma non ngak,

ni yad be non ngak u fithik’ e yul’yul’.

19Pi’in bay madgun u wun’rad e ma pi’ ngorad e tin nge yag ngorad;

ma rung’ag e tin yad ma wenignag ngak me ayuwegrad.

20Ma yoror rok urngin e pi’in nib t’uf rorad,

machane ra thang e pogofan rok urngin e pi’in nib kireb.

21Bay ug pining e sorok ngak SOMOL ni gubin ngiyal’;

urngin e tin ke sunumeg e ngu’ur pininged e sorok nga fithingan nib thothup ndariy n’umngin nap’an!