Viewing:

Psalms Psalms 42

Select a Chapter

KAEN L’AGRUW E BABYOR

(Psalms 42—72)

Meybil ni tay be’ ni kan chuweg ko nam rok

1Rogon ba gamanman ni deer ni finey e ran nib garbeb ni bay u lan ba lul’,

e aram rogon ni ku gum’ ni bocham, I gur Got.

2Gur Got ni ga be par ni gabfos e ku gum’ ni bocham ni bod ni kug balel.

wu’in e rayag ni gub gu liyor u p’eowchem?

3Gu be yor ni rran nge nep’,

ma lu’ e ke mang ggan ngog;

gubin ngiyal’ ni be fitheg e pi to’ogor rog ni be lungurad,

“Bu uw e Got rom?”

4Fa’an gu ra leamnag e kakrom mi i kireban’ug;

ya ngiyal’nem e un e girdi’ ni yo’or ngog ngu’ug warod ko fare naun rok Got,

gu ma m’on ngu’ur leked gag,

ni gamad ba ulung i girdi’ ni gamad ba felfelan’,

ni gamad be tang ma gamad be pining e sorok ngak Got ni ba ga’ lammad.

5Mangfan ni kari taganan’ug?

Mangfan ni dakir paslag lanin’ug?

Bay gu tay e pagan’ rog nga daken Got,

ma aram bayay ni bay ku gu pining e sorok ngak,

ya ir e ta’ayuw rog ma Got rog.

6-7Kari kireban’ug u roy ko gin’ey ni gathi nam rog;

ma aram me sulan’ug ngak.

Ir e ke pi’ e pi n’ew ko gafgowan’ nga lanin’ug;

be kumong lingan i yib ngog ni bod e sugbur,

bod e pi thang’el ni ba dirra’ lingan ni be aw ngalan e lul’ ni Jordan

ni be yib ko Burey nu Hermon nge Burey nu Mizar.

8Yigi dag SOMOL e t’ufeg rok ni dabimus ni rran;

me yag ba tang ngog nnep’,

ni ba meybil ngak Got ko yafos rog.

9I Got, ni ir e be yoror rog, e ke lungug ngak,

“Mang ni kam pag talig?

Mang nthingar ug gafgow

ko kireb nib gel ni be tay e pi to’ogor rog ngog?”

10Kug parde’ ko thin nib kireb ni be yog e pi to’ogor rog ngog,

ya kar pired ni yad be fith ngog ni be lungurad,

“Bu uw e Got rom?”

11Mangfan ni kari taganan’ug?

Mangfan ni dakir paslag lanin’ug?

Bay gu tay e pagan’ rog nga daken Got,

ma aram bayay ni bay ku gu pining e sorok ngak,

ya ir e ta’ayuw rog ma Got rog.